សហគមន៍អេកូទេសចរណ៍កោះទ្រង់ ដែលមានទីតាំងស្ថិតនៅចំកណ្តាលទន្លេមេគង្គ ទល់មុខទីរួមខេត្តក្រចេះទិសខាងលិច ប្រមាណ១គ.ម។
យោងតាមការបង្ហោះដោយរដ្ឋបាលខេត្តក្រចេះ គឺបានណែនាំតំបន់សក្តានុពលអេកូទេសចរណ៍ធម្មជាតិមួយកន្លែងទៀត ដែលបានទាក់ទាញភ្ញៀវទេសចរទាំងជាតិនិងអន្តរជាតិមិនដែលដាច់ ព្រោះតែភាពល្អឯកនៃកោះ ទិដ្ឋភាពដ៏ស្រស់ត្រកាល ទទួលបានភាពកក់ក្តៅនិងភាពរស់រាយរាក់ទាក់ពីអ្នកភូមិ ក៏ដូចជាទទួលបានអារម្មណ៍ធម្មជាតិពិតៗពី «កោះទ្រង់»ក្នុងទឹកដីនៃខេត្តក្រចេះ។
កោះទ្រង់មានឆ្នេរខ្សាច់ដ៏ស្រស់ស្អាត អមដោយទឹកទន្លេត្រជាក់ថ្លាឆ្លង់នារដូវប្រាំង និងហ៊ុមព័ទ្ធដោយព្រៃប្រឹក្សា ធម្មជាតិស្រស់បំព្រោងពាសពេញផ្ទៃកោះ ក៏ដូចជាដើមឈើធំៗដែលមានអាយុកាលរាប់ឆ្នាំ។ រីឯបរិយាកាសនៅលើកោះនេះទៀតសោតគឺមានសភាពស្ងប់ស្ងាត់ល្អ ខ្យល់អាកាសបរិសុទ្ធស្រស់ស្រាយសម្រាប់អ្នកដែលចង់សម្រាកលំហែកាយតាមបែបជនបទ និងស្រលាញ់ធម្មជាតិ។
អ្នកទាំងអស់គ្នាគឺអាចរីករាយជាមួយនឹងសកម្មភាពបែបសាមញ្ញៗជាច្រើននៅលើកោះនេះ ដូចជា បោះតង់សម្រាកនៅតាមឆ្នេរខ្សាច់នៃដងទន្លេ មានទាំងផ្ទះស្នាក់សហគមន៍ រីសតតូចធំ ភ្សក់ម្ហូបអាហារឆ្ងាញ់ៗប្រចាំតំបន់ ជិះរទេះសេះ/រទេះគោ ជួលកង់ជិះកម្សាន្តជុំវិញកោះ មើលថ្ងៃរៀបលិចនៅពេលល្ងាច ក៏ដូចជាមើលឃើញសម្រស់ក្រុងក្រចេះដ៏ស្រស់ស្អាតនាពេលរាត្រី។
កាន់តែគួរឲ្យចាប់អារម្មណ៍ជាងនេះទៅទៀត នៅលើកោះមួយនេះគឺពោរពេញទៅដោយបន្លែ រុក្ខជាតិ និងដើមឈើស្ទើរតែគ្រប់ប្រភេទដែលប្រជាសហគមទីនោះដាំដុះដើម្បីចិញ្ចឹមជីវិត។ ពិសេសបំផុតគឺ«កោះទ្រង់»នេះត្រូវបានគេស្គាល់ ព្រោះល្បីថាក្រូចថ្លុងមានរសជាតិឆ្ងាញ់ពិសារជាងតំបន់ផ្សេងៗ ដែលអំណោយផលតាំងពីសម័យសង្គមរាស្រ្តនិយមមកម្លេះ។ គ្រប់ផ្ទះរបស់អ្នកស្រុកទីនោះ សុទ្ធតែមានដើមក្រូចថ្លុងស្ទើរតែគ្រប់ៗគ្នា ហើយចំពោះរដូវក្រូចថ្លុងដែលសម្បូរហូរហ៊ាវិញគឺក្នុងអំឡុងខែវិច្ឆិកា។
ដូច្នេះហើយ ភ្ញៀវទេសចរគ្រប់ៗរូបនាថ្ងៃចុងសប្តាហ៍មិនដឹងទៅកម្សាន្តទីណាគឺអាចមកលេងសហគមន៍អេកូទេសចរណ៍«កោះព្រះ»ខេត្តក្រចេះនេះបាន ធានាថានឹងទទួលបានដំណើរកម្សាន្តដ៏រីករាយនិងអនុស្សាវរីយមិនអាចបំភ្លេចបានផងដែរ៕
