ភ្នំពេញ ៖ បុរសម្នាក់ ជិះម៉ូតូលឿនពេក ជ្រុលទៅទាក់ដៃចង្កូត និងបង្កាន់ដៃស្ពានអាកាសស្ទឹងមានជ័យ បណ្ដាលឲ្យដួលម៉ូតូ រងរបួសបែកក្បាល សន្លប់ស្ដូកស្ដឹង ហេតុការណ៍នេះបានកើតឡើង នៅវេលាម៉ោង ៩និង៥០នាទីយប់ ថ្ងៃទី៦ ខែមិថុនា ឆ្នាំ២០១៧ នៅលើស្ពានអាកាសស្ទឹងមានជ័យ ផ្លូវ២៧១ សង្កាត់ស្ទឹងមានជ័យ ខណ្ឌមានជ័យ ។
តាមប្រភពព័ត៌មាន ពីកន្លែងកើតហេតុ បានអោយដឹងថា មុនពេលកើតហេតុ គេបានឃើញ បុរសរងគ្រោះខាងលើ មិនដឹងថា គោលបំណងទៅណានោះទេ គឺបានជិះម៉ូតូម៉ាកហុងដា
ឌ្រីម សេរីឆ្នាំ ២០១៤ ពណ៌ខ្មៅ ពាក់ស្លាកលេខ បាត់ដំបង1S 0016 បានធ្វើដំនើរតាមផ្លូវ២៧១ ក្នុងទិសដៅពីត្បូងទៅជើង ពីពេទ្យរុស្ស៊ី ទៅស្ពានអាកាសស្ទឹងមានជ័យ ក្នុងល្បឿនយ៉ាងលឿន ខណៈមកដល់ ស្ពានអាកាសស្ទឹងមានជ័យ អ្នកបើកម៉ូតូបាន បន្ថែមល្បឿនឡើងស្ពាន លុះដល់ចំនុចកើតហេតុ ដែលជាចំនុចផ្លូវកោង អ្នកបើកម៉ូតូមិនបើកកោងតាមផ្លូវ ក៏ជ្រុលទៅទាក់ដៃចង្កូត និងបង្កាន់ដៃស្ពាន អាកាសស្ទឹងមានជ័យ បណ្ដាលឲ្យដួលម៉ូតូ និងធ្វើអោយអ្នកបើកម៉ូតូ រងរបួសបែកក្បាល សន្លប់ស្ដូកស្ដឹង ត្រូវបានរថយន្តសង្គ្រោះ ដឹកយកទៅសង្គ្រោះ នៅគ្លីនិកឯកជន ។
ចំនែកម៉ូតូរងកាខូចខាត ក្រឡិតថ្នាំបន្តិចបន្តួច ។ ក្រោយពេលកើតហេតុ នៅសល់តែម៉ូតូរបស់ជនរងគ្រោះ ត្រូវបានសមត្ថកិច្ច យកទៅរក្សាទុកនៅប៉ុស្តិ៍នគរបាល ស្ទឹងមានជ័យ ៕
សហការី KBN-live.com
