ភ្នំពេញ៖ បុរសម្នាក់បាននាំស្រីស្នេហ៍មករកស៊ីចែកចាយ និងសេពថ្នាំញៀន ក៏ត្រូវសមត្ថកិច្ចចុះទៅក្របួចក ដល់ក្នុងបន្ទប់ បង្កឲ្យភ្ញាក់ផ្អើលឡើង កាលពីវេលាម៉ោង១ និង៣០នាទីរសៀល ថ្ងៃទី១០ ខែធ្នូ ឆ្នាំ២០១៧ នៅក្នុងភូមិសំបួរ សង្កាត់ដង្កោ ខណ្ឌដង្កោ។
លោកវរសេនីយ៍ឯក ជឹម ស៊ីថា អធិការនគរបាលខណ្ឌ បានឲ្យដឹងថា ជនសង័្សយដែលសមត្ថកិច្ចឃាត់ខ្លួន ទី១-ឈ្មោះ ចេង ចន្ដា ភេទស្រី អាយុ៣២ឆ្នាំ និងទី២-ឈ្មោះ ទៀង ជាតិ ភេទប្រុស អាយុ២៥ឆ្នាំ។ ពួកគេទាំង២នាក់ គឺជាគូសង្សារនឹងគ្នា ហើយបានរស់នៅជាមួយគ្នា ក្រោមដំបូលផ្ទះជួលតែមួយ។ ក្នុងការឃាត់ខ្លួនជនសង័្សយម្នាក់នេះ សមត្ថកិច្ចដកហូតបាននូវវត្ថុតាងមួយចំនួន រួមមាន ថ្នាំញៀចំនួន២៤កញ្ចប់ ក្នុងនោះកញ្ចប់ធំល្មម១កញ្ចប់ និងកញ្ចប់តូចចំនួន២៣កញ្ចប់ ថង់សម្រាប់ច្រកគ្រឿងញៀនមួយចំនួន និងសម្ភារសេពថ្នាំញៀនមួយចំនួនទៀត។
លោកអធិការនគរបាលខណ្ឌដង្កោ បានឲ្យដឹងថា មុនពេលឃាត់ខ្លួនជនសង្ស័យទាំង២នាក់នោះ កម្លាំងនគរបាលផ្នែកប្រឆាំងគ្រឿងញៀន នៃអធិការដ្ឋាននគរបាលខណ្ឌដង្កោ បានចុះស្រាវជ្រាវ រហូតកំណត់បានមុខសញ្ញាជនជួញដូរគ្រឿងញៀនទាំងពីរនាក់នេះ។ លុះមកដល់ថ្ងៃកើតហេតុ លោកបានដឹកនាំកម្លាំងសមត្ថកិច្ច ចុះទៅចាប់ខ្លួនជនសង័្សយទាំង២នាក់។
ក្រោយពេលឃាត់ខ្លួនរួច សមត្ថកិច្ចបាននាំខ្លួនជនសង្ស័យទាំង២នាក់ និងវត្ថុតាង ទៅកាន់អធិការដ្ឋាននគរបាលខណ្ឌ ដើម្បីសាកសួរ និងចាត់ការតាមនីតិវិធី៕
