ខេត្តព្រះសីហនុ៖ បន្ទាប់ពីមានព័ត៌មានបុរសម្នាក់បានបង្កហិង្សា និងប៉ុនប៉ងរំលោភលើនារីរងគ្រោះ ហើយរត់គេចខ្លួនអស់រយៈពេល៧ឆ្នាំ ទើបអស់លក្ខណ៍ ត្រូវសមត្ថកិច្ចឃាត់ខ្លួនបាន កាលពីវេលាម៉ោង១ និង១៥នាទីរសៀល ថ្ងៃទី៨ ខែធ្នូ ឆ្នាំ២០១៧ នៅក្នុងស្រុកព្រៃនប់ ស្រាប់តែមុននេះ ភរិយា(សុំមិនបង្ហាញឈ្មោះ)របស់បុរសខាងលើ បានចេញមុខអះអាងថា នេះជារឿងអយុត្តិធម៌មួយសម្រាប់គ្រួសាររបស់គាត់ ។
បើតាមលោកវរសេនីយ៍ត្រី ហួ យ៉ៃ អធិការរងនគរបាលស្រុកព្រៃនប់ ទទួលបន្ទុកការងារព្រហ្មទណ្ឌ បានឲ្យដឹងថា ជនជាប់ចោទដែលសមត្ថកិច្ចឃាត់ខ្លួន ឈ្មោះ បាន គល់ថុល ភេទប្រុស អាយុ២៩ឆ្នាំ រស់នៅភូមិតានៃ ឃុំតានៃ ស្រុកព្រៃនប់ ខេត្តព្រះសីហនុ។ រីឯការឃាត់ខ្លួនជនជាប់ចោទម្នាក់នេះ គឺសមត្ថកិច្ច ធ្វើឡើងតាមដីកាបង្គាប់ឲ្យចាប់ខ្លួន លេខ១៦៤៣ តព២០១២ ចុះថ្ងៃទី២០ ខែសីហា ឆ្នាំ២០១២ ចេញដោយលោកចៅក្រមស៊ើបសួរ នៃសាលាដំបូងខេត្តព្រះសីហនុ បានចោទប្រកាន់ជននេះ ពីបទហិង្សា ដោយចេតនា និងប៉ុនប៉ងរំលោភសេពសន្ថវៈ ដែលបានប្រព្រឹត្ត កាលពីថ្ងៃទី៨ ខែសីហា ឆ្នាំ២០១០ នៅក្នុងភូមិវាលមាស ឃុំវាលរេញ ស្រុកព្រៃនប់ ខេត្តព្រះសីហនុ។
ទាក់ទងជាមួយគ្នានេះ ភរិយារបស់បុរសឈ្មោះ បាន គល់ថុល បានចេញមុខអះអាងថា រឿងរាវពិតគឺប្ដីរបស់គាត់រូបនេះ មិនបានដឹងរឿងអ្វីឡើយ ដោយមុនកើតហេតុ កាលពីថ្ងៃទី៨ ខែសីហា ឆ្នាំ២០១០ ប្ដីរបស់គាត់ និងមិត្តភក្ដិបាននាំគ្នាទៅផឹកស៊ី នៅហាងកើតហេតុ ហើយខណៈនោះមិត្តភក្ដិប្ដីរបស់គាត់ម្នាក់(មិនបង្ហាញឈ្មោះ) បានញ៉ែញ៉ងនារីបម្រើការក្នុងហាង (នារីដែលចោទថា ត្រូវបានបុរសឈ្មោះ បាន គល់ថុល ប៉ុនប៉ងរំលោភ) ហើយឃើញដូចនេះ ឈ្មោះ បាន គល់ថុល បានហៅមិត្តភក្ដិរបស់ខ្លួនចេញក្រៅ ស្រាប់តែមានបុរសម្នាក់ទៀតឈ្មោះ ផេង នាង អាយុ ១៩ឆ្នាំ មុខរបរចាក់ឌីស ក្នុងហាងកើតហេតុ ប្រហែលជាកើតចិត្តប្រចណ្ឌ ក៏បានស្ទុះមកកាប់ត្រូវឈ្មោះ បាន គល់ថុល ផុងលលាដ៏ក្បាលរបួសធ្ងន់ បន្ទាប់ក៏បានបងញ្ជូនទៅព្យាបាលនៅប្រទេសវៀតណាម ។
ស្ត្រីដដែលបន្តថា បន្ទាប់មកទៀត គ្រួសារបស់គាត់ ក៏បានដាក់ពាក្យបណ្ដឹងទៅកាន់ឈ្មោះ ផេង នាង ហើយក៏មានការសម្រុះសម្រួលគ្នា ដោយភាគីឈ្មោះ ផេង នាង បង់លុយចំនួន ២ពាន់ដុល្លារដើម្បីបញ្ចប់រឿង ។ បន្ទាប់មកទៀត រឿងរាវនៅមិនទាន់ចប់នៅឡើយទេ ខណៈដែលក្រុមគ្រួសាររបស់គាត់ បាននាំឈ្មោះ បាន គល់ថុល ទៅសម្រាកព្យាបាលនៅប្រទេសវៀតណាម ស្រាប់តែឈ្មោះ ផេង នាង ភ័យខ្លាចជនរងគ្រោះដែលខ្លួនកាប់នោះស្លាប់ ក៏បានពឹងឱ្យនារីបម្រើការក្នុងហាងកើតហេតុខាងលើ ដាក់ពាក្យបណ្ដឹងចោទថា ឈ្មោះ បាន គល់ថុល ប៉ុនប៉ងរំលោភនាង ហើយរត់គេចខ្លួន ក្នុងន័យចង់សម្រាលទោស ។
នារីភរិយាឈ្មោះ បាន គល់ថុល បានបញ្ជាក់ថា ក្រុមគ្រួសាររបស់នាង គ្មានអ្នកណាម្នាក់ដឹងថា មានពាក្យបណ្ដឹងពីនារីបម្រើការក្នុងហាងឡើង ហើយក៏មិនបានដឹងថា មានដីកាកោះហៅដែរ ព្រោះពួកគាត់រវល់តែព្យាបាលជំងឺជនរងគ្រោះ នៅប្រទេសវៀតណាម ដូចនេះគាត់គ្មានពេលមកបំភ្លឺរឿងក្ដីនោះឡើយ ដូចនេះហើយទើបឈ្មោះ បាន គល់ថុល ក្លាយខ្លួនជាជនជាប់ចោទនៅក្នុងករណីនេះ ៕