ទើបតែសម្រួលបញ្ចប់បញ្ហារឿង BA ប្រើពាក្យសម្តីមិនសមរម្យដាក់កូនស្រីខ្លួន ដេននី ក្វាន់ ក្តៅស្លឹកត្រចៀកម្តងទៀតក្រោយពីមានអ្នកលេងបណ្តាញសង្គមបោះពាក្យសម្តីដាក់ ល្អហួស វ័យ១៤ឆ្នាំស្លៀកពាក់ស៊ិចស៊ីមិនសមភ្នែកមិនសមជានារីខ្មែរ។
នៅលើបណ្តាញសង្គមរបស់យុវតី ល្អហួស បានបង្ហោះរូបភាពនារីម្នាក់ជាអ្នកលេងបណ្តាញសង្គមដែលបានប្រើពាក្យសម្តីគ្រោតគ្រាតដាក់ខ្លួនរហូតមិនអាចទទួលយកបាន។ អ្នកលេងបណ្តាញសង្គមនោះបានបោះពាក្យដាក់ ល្អហួស ថា «មិនខ្វះពេលស៊ិចស៊ីទេអាយុប៉ិន១៤ឆ្នាំប្រញាប់ពាក់វាលបញ្ចេញដើមទ្រូងម៉េសមិចចង់បានប្តីមែន មិនសមភ្នែកទេនាងអើយ ចឹងពាក់អាវធ្វើអីជាខ្មែរមែនបរទេសទេ ហេតុអ្វីមិនចេះបិទបាំងខ្លះទៅ បើសម្រស់ស្អាតហើយចឹងធ្វើចរិតមាយាទឱ្យល្អថ្លៃថ្នូរផងនាង មិចអាងខ្លួនកូនអ្នកមានធ្វើអីក៏បានតាមចិត្ត»។
ពាក្យសម្តីរបស់អ្នកលេងបណ្តាញសង្គមនេះដែរ យុវតី ល្អហួស បានបង្ហោះថា«នាងខ្ញុំទើបតែបញ្ចប់ការងារបញ្ចូលសំលេង ហើយក៏ឃើញអ្នកមីងស៊ែរ ដៀលរូបនាងខ្ញុំ មើលងាយនាងខ្ញុំ គ្រប់បែបយ៉ាង តើនាងខ្ញុំខុសអ្វី ? នាងខ្ញុំពិតជាពិបាកទទួលយកខ្លាំងណាស់ »។
ចិត្តជាម្តាយមិនអាចឱ្យគេដៀលកូនស្រីនូវពាក្យសម្តីដែលមិនអាចទទួលយកបាន ដេននី ក្វាន់ បានបង្ហោះថាចរិតចឹងៗ ទុកឱ្យខ្លួនជាអ្នកលេងវិញ ដោយសង្កត់ធ្ងន់ថាកូនរបស់នាងហាមប៉ះ។
យ៉ាងណាមិញ បន្ទាប់ពីបង្ហោះសារមិនទាន់បានប៉ុន្មានផង មានគណនីហ្វេកប៊ុកមួយបានឆាតមកសុំការអភ័យទោសពីអ្នកនាង ដេននីក្វាន់ ដោយអះអាងថាជាបងស្រីរបស់គណនីដែលបង្ហោះប្រើពាក្យសម្តីគ្រោតគ្រាតដាក់ល្អហួស។
អ្នកនាង ដេននីក្វាន់ បានបង្ហោះថា «ទើបតែពេលនេះខ្ញុំបានដឹងថា មនុស្សសតិមិនគ្រប់អាចសរសេរអក្សរបាន គួរធ្វើយ៉ាងណា?»។
គួរបញ្ជាក់ផងដែរថា ថ្មីៗនេះអ្នកនាង ដេននីក្វាន់ ទើបតែក្តៅស្លឹកត្រចៀក BA ម្នាក់ដែលបានប្រើពាក្យសម្តីមិនសមរម្យដាក់ល្អហួស រហូតមានការសម្របសម្រួលពីម្ចាស់ក្រុមហ៊ុនអ្នកនាងក៏ព្រមបញ្ចប់រឿងទៅ៕
