នៅវេលាម៉ោង៤រសៀល ថ្ងៃទី១៥ ខែឧសភា នេះ ក្រុមបាល់ទាត់ជម្រើសជាតិនារីកម្ពុជា ត្រូវប៉ះក្រុមជម្រើសជាតិនារីថៃ ដើម្បីស្វែងរកចំណាត់ថ្នាក់លេខ៣ នាព្រឹត្តិការណ៍ស៊ីហ្គេមលើកទី៣២ ឆ្នាំ២០២៣ នៅពហុកីឡដ្ឋានជាតិអូឡាំពិក។
ដើម្បីជាការលើកទឹកចិត្តដល់ក្រុមជម្រើសជាតិនារីកម្ពុជា បងប្អូនជនរួមជាតិកុំភ្លេចចូលរួមទស្សនាផ្ទាល់ឱ្យបានច្រើនកុះករជាការលើកទឹកចិត្តការបោះជំហានដ៏ល្អមួយសម្រាប់ក្រុមបាល់ទាត់ជម្រើសជាតិនារីកម្ពុជា។ ជាមួយគ្នានេះ សម្រាប់អ្នកចូលរួមទស្សនាផ្ទាល់អ្វីកុំភ្លេចភ្ជាប់ជាមួយទង់ជាតិខ្មែរ ក្រមា និង អាវក្រុមជម្រើសជាតិ ដើម្បីជាចលនាមួយលើកទឹកចិត្តភាពជាសាមគ្គី និងឆ្លុះបញ្ចាំងពីអត្តសញ្ញាណជាតិ។
ក្នុងជំនួបវគ្គសន្សំពិន្ទុកន្លងមក ក្រុមបាល់ទាត់នារីរបស់កម្ពុជាបានយកឈ្នះចំនួន២ប្រកួត និងចាញ់ចំនួន២ប្រកួត។ ក្នុងនោះរួមមានថ្ងៃបើកឆាកការប្រកួតដំបូងនាយប់ថ្ងៃទី៣ ខែឧសភា ឆ្នាំ២០២៣ នៅកីឡដ្ឋាន ស្មាត អ អេស អិន ក្រុមបាល់ទាត់នារីកម្ពុជា បានយកឈ្នះក្រុមជម្រើសជាតិឡាវ ក្នុងលទ្ធផល២ទល់០។ ការប្រកួតលើកទី២ ត្រូវប៉ះគ្នាជាមួយសង្ហិបុរី កម្ពុជាបានយកឈ្នះក្នុងលទ្ធផល ១ទល់០ កាលពីយប់ថ្ងៃទី៦ ខែឧសភា។
ការប្រកួតទី៣ ក្រុមជម្រើសជាតិកម្ពុជា បានចាញ់ក្រុមជម្រើសជាតិថៃក្នុងលទ្ធផល ៣ទល់០ នាយប់ថ្ងៃទី៩ ខែឧសភា និងការប្រកួតលើកទី៤ ចាញ់ក្រុមជម្រើសជាតិវៀតណាមក្នុងលទ្ធផល៤ទល់០ នាយប់ថ្ងៃទី១២ ខែឧសភា។
ដូច្នេះថ្ងៃនេះយើងរង់ចាំតាមដានទាំងអស់គ្នាតើក្រុមជម្រើសជាតិបាល់ទាត់នារីកម្ពុជាអាចសាងប្រវត្តិសាស្រ្តរបស់ខ្លួនជាបន្តទៀតឬយ៉ាងណា ខណៈការប្រកួតដែលអាចឈានដល់វគ្គនេះគឺជាប្រវត្តិសាស្រ្តរបស់ក្រុមជម្រើសជាតិនារីកម្ពុជាផងដែរ៕
