ភាពស្រស់ស្អាតរបស់នាដការី សុគា គីមលាង ហៅ Konant បានឆាបឆក់បេះដូងពីគ្រប់មជ្ឈដ្ឋានមិនថាក្មេងចាស់ប្រុសឬស្រីជាពិសេសរូបនាងត្រូវមហាជកោតសរសើរយ៉ាងខ្លាំងនូវការលើកស្ទួយវប្បធម៌ជាតិបានគ្រប់ទម្រង់ឱ្យអ្នកជំនាន់ក្រោយបានស្គាល់អ្វីដែលជារបស់ខ្មែរមិនមែនជារបស់ប្រទេសផ្សេង។
តាមរយៈគណនីមួយបានកោតសរសើរទៅ សុគា គីមលាង ថានាងជានាដការីមួយរូបដែលបានឆ្លងកាត់និងបញ្ចប់ការសិក្សាពីសាលាត្រឹមត្រូវ និង ជាតារាមួយដួងដែលបានផ្សព្វផ្សាយវប្បធម៌ខ្មែរចេញមកបានគ្រប់ទំរង់ មានភាពទាក់ទាញបំផុត និងឥតខ្ចោះ។ លើសពីនេះ ស្រីស្រស់រូបនេះបានជំរុញចិត្តប្រជាជនខ្មែរគ្រប់ស្រទាប់ ជាពិសេសយុវជនខ្មែរឱ្យមានមោទនភាពជាខ្លាំង និង ពុះកញ្ជ្រោលក្នុងការគាំទ្រ ស្រលាញ់ និងលើកស្ទួយវប្បធម៌ជាតិខ្លួនឡើងវិញ។ សកម្មភាពកន្លងមករបស់នាដការីរូបនេះបានលើកឡើងពីទម្រង់របាំបុរាណនីមួយៗ ធ្វើឱ្យយុវជនខ្មែរមួយចំនួនបានភ្ញាក់ខ្លួនស្គាល់ពីអ្វីដែលជារបស់ជាតិខ្លួន ដែលធ្លាប់តែច្រលំថាជារបស់គេទាំងដែលគេលួចចម្លងវប្បធម៌ខ្មែរ។
ស្នាដៃរបស់ សុគា គីមលាង មួយចំនួនបានក្លាយជាភស្តុតាងបន្សល់ទុកដល់ក្មេងជំនាន់ក្រោយរាប់រយឆ្នាំ មិនឱ្យមានការភាន់ច្រលំជាមួយអ្នកជិតខាង បែងចែកដាច់ស្រឡះពីអ្វីដែលជារចនាបថខ្មែរ និងអ្វីដែលគេបានចម្លងកែបន្លំយកទៅ ព្រោះរាល់ពេលសិល្បការិនីរូបនេះធ្វើឡើងបានឆ្លងកាត់ការពិនិត្យ និងសិក្សាច្បាស់លាស់អំពីអ្វីដែលខ្លួននឹងយកមកបង្ហាញទៅកាន់ទស្សនិកជន។
សុគា គីមលាង បានធ្វើឱ្យមហាជនចាប់ភ្លឹកយ៉ាងខ្លាំងកាលពីពិធីបុណ្យអុំទូកបន្ទាប់ពីរូបនាងបានធ្វើជាអ្នករាំក្បាលទូកនៅឯខេត្តសៀមរាប។ សម្រស់របស់នាងត្រូវបានអ្នកលេងបណ្តាញសង្គមជាច្រើនពោលសរសើរសូម្បីតែជាមនុស្សស្រីដូចគ្នាក៏សរសើរភ្លឹកពីសម្រស់ដ៏ផូរផង់របស់នាងផងដែរ។
កាលពីខែកញ្ញា កន្លងទៅនេះ នាដការី សុគា គីមលាង បានផ្ទុះកក្រើកយ៉ាងខ្លាំងបន្ទាប់ពីរូបនាងបានរាំរបាំអប្សរាលើភ្នំទឹកកកនៅប្រទេសនូវែលសេឡង់ដោយមានទាំងលើកទង់ជាតិកម្ពុជា រហូតដល់ជនជាតិថៃមួយចំនួនមិនចេះអៀនខ្មាស និងនៅមិនសុខបានកាត់តដាក់ទង់ជាតិថៃផងដែរ៕
