ខេត្តរតនគិរី៖ សមត្ថកិច្ចចម្រុះខេត្តរតនគិរី បានចុះត្រួតពិនិត្យបន្ទប់ជួលរបស់ជនជាតិចិន២នាក់ ដោយរឹបអូសបានឫសឈើ មានទម្ងន់៩៧គីឡូក្រាម កាលពីវេលាម៉ោង៨ព្រឹក ថ្ងៃទី៨ ខែធ្នូ ឆ្នាំ២០១៧ ស្ថិតនៅក្នុងភូមិគ្លិះ ឃុំស៊ើង ស្រុបកែវ ។
មន្ត្រីនគរបាលខេត្តរតនគិរី បានឲ្យដឹងថា ជនជាតិចិនដែលសមត្ថកិច្ចឃាត់ខ្លួន រួមមាន ទី១-ឈ្មោះ ហ័ង អ៊ីហ្វីង ភេទប្រុស ជនជាតិចិន ទី២-ឈ្មោះ វ៉ៃ ហានមិ ភេទប្រុស ជនជាតិចិន និងទី៣-ឈ្មោះ រ៉ា វីរិទ្ធិយ៉ាស់ ភេទស្រី ជនជាតិខ្មែរអ៊ិស្លាម (ប្រពន្ធរបស់ឈ្មោះ វ៉ៃ ហានមិ)។ ការចុះត្រួតពិនិត្យនោះ មានការចូលរួមពីកម្លាំងការិយាល័យប្រឆាំងបទល្មើសេដ្ឋកិច្ច និងការិយាល័យប្រឆាំងគ្រឿញៀនខេត្ត និងមន្ទីរសុខាភិបាលខេត្ត ក្រោមការសម្របសម្រួលពីលោក រ៉ា បួវ៉ាន់ឌី ព្រះរាជអាជ្ញារងសាលាដំបូងខេត្តរតនគិរី។
មន្ត្រីនគរបាលដដែល បានបន្តថា មុនពេលកើតហេតុ សមត្ថកិច្ចបានទទួលព័ត៌មានពីប្រជាពលរដ្ឋពីការស្នាក់នៅរបស់ជនបរទេស ដោយខុសច្បាប់ នៅក្នុងទីតាំងខាងលើ ។ បន្ទាប់ពីមានសេចក្ដីរាយការណ៍បែបនេះភ្លាម សមត្ថកិច្ចក៏ចុះទៅត្រួតពិនិត្យ និងឆែកឆេរ រកឃើញជនជាតិចិន២នាក់ ក្នុងនោះមានបុរសចិនម្នាក់ មានយកប្រពន្ធជាជនជាតិខ្មែរអ៊ិស្លាម។ ក្រៅពីឃាត់ខ្លួនជនបរទេសទាំង២នាក់នេះ សមត្ថកិច្ចចម្រុះក៏រកឃើញមើម និងឫសឈើចំនួន៣ការុង មានទម្ងន់ប្រហែល៩០គីឡូក្រាម ដែលមិនអាចកំណត់បានថា ជាឱសថបុរាណ ឬអ្វីឲ្យពិតប្រាកដ។
បើតាមសម្ដីរបស់បុរសចិនទាំងនេះ បានប្រាប់សមត្ថកិច្ចថា មើមឈើ(រុក្ខជាតិមើមដូងព្រៃ)ទាំងនេះ គឺពួកគេបានប្រមូលទិញពីប្រជាពលរដ្ឋ រស់នៅក្នុងភូមិ ដោយទម្ងន់១គីឡូក្រាម មានតម្លៃ១ដុល្លារ។ រីឯមើមដូងព្រៃទាំងនោះ គឺពួកគេមានបំណងយកទៅកែច្នៃ ជាឱសថកែសម្ផស្សស្ត្រី ពីខ្មៅទៅស។
មន្រ្ដីនគរបាលដដែល បានបន្តថា នៅបន្ទប់ជួលរបស់ជនជាតិចិនខាងលើនេះ កំពុងតែដំឡើងរោង១សម្រាប់ធ្វើឡចំហុយរុក្ខជាតិទាំងអស់នេះ ដើម្បីនាំទៅលក់នៅក្នុងប្រទេសចិន។ បច្ចុប្បន្ន សមត្ថកិច្ចកំពុងតែសាកសួរព័ត៌មានបន្ថែម នៅស្នងការដ្ឋាននគរបាលខេត្ត ហើយវត្ថុតាងជាមើមរុក្ខជាតិដែលជនជាតិចិនទិញនោះ គឺមន្រ្ដីមន្ទីរសុខាភិបាលខេត្ត និងការិយាល័យគ្រឿងញៀន កំពុងបញ្ជូនទៅថ្នាក់លើ ដើម្បីពិសោធ។
ក្រោយពេលឃាត់ខ្លួនរួមមក សមត្ថកិច្ចបាននាំខ្លួនជនបរទេសទាំង២នាក់នេះ និងវត្ថុតាង ទៅកាន់ស្នងការដ្ឋាននគរបាលខេត្ត ដើម្បីចាត់ការតាមនីតិវិធី។ ម្យ៉ាងទៀត សមត្ថកិច្ចក៏មិនទាន់ដឹងថា រុក្ខជាតិទាំងអស់នេះ ជាសារធាតុញៀនឬយ៉ាងនោះដែរ៕
