ពិតជាសាហាវខ្លាំងណាស់ បុរសម្នាក់អាយុ២០ឆ្នាំ ជានិស្សិត រស់នៅប្រទេសម៉ាឡេស៊ីត្រូវជាប់ចោទ ពីបទឃាតកម្មលើមិត្តស្រីអាយុ២១ឆ្នាំ ដោយបានចាក់សម្លាប់ វះយកកូនចេញ និងដុតសាកសព ព្រោះតែជម្លោះមានកូនមុនរៀបការ។ នេះបើតាមការចុះផ្សាយរបស់សារព័ត៌មាន CNA ថ្ងៃទី២ ខែមិថុនា ឆ្នាំ២០២៣នេះ។
លោក Agus Salim Mohd Alias អធិការនគរបាលស្រុក Sabak Bernam បាននិយាយកាលពីថ្ងៃព្រហស្បតិ៍សប្តាហ៍មុនថា ជនជាប់ចោទគឺជាអតីតនិស្សិតមហាវិទ្យាល័យបាននាំជនរងគ្រោះចូលទៅក្នុងរថយន្ត ហើយបានឈ្លោះជាមួយនាង និងបានវាយក្បាលនាង។ បន្ទាប់មកជនជាប់ចោទនៅបន្តវាយ និងចាក់ជនរងគ្រោះដោយកាំបិតចុងស្រួច ថែមទាំងកាប់ជនរងគ្រោះទៀតផង។
ប្រភពដដែល បានឱ្យដឹងទៀតថា ជនជាប់ចោទបានវះទារកចេញមុនពេលដុតសាកសពជនរងគ្រោះ ខណៈស្ត្រីរងគ្រោះត្រូវបានគេសន្និដ្ឋានថាមានផ្ទៃពោះប្រហែល៤ខែ។ នៅថ្ងៃបន្ទាប់ ជនជាប់ចោទបានត្រឡប់ទៅកន្លែងកើតហេតុវិញនៅចំការដូងប្រេងមួយកន្លែង ជាមួយនឹងធុងសាំង និងបំផ្លាញភស្តុតាងវត្ថុប្រើប្រាស់របស់ជនរងគ្រោះ ។
យោងតាមការស៊ើបអង្កេតបឋម សាកសពជនរងគ្រោះ ត្រូវបានគេសន្និដ្ឋានថា ត្រូវបាន ដុតបំផ្លាញចំនួន២លើកក្នុងគោលបំណងបំផ្លាញភស្តុតាង មុនពេលសាធារណជនប្រទះឃើញ ខណៈសពជនរងគ្រោះត្រូវបានភ្លើងឆេះអស់៦០ភាគរយ។ បើតាមការស្រាវជ្រាវរបស់សមត្ថកិច្ច ជនជាប់ចោទមិនមានប្រវត្តិបទឧក្រិដ្ឋទេ ហើយគូស្នេហ៍មួយគូនេះត្រូវបានគេជឿថាមានទំនាក់ទំនងជាមួយគ្នា១ឆ្នាំមុន។
គួរបញ្ជាក់ផងដែរថា ជនជាប់ចោទត្រូវបានចោទប្រកាន់នៅក្នុងតុលាការ Sungai Besar Magistrate នៅថ្ងៃទី១ ខែមិថុនា។ បើតាមមាត្រា ៣០២ នៃក្រមព្រហ្មទណ្ឌ គឺត្រូវអនុវត្តទោសប្រហារជីវិត ខណៈតុលាការនឹងកាត់សេចក្តីនៅថ្ងៃទី៣ ខែសីហា៕
