មិនគួរបរិភោគអាហារចំនួន៥ប្រភេទនៅពេលមករដូវ

ស្ត្រីភាគច្រើនបានឈឺចាប់ក្នុងពេលមករដូវ ដោយសារកម្រិតអរម៉ូន Estrogen និង Progesterone បានផ្លាស់ប្តូរ ដែលធ្វើឱ្យភាពធន់នឹងជំងឺកាន់តែតិច ហើយពួកគេងាយប្រឈមនឹងកើតជំងឺផ្សេងៗ ។ ការឈឺចាប់នេះមានអាការៈស្រដៀងគ្នានឹងជំងឺគ្រុនផ្តាសាយ រាងកាយល្អិតល្ហៃអស់កម្លាំង រួមទាំងឈឺចាប់ដោយសារការមករដូវផងដែរ ។ វាជារឿងធម្មជាតិដែលអាចកើតឡើងក្នុងអំឡុងពេលស្ត្រីមករដូវ ចំណែកអាហារមិនគួរបរិភោគក្នុងអំឡុងពេលនេះ រួមមាន ៖

១-ទឹកដូង ៖
ការឈឺចាប់ពេលមករដូវ អាចកើតឡើងដោយសារកម្រិតអរម៉ូន Estrogen នៅក្នុងរាងកាយផ្លាស់ប្តូរ ហើយអរម៉ូន Estrogen ក៏មាននៅក្នុងទឹកដូងផងដែរ ។ នៅពេលយើងផឹកទឹកដូងក្នុងអំឡុងពេលមករដូវ វានឹងធ្វើឱ្យរាងកាយកើតគ្រុនក្តៅ ហើយយើងត្រូវចំណាយពេលព្យាបាលយូរជាងធម្មតា ។

២-ផ្លែខ្នុរ ៖
ខ្នុរ គឺជាផ្លែឈើមានជាតិក្តៅ ហើយការបរិភោគផ្លែឈើប្រភេទនេះក្នុងអំឡុងពេលស្ត្រីកំពុងឈឺចាប់ពេលមករដូវ នឹងធ្វើឱ្យសីតុណ្ហភាពក្នុងរាងកាយខ្ពស់ ។ ដូច្នេះ វាធ្វើឱ្យយើងកើតអាការៈគ្រុនក្តៅកាន់តែខ្លាំង ខណៈរាងកាយមិនអាចបញ្ចេញកំដៅចេញមកក្រៅ ។ ហេតុនេះ វាគ្មានផលល្អទេ នៅពេលបរិភោគខ្នុរក្នុងពេលមករដូវ ហើយក្រៅពីខ្នុរ យើងក៏ត្រូវប្រយ័ត្នការបរិភោគផ្លែឈើមានជាតិក្តៅផ្សេងទៀតផងដែរ ដូចជា មៀន និងទុរេន ។

៣-តាសក់ ៖
តាសក់ គឺជាបន្លែមានជាតិត្រជាក់ នៅពេលរាងកាយបានទទួលអាហារត្រជាក់ក្នុងអំឡុងពេលមករដូវ និងពេលរាងកាយខ្វះតុល្យភាព វាអាចធ្វើឱ្យយើងកើតអាការៈមិនប្រក្រតី ព្រោះជាតិត្រជាក់ដែលរាងកាយបានទទួលនឹងធ្វើឱ្យរាងកាយផ្លាស់ប្តូរច្រើនជាងមុន ។ លើសពីនេះ វាធ្វើឱ្យជំងឺរបស់យើងកាន់តែអាក្រក់ ។

៤-ទឹកកក និងការ៉ែមកី ៖
ទឹកកក និងការ៉ែមកី អាចធ្វើឱ្យប៉ះពាល់ដល់ការមករដូវរបស់ស្ត្រីបាន ។ វានឹងធ្វើឱ្យរដូវឈប់ហូរ រួមទាំងធ្វើឱ្យយើងកើតអាការៈខុសប្រក្រតី ព្រោះរាងកាយគ្មានតុល្យភាព ទន់ខ្សោយ ហើយរាងកាយផ្លាស់ប្តូរសីតុណ្ហភាពមិនទាន់ពេលវេលា ។

៥-កាហ្វេ និងទឹកតែ ៖
គេចាត់ទុកថា កាហ្វេ និងទឹកតែ មានជាតិកាហ្វេអ៊ីនខ្ពស់ ហើយវានឹងបណ្តេញជាតិទឹកចេញពីរាងកាយ ពេលនោះ រាងកាយនឹងខ្វះជាតិទឹក ។ រាងកាយរបស់យើងមិនអាចបញ្ចេញកំដៅមកក្រៅបានទេ ដូច្នេះ គួរចៀសវាងការផឹកកាហ្វេ ឬទឹកតែ ក្នុងអំឡុងពេលមករដូវ ព្រោះអាចធ្វើឱ្យយើងកាន់តែឈឺចាប់ជាងមុន ៕ ប្រភព ៖ TNN Health