សិល្បៈ ៖ មរណភាពលោក អ៊ិត សេដ្ឋា បានបន្សល់ទុកនូវការរំជួលចិត្តជាខ្លាំង ព្រោះការបាត់បង់រូបលោកបានបន្សល់ទុកកូនកំព្រាបីនាក់ និងម្ដាយចាស់ជរាម្នាក់គ្មានទីពឹង។ តែស្របពេលដែលកូនៗរបស់លោកកំពុងជួបទុក្ខសោកនេះដែរ ពួកគេមិនត្រឹមតែមានការលើកទឹកចិត្តពីអ្នកនៅជុំវិញខ្លួនទេ គឺមានទាំងនាយករដ្ឋមន្ត្រី រដ្ឋមន្ត្រី និងឧកញ៉ាកំពូលៗជាច្រើនរូបបានសន្យាជួយកូន និងម្ដាយលោក។
១. សម្ដេចតេជោ ហ៊ុន សែន
សម្ដេចតេជោ ហ៊ុន សែន នាយករដ្ឋមន្ត្រី និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានបរិច្ចាគថវិកាផ្ទាល់ខ្លួនជូនដល់កូនទាំង៣របស់លោក អុិត សេដ្ឋា ចំនួន១ម៉ឺនដុល្លារ ដើម្បីជួយផ្គត់ផ្គង់ និងរំលែកទុក្ខលំបាកដល់គ្រួសារលោក។
២. ឯកឧត្តម ខៀវ កញារិទ្ធិ
ឯកឧត្តម ខៀវ កញារិទ្ធិ រដ្ឋមន្ត្រី ក្រសួងព័ត៌មាន បានបញ្ជាក់នៅក្នុងពិធីបុណ្យសពលោក អុិត សេដ្ឋា ថា លោកសន្យាថានឹងជួយអោយអស់ពីលទ្ធភាព ដើម្បីឱ្យកូនប្រុសស្រីរបស់លោក អ៊ិត សេដ្ឋា បានរៀនចប់ចុងចប់ដើម និងសន្យារកការងារឱ្យកូនស្រីច្បង ធ្វើក្រោយពេលរៀនចប់ ដើម្បីមានប្រាក់ចំណូលចិញ្ចឹមជិតផងដែរ។
៣. អ្នកឧកញ៉ា គិត ម៉េង
ចំពោះពិធីបុណ្យសព និងពិធីបុណ្យប្រាំពីរថ្ងៃអ្នកឧកញ៉ា គិត ម៉េង ជាអ្នកទទួលបន្ទុក រាល់ការចំណាយនៅក្នុងពិធីបុណ្យសពរបស់លោក អុិត សេដ្ឋា ទាំងស្រុង ។
៤. ឯកឧត្ដមបណ្ឌិតឧកញ៉ា ម៉ុង ឫទ្ធី
ឧកញ៉ា ម៉ុង ឫទ្ធី បានប្រកាសមុនគេ ដោយលោកបានបញ្ជាក់ថា លោកនឹងផ្ដល់ផ្ទះមួយខ្នងទៅដល់ ក្រុមគ្រួសារសព លោក អុិត សេដ្ឋា បើសិនជាអ្នកទាំងអស់គ្នាយល់ព្រមទទួល ដែលផ្ទះនោះមានទីតាំងនៅភូមិ រិទ្ធី៣ ឃុំកែវផុស ស្រុកស្ទឹងហៅ ខេត្តព្រះសីហនុ ដែលជាទីតាំងនៅតំបន់អភិវឌ្ឍន៍មាន សាលារៀន មន្ទីរពេទ្យ និងមានការងារធ្វើគ្រប់គ្រាន់សម្រាប់ចិញ្ចឹមជីវិត។
៥.ឯកឧត្តម លី ឆេង
ឯកឧត្តម លី ឆេង អគ្គនាយក ប៊ែលធី គ្រុប បានសម្រេចផ្តល់អាហារូបករណ៍ ១០០% ទាំងថ្នាក់ចំណេះទូទៅ និងភាសាអង់គ្លេស ជូនដល់កូនៗទាំង៣នាក់ ឲ្យមកបន្តការសិក្សានៅសាលា ប៊ែលធី អន្តរជាតិ រហូតដល់បញ្ចប់ការសិក្សា។
៦. ក្រុមហ៊ុន CBS
តំណាងក្រុមហ៊ុន CBS លើកឡើងថា ពេលនេះក្រុមហ៊ុនបានបង្កើតមូលនិធិដើម្បីរកថវិកាទិញផ្ទះសមរម្យណាមួយឲ្យកូនៗទាំង៣ និងអ្នកម្ដាយជរារស់នៅ ព្រោះសព្វថ្ងៃទាំងអស់គ្នាកំពុងរស់នៅផ្ទះជួល និងសន្យាជួយកូនតូចៗទាំង៣ឲ្យបានរៀនចប់ចុងចប់ដើមផងដែរ៕ ផ្ដល់សិទ្ធដោយ៖ kqube
