ភ្នំពេញ៖ បុរសជាកម្មករសំណង់ម្នាក់ បានសម្រេចចិត្តចងក សម្លាប់ខ្លួនចោលគូដណ្តឹង និងឪពុកម្តាយបងប្អូន ដោយសរសេរលិខិតបណ្តាំសុំទោស ឪពុកម្តាយបង្កើត និងឪពុកម្តាយ ចិញ្ចឹម ហើយពឹងឱ្យប្អូន ជួយមើលគូដណ្តឹងរបស់គេផង ដែលហេតុការណ៍នេះ បង្កឱ្យមានការភ្ញាក់ផ្អើល កាលពីវេលាម៉ោង ៧ព្រឹក ថ្ងៃទី០៧ ខែមិថុនា ឆ្នាំ២០១៧ នៅក្នុងការដ្ឋានសំណង់ ស្ថិតនៅភូមិព្រែកតានូ១ សង្កាត់ចាក់អង្រែលើ ខណ្ឌមានជ័យ ។
សពបុរសចងកមានឈ្មោះ វឿន ចឺត ភេទប្រុស អាយុ ២៧ឆ្នាំ មុខរបរកម្មករសំណង់ ស្នាក់នៅការដ្ឋានកើតហេតុខាងលើមានស្រុកកំណើតនៅភូមិពោធិ៍ពាត់ ឃុំជីផុច ស្រុកមេសាង ខេត្តព្រៃវែង ចងកនៅចំរឹងបង្អួចអាគារជាន់ទី២ ។
តាមសម្តីបុរសម្នាក់មានឈ្មោះ នឹម សានី ភេទប្រុស អាយុ ២៨ឆ្នាំ មុខរបរកម្មករសំណង់ ស្នាក់នៅបន្ទប់ជួលភូមិត្នោតជ្រុំ សង្កាត់បឹងទំពុន ខណ្ឌមានជ័យ មានស្រុកកំណើត នៅស្រុកស្វាយជ្រុំ ខេត្តស្វាយរៀង បានប្រាប់សមត្ថកិច្ចថា មុនកើតហេតុ គាត់ឡើងទៅការដ្ឋានសំណង់ ស្រាប់តែប្រទះឃើញសពបុរសម្នាក់ ចងកសម្លាប់ខ្លួន រួចក៏ដើរទៅមើលអោយជិត តើជាអ្នកណា ពេលដើរទៅមើលស្គាល់ថា ជាអ្នកធ្វើការជាមួយគ្នា ក៏រត់ចុះទៅហៅអោយគេជួយ ប៉ុន្តែពេលកម្មករមកមើល ទើបដឹងថាស្លាប់បាត់ទៅហើយ ក៏ប្ដឹងសមត្ថកិច្ចនគរបាលខណ្ឌ ចុះមកធ្វើកោសល្យវិច្ច័យ ហើយក៏មិនមានអ្នកណា ហ៊ានប៉ះពាល់សពដែរ ។
បុរសខាងលើបានយកខ្សែចងក នឹងចំរឹងបង្អួច ដោយឡើងជាន់លើធុងស្ពេចត្រូ ចងកសម្លាប់ខ្លួន ហើយបន្សល់ទុកលិខិត បណ្តាំចំនួន៣សន្លឹក ដោយក្នុងនោះមានអត្ថន័យដូចតទៅ៖
«ម៉ែពុកកូនមិនបាននៅសងគុណ អ្នកទាំងពីរទេ ចាំជាតិក្រោយ ចាំកូនសងគុណអ្នកទាំងពីរ ទាំងម៉ែចិញ្ចឹម ម៉ែបង្កើត និងឪពុកបង្កើត ឪពុកចិញ្ចឹម កូននឹងសន្យាថា កូនកើតមួយជាតិទៀត កូននឹងមិនធ្វើដូចជាតិនេះទេ ទោះបីជាជាតិនេះ កូនធ្វើឲ្យពុកម៉ែទាំង៤ មិនសប្បាយចិត្តក៏ដោយសារកូន ប៉ុន្តែកូនធ្វើនេះ ក៏ដោយទាំងបង្ខំចិត្តដែរ ពុកម៉ែនឹងអាចយល់ ពីអ្វីទាំងអស់ដែលកូនបានធ្វើនេះ គឺជាសេចក្តីដែលកូនធ្វើ ជាលើកចុងក្រោយ ដែលពុកម៉ែទាំង៤ ទាំងម៉ែបង្កើត ម៉ែចិញ្ចឹម ឪពុកបង្កើត និង ឪពុកចិញ្ចឹម ។ នៅពេលនេះ កូនសរសេរជាលើកចុងក្រោយ សម្រាប់កូនមួយនេះ ដែលធ្វើឱ្យពុកម៉ែទាំង៤ មិនសប្បាយចិត្ត កូនដឹងថា កូនធ្វើទៅនេះសង្ឃឹមថា ពុកម៉ែទាំង៤មិនយកទោសកូន កូននឹក អ្នកទាំង៤ណាស់ ប៉ុន្តែកូនមិនអាចជួបអ្នកទាំង២ទេ គឺកូនខ្មាសអ្នកទាំងពីរណាស់ ខ្ញុំសូម អរគុណអ្នកម៉ែ និងលោកពុកទាំងពីរ បានចិញ្ចឹមខ្ញុំតាំងពីតូចមក ប៉ុន្តែកូនមិនបាននៅចិញ្ចឹម អ្នកទាំងពីរវិញ ។
យាយតា ខ្ញុំចង់ប្រាប់ថា ខ្ញុំនឹកអ្នកទាំងពីរណាស់ ខ្ញុំស្រឡាញ់យាយតាស្មើនឹងឪពុកម្តាយខ្ញុំដែរ ខ្ញុំសង្ឃឹមថាយាយតា នឹងមិនយកទោសចៅម្នាក់នេះទេ ។
ម៉ែពុកកូនទៅហើយ អ៊ុំសឿន អ៊ុំសុង អ៊ុំសៀន អ៊ុំស៊ាត អ៊ុំអូន អ៊ុំសុខ អ៊ុំឃោ និងអ៊ុំផូ ប្អូនជាទីស្រឡាញ់ ២នាក់ផងដែរ ។ ប្អូនពិសី និងប្អូនភក្តីបងទៅហើយប្អូន បងទៅរកភពថ្មីហើយប្អូន ។
ប្អូនពិសីបងពឹងប្អូនរឿងមួយ បងចង់ឱ្យប្អូនជួយមើលគូដណ្តឹងបងផងបានទេប្អូន ?
ពុកម៉ែ យាយតា ប្អូនទាំងពីរ បងនឹកប្អូនខ្លាំងណាស់ តែបងធ្វើទៅនេះធ្វើដោយបង្ខំចិត្តទេ ប្អូនទាំងពីរ ។ អាជុក អាឃន់ អាម៉ា ចែម៉ៅ ចែអាម ពូទៀង ខ្ញុំនឹកអ្នកទាំងអស់គ្នាណាស់បាទ ។ អាថង ខ្ញុំនឹកឯងណាស់» ។
ក្រោយពេលកើតហេតុ សមត្ថកិច្ចនគរបាលស្នងការ រាជធានីភ្នំពេញ ផ្នែកជំនាញកោសល្យ បានចុះមកត្រួតពិនិត្យបន្ទប់ឃើញថា បុរសជាកម្មករសំណង់ គឺចងកសម្លាប់ខ្លួនឯង នៅលើចំរឹងបង្អួចនិងយកធុងស្ពេចត្រូ មកកល់ពីក្រោមជើង ហើយយកខ្សែគោ មកចងនិងចំរឹងបង្អួច រួចធាក់ធុងជ័រចេញ ទើបខ្សែររឹតកស្លាប់តែម្ដង ។ សពបានប្រគល់ឱ្យលោក យ៉ុន វឿន ភេទប្រុស អាយុ ៣៧ឆ្នាំ ដើម្បីយកទៅស្រុកកំណើត ធ្វើបុណ្យតាមប្រពៃណី ៕
សហការី KBN-LIVE.com
