ខេត្តតនគិរី៖ សាមណេរទ្រុស្ដសីលមួយ ទើបមកគង់នៅក្នុងវត្តបានរយៈពេល២យប់ បែរជាមានគំនិតអាក្រក់លួចព្រះពុទ្ធបដិមាមួយអង្គ ក៏ត្រូវមន្ត្រីសង្ឃចាប់ផ្សឹក កាលពីវេលាម៉ោង៦ និង១១នាទីល្ងាច ថ្ងៃទី៩ ខែឧសភា នៅក្នុងវត្តមួយ ស្ថិតក្នុងភូមិវើនសៃ ឃុំវើនសៃ ស្រុកវើនសៃ។
ប្រភពព័ត៌មានពីអ្នកភូមិវើនសៃ បានឲ្យដឹងថា កាលពី២ថ្ងៃមុននេះ សាមណេរទុ្រស្ដសីលខាងលើ បានមកគង់នៅក្នុងវត្តមួយ នៅក្នុងភូមិកើតហេតុខាងលើ។ បន្ទាប់ពីគង់នៅក្នុងវត្តបានរយៈពេល២ថ្ងៃ សាមណេរអង្គនោះបានឃើញព្រះពុទ្ធបដិមាដែលធ្វើពីស្ពាន់មានទម្ងន់៣៦គីឡូក្រាម តម្កល់នៅក្នុងកុដិព្រះចៅអធិការ ក៏បែកគំនិតអាក្រក់ លួចយកព្រះពុទ្ធបដិមានោះ។ ប៉ុន្តែអំពើដ៏អាក្រក់ ព្រះមិនជួយ បែកការដឹងដល់ព្រះចៅអធិការវត្ត អាចារ្យ និងគណៈកម្មការវត្ត បានប្ដឹងទៅមន្ត្រីសង្ឃស្រុក ក៏ចាប់ផ្សឹកតែម្ដង។
មន្ត្រីនគរបាលស្រុកវើនសៃ បានឲ្យដឹងថា សាមណេរទុ្រស្ដសីលដែលមន្រ្ដីសង្ឃចាប់ផ្សឹក ហើយប្រគល់ឲ្យសមត្ថកិច្ចចាត់ការតាមច្បាប់នោះ ព្រះនាម ឡុង សុខន ព្រះជន្ម៣២វស្សា មានស្រុកកំណើតនៅភូមិតាលន់ ឃុំស្លាម៉ាត ស្រុកស្អាង ខេត្តកណ្តាល។
មន្ត្រីនគរបាលដដែល បានបន្តថា បើតាមចម្លើយរបស់អន្ទិតដែលត្រូវចាប់ផ្សឹកនោះ បានសារភាពថា ខ្លួនពិតជាបានលួចព្រះពុទ្ធរូបមួយអង្គ ធ្វើពីស្ពាន់ទម្ងន់ប្រហែល៣៦គីឡូក្រាម យកទៅលាក់ទុកនៅក្នុងរោងទូកង មុខវត្ត ក្បែរមាត់ទន្លេ។ ប៉ុន្តែរឿងហ្នឹងក៏បែកការដឹងដល់ព្រះចៅអធិការ និងអាចារ្យវត្ត ទើបចាប់ផ្សឹករូបគេតែម្ដង៕
