បញ្ហារមួលក្រពើ គឺបណ្តាលមកពីការកន្ត្រាក់ជាប់តឹងណែន នៃសាច់ដុំ ជាពិសេសនៅកំភួនជើង ឬប្រអប់ជើង ដែលវានឹងបាត់ទៅវិញប៉ុន្មាននាទីក្រោយ។ រមួលក្រពើ គឺអាចកើតឡើងគ្រប់ពេល ហើយភាគច្រើននៅពេលយប់ ឬពេលសម្រាក។ ដូច្នេះហើយ តើមូលហេតុអ្វីដែលធ្វើឱ្យយើងមានបញ្ហារមួលក្រពើ?
មូលហេតុដែលបង្កឱ្យមានបញ្ហានេះកើតឡើងគឺដោយសារ៖
-ការអង្គុយនៅមួយកន្លែងរយៈពេលយូរ។
-ការឈរ ឬដើរច្រើន។
-ការបែកញើសច្រើនពេក និងកង្វះជាតិទឹកក្នុងខ្លួន។
-ការប្រើប្រាស់កំលាំងសាច់ដុំខ្លាំងពេក។
-បញ្ហាកង្វះសារជាតិរ៉ែក្នុងរាងកាយ។
-កង្វះលំហាត់ប្រាណដើម្បីពង្រីកសាច់ដុំ។
-វាអាចជាសញ្ញានៃជំងឺមួយចំនួនដូចជា ជំងឺទឹកនោមផ្អែម, ជំងឺប្រព័ន្ធប្រសាទ, ជំងឺក្រពេញទីរ៉ូអ៊ីត, និងជំងឺថ្លើម ជាពិសេសមកពីការពិសារស្រាច្រើន។
វិធីការពារនិងព្យាបាលឱ្យបានត្រឹមត្រូវ៖
-ហាត់ប្រាណឱ្យបានទៀងទាត់ ប៉ុន្តែកុំហាត់ក្នុងបរិយាកាសក្តៅខ្លាំងពេក ដោយអ្នកអាចជិះកង់ ឬរត់តិចៗជាដើម។
-ត្រូវរៀបចំគ្រែឱ្យទូរលាយ កុំឱ្យទើសចុងជើង។
-ត្រូវពិសារទឹកឱ្យបានច្រើនជាប្រចាំ។
-បើឈឺខ្លាំងអាចស្អំទឹកក្តៅឧណ្ឌៗ ឬទឹកកក និងលេបថ្នាំបំបាត់ការឈឺចាប់។
-ទាញម្រាមជើងរបស់អ្នកឡើងលើ ហើយម៉ាស្សាកំភួនជើងរបស់អ្នក។
-ប្រសិនបើការរមួលក្រពើកើតឡើងញឹកញាប់ពេក ឬច្រើនជាង ៣ ដងក្នុងមួយសប្តាហ៍ អ្នកគួរតែទៅជួបគ្រូពេទ្យ ដើម្បីរកមូលហេតុពិតប្រាកដ៕
