សហរដ្ឋអាមេរិក ៖ ប្រធានាធិបតីអាមេរិក លោក ចូ បៃដិន (Joe Biden) អាយុ៨០ឆ្នាំ បានប្រកាសជាផ្លូវការពីការសម្រេចចិត្តចូលរួមប្រកួតប្រជែងក្នុងការបោះឆ្នោតប្រធានាធិបតីអាមេរិកនៅឆ្នាំ២០២៤ ។ គេចាត់ទុកថា វាជាការស្ម័គ្រចិត្តធ្វើជាបេក្ខជនមេដឹកនាំកំពូលរបស់អាមេរិកនៅសម័យកាលទី២ របស់លោក ចូ បៃដិន ។
លោក ចូ បៃដិន បានថ្លែងថា នៅមានការងារជាច្រើនទៀតដែលលោកត្រូវធ្វើបន្ត ដើម្បីឱ្យពលរដ្ឋអាមេរិករស់នៅមានសេចក្តីសុខ ។ ប៉ុន្តែសំណួរសំខាន់របស់ពលរដ្ឋអាមេរិក គឺក្នុងរយៈពេលជាច្រើនឆ្នាំខាងមុខទៀត តើពលរដ្ឋអាមេរិកនឹងមានសិទ្ធិសេរីភាពកាន់តែច្រើន ឬធ្លាក់ចុះ ?
ការប្រកាសឈរឈ្មោះជាបេក្ខជនសម្រាប់ការបោះឆ្នោតប្រធានាធិបតីអាមេរិកនៅឆ្នាំ២០២៤ ជាផ្លូវការនេះ ភាគីជាច្រើនបានតាមដានស្ថានការណ៍ និងផ្តោតទៅលើអាយុរបស់លោក ចូ បៃដិន ។ បើលោក ចូ បៃដិន ទទួលបានជ័យជម្នះក្លាយជាប្រធានាធិបតីអាមេរិកក្នុងសម័យកាលទី២ បន្តទៀត គឺលោកនឹងមានអាយុ៨៦ឆ្នាំ នៅពេលបញ្ចប់អាណត្តិ ហើយវានឹងក្លាយជាកំណត់ត្រាប្រវត្តិសាស្ត្រសម្រាប់ប្រធានាធិបតីអាមេរិកដែលមានអាយុច្រើនបំផុត ។
វាជាស្ថានភាពមិនច្បាស់លាស់សម្រាប់លោក ចូ បៃដិន ដើម្បីរក្សាតំណែងប្រធានាធិបតីអាមេរិក ព្រោះការគាំទ្រឱ្យមេដឹកនាំអាមេរិករូបនេះឱ្យធ្វើជាប្រធានាធិបតីបន្តទៀត គឺមានសំឡេងមិនលើសពី៤០% ។ ចំណែកស្ថានការណ៍បច្ចុប្បន្ននៅអាមេរិក ក៏ប្រឈមនឹងបញ្ហាជាច្រើនជាបន្តបន្ទាប់ ដូចជា ការឆ្លងរាតត្បាតនៃជំងឺកូវីដ-១៩ និងអតិផរណាជាដើម ។ បើតាមការស្ទង់មតិជាច្រើនបង្ហាញថា អ្នកបញ្ចេញមតិភាគច្រើនមិនចង់ឱ្យលោក ចូ បៃដិន ឈរឈ្មោះជាបេក្ខជនប្រធានាធិបតីទៀតទេ ហើយសមាជិករបស់គណបក្សប្រជាធិបតេយ្យភាគច្រើន ក៏មិនចង់ឱ្យលោកឈរឈ្មោះដូចគ្នាដែរ ។
សារព័ត៌មាន NBC នៅអាមេរិកបានផ្សព្វផ្សាយលទ្ធផលស្ទង់មតិកាលពីថ្ងៃទី២៣ ខែមេសា កន្លងមក អំពីការឈរឈ្មោះជាប្រធានាធិបតីអាមេរិករបស់លោក ចូ បៃដិន ថា ពលរដ្ឋអាមេរិកចំនួន៧០% រួមទាំងអ្នកប្រជាធិបតេយ្យ៥១% យល់ឃើញថា លោក ចូ បៃដិន មិនគួរឈរឈ្មោះជាប្រធានាធិបតីអាមេរិកសម័យកាលទី២ បន្តទៀតទេ ៕ ប្រភព ៖ BTimes
