តើអ្វីទៅជា ខែរ៉ម៉ាឌន(Ramadan) ដែលជាការបួស ឬតមចំណីអាហារនៅក្នុងសាសនាឥស្លាម?

ខែរ៉ម៉ាឌន ឬប្រជាជនកម្ពុជានិយមហៅថាខែបួស របស់សាសនិកឥស្លាម បានចាប់ផ្តើមហើយនៅថ្ងៃទី២៣ ខែមីនា ឆ្នាំ២០២៣ ដោយនេះគឺជាកាតព្វកិច្ចរបស់សាសនិកឥស្លាម នៅទូទាំងពិភពលោកមានលក្ខណៈដូចគ្នាទាំងអស់ ព្រោះការបួសនេះជាកាតព្វកិច្ចទី៤ នៅក្នុងមូលដ្ឋានគ្រឹះទាំង៥ របស់សាសនាឥស្លាម។ ចូលដល់ខែនេះសាសនិកឥស្លាម ចាប់ផ្ដើមអនុវត្តកាតព្វកិច្ចចតមអាហារពេលថ្ងៃសូម្បីតែទឹក ចាប់ពីថ្ងៃរះរហូតដល់ថ្ងៃលិច និងរួមភេទ ក្នុងរយៈពេល១ខែ ដោយមិនគិតអំពីអ្នកមាន អ្នកក្រ ឬអ្នកមានអំណាចបុណ្យស័ក្ដិនោះទេ។ មិនត្រឹមតែបំពេញកាតព្វកិច្ចបួសនេះទេ សាសនិកឥស្លាមក៏ត្រូវបំពេញនៅភារកិច្ចជាច្រើនទៀតដូចជាការសូត្រធម៌ ការបរិច្ចាគទានដល់ជនក្រីក្រ និងការផ្តល់ចំណីអាហារឱ្យអ្នកបួសជាដើម។សាសនិកឥស្លាមជឿថាខែរ៉ម៉ាឌន គឺខែដ៏ពិសិដ្ឋដោយមានជំនឿថា ការអនុវត្តតាមការចង្អុលបង្ហាញតាមក្បួនច្បាប់ ដែលមានចែងនៅក្នុងគម្ពីរអាល់គួរអាន (AlQuran) ឬ ទង្វើល្អនៅក្នុងខែនេះ នឹងទទួលបាននូវការតបស្នងផលបុណ្យដ៏ធំធេងពី អល់ឡោះជាម្ចាស់ និងបង្ហាញភាពស្មោះស្ម័គ្ររបស់ខ្លួន ព្រមទាំងដើម្បីយល់ដឹងពីរសជាតិនៃការអត់ឃ្លាន និងការផ្សារភ្ជាប់សុខទុក្ខគ្នារវាងអ្នកមាននិងអ្នកក្រផងដែរ។

ដ្បិតថាខែនេះ អ្នកកាន់សាសនាឥស្លាម ត្រូវតមចំណីអាហារនៅពេលថ្ងៃក៏ពិតមែនប៉ុន្តែ អាល់ឡោះ ក៏បានដាក់លក្ខខណ្ឌមួយចំនួនចំពោះអ្នកដែលបួសគឺត្រូវតែជាសាសនិកឥស្លាម ប្រុសស្រី ពេញវ័យគ្រប់ការ មានកម្លាំងពេញអាចចាប់ពីអាយុ១៥ឆ្នាំឡើងទៅ និងមានសតិបញ្ញាគ្រប់គ្រាន់ ពុំមែនជាមនុស្សវិកលចរិត មានមនសិការសម្បជញ្ញៈក្នុងការអនុវត្តកាតព្វកិច្ចកាន់អំណត់បួស។ ក្នុងករណីសម្រាប់អ្នកមានជំងឺ អ្នកធ្វើដំណើរតាមផ្លូវឆ្ងាយ នារីពពោះ ឬមានរដូវ នារីបំបៅកូនជាដើម អាចមានសិទ្ធិមិនបួសបាន តាមហេតុការណ៍កើតឡើងជាក់ស្ដែង តែត្រូវសងវិញនៅខែបន្ទាប់ ឬនៅពេលមានលទ្ធភាព។ រីឯអ្នកចាស់ជរាមិនអាចបួសបានតែម្ដងត្រូវ ផ្ដល់អំណោយទាន ដល់អ្នកក្រីក្រ ក្នុងមួយថ្ងៃ អង្ករកន្លះគីឡូ នារយៈពេលមួយខែពេញ នៃខែរ៉ាម៉ាឌន៕