ខេត្តរតនគិរី៖ បុរស និងស្ដ្រី២នាក់ សុទ្ធតែមានប្ដី និងប្រពន្ធរៀងៗខ្លួនហើយ បែរជាលួចបង្កើតល្បែងស្នេហាលួចលាក់ស្ងាត់ៗ ហើយលួចសកម្មភាពប្រតិបត្តិការរបស់ពួកគេ យកមកគំរាមទារប្រាក់ពីស្ដ្រីជាគូស្នេហ៍ ក៏ត្រូវសមត្ថកិច្ចឃាត់ខ្លួន កាលពីវេលាម៉ោង១២ និង៣០នាទីរសៀល ថ្ងៃទី៦ ខែធ្នូ ឆ្នាំ២០១៧ នៅក្នុងភូមិដែស ឃុំបខាំ ស្រុកអូរយ៉ាដាវ។
លោក ម៉ៅ សាន់ អធិការនគរបាលស្រុកអូរយ៉ាដាវ បានឱ្យដឹងថា ជនសង្ស័យដែលសមត្ថកិច្ច ឈ្មោះម៉ាត់ អារី អាយុ៣៤ឆ្នាំ ជនជាតិខ្មែរ-អ៊ិស្លាម មុខរបរជាកម្មករ មានលំនៅក្នុងភូមិដែស ឃុំបខាំ ស្រុកអូរយ៉ាដាវ ខេត្តរតនគិរី។ រីឯស្រ្ដីរងគ្រោះ ឈ្មោះ ក រ អាយុ២៨ឆ្នាំ ជនជាតិខ្មែរ-អ៊ិស្លាមដូចគ្នា មានមុខរបរជាស្ត្រីមេផ្ទះ។
ប្រភពព័ត៌មាន បានឲ្យដឹងថា ជនសង្ស័យ និងជនរងគ្រោះ សុទ្ធតែមានប្ដីប្រពន្ធ និងកូនរៀងៗខ្លួន ប៉ុន្តែពួកគេនៅតែលួចលាក់ទាក់ទង លេងល្បែងស្នេហានឹងគ្នា។ លុះមកដល់មួយរយៈចុងក្រោយនេះ ជនរងគ្រោះទំនងជាខ្លាចបែកការរឿងអាស្រូវនេះ ដឹងដល់ប្ដី និងសាច់ញាតិ នាំឲ្យខ្មាសគេ ក៏ឈប់ទាក់ទងជាមួយនឹងជនសង្ស័យជាប្រុសស្នេហ៍។
ចាប់តាំងពីពេលនោះមក ជនសង្ស័យក៏បានគំរាមទៅស្ត្រីរងគ្រោះថា ខ្លួនមានរូបភាពវីដេអូរឿងអាស្រូវរបស់ពួកគេដែលបានប្រព្រឹត្តកន្លងមក ហើយត្រៀមនឹងបង្ហោះតាមបណ្ដាញសង្គមហ្វេសប៊ុក។ ប៉ុន្តែស្ត្រីរងគ្រោះក៏បានប្រាប់ទៅជនសង្ស័យវិញថា «បើមានវីដេអូមែន សូមកុំបង្ហោះអី។ ឮបែបនេះ ជនសង្ស័យរឹតតែបានដៃ ក៏បានទារប្រាក់ ចំនួន១ពាន់ដុល្លារសហរដ្ឋអាមេរិក ពីស្ត្រីរងគ្រោះ ហើយគំរាមថា បើមិនឱ្យទេ គេនឹងយកវីដេអូនេះទៅបង្ហោះភ្លាម។
ប្រភពព័ត៌មានដដែល បានបន្តថា ដាយសារមានការភ័យខ្លាចមានរឿងអាស្រូវផង ស្ត្រីរងគ្រោះបានយកប្រាក់ ទៅដាក់តាមវីងទៅឱ្យជនសង្ស័យ រួចហើយក៏ប្ដឹងទៅសមត្ថកិច្ច។ បន្ទាប់ពីទទួលបានពាក្យបណ្ដឹង ទើបកម្លាំងបានរាយការណ៍ទៅលោកស្នងការ ក៏បញ្ជាឲ្យសមត្ថកិច្ចពាក់ព័ន្ធចុះទៅឃាត់ខ្លួនតែម្ដង។
ក្រោយពេលឃាត់ខ្លួនរួចមក សមត្ថកិច្ចបានឃាត់ខ្លួនជនសង្ស័យ បញ្ជូនទៅកាន់អធិការដ្ឋាននគរបាល ដើម្បីសាកសួរ និងកសាងសំណុំរឿងចាត់ការ តាមនីតិវិធី៕
