តារាសម្តែង ប៊ឺរី និង ម៉ាដាម ដា ប្រកាសចែកផ្លូវគ្នាក្រោមហេតុផលរស់នៅមិនចុះសម្រុង

បន្ទាប់ពីមានទំនាក់ទំនងស្នេហាជាមួយគ្នាប្រមាណ២ឆ្នាំពេលនេះតារាសម្តែង ប៊ឺរី និងអ្នកលក់អនឡាញ ម៉ាដាម ដា បានប្រកាសជាសាធារណៈពីការបែកបាក់របស់អ្នកទាំងពីរក្រោមហេតុផលរស់នៅមិនចុះសម្រុងនឹងគ្នា។ កាលពីមុនអ្នកទាំងពីរមានគម្រោងអនាគតជាមួយគ្នាដោយដឹកដៃគ្នាចូលរោងទាំងនៅក្នុងស្រុកខ្មែរនិងបារាំង ប៉ុន្តែគម្រោងនេះមិនអាចសម្រេចបាន។

នៅថ្ងៃទី៣ ខែសីហា ឆ្នាំ២០២៦ តារាសម្តែង ប៊ឺរី បានបង្ហោះនៅលើបណ្តាញសង្គមថា «សូមគោរពជម្រាបសួរបងប្អូនទាំអស់គ្នាថ្ងៃនេះយើងខ្ញុំទាំង២នាក់សូមអនុញ្ញាតប្រកាសដំណឹងជាសាធារណៈជូនដល់បងប្អូនទាំងអស់គ្នាឱ្យបានជ្រាបថា យើងខ្ញុំទាំង២នាក់បានព្រមព្រៀងចែកផ្លូវគ្នាចាប់ពីពេលនេះតទៅ ពីថ្ងៃនេះទៅយើងទាំង២លែងត្រូវជាអ្វីនឹងគ្នាតទៅទៀតហើយ (អាចត្រឹមជាមិត្តល្អនឹងគ្នា)មូលហេតុគឺពួកយើងរស់នៅមិនចុះសម្រុងគ្នា
អាស្រ័យដូចបានជម្រាបជូន សូមបងប្អូនជ្រាបជាដំណឹងយើងខ្ញុំក៏សូមអភ័យទោសចំពោះបងប្អូន អ៊ំពូមីង តាយាយ ក៏ដូចជាFan យើងខ្ញុំទាំង2នាក់ផងចុះបើសិនជាធ្វើឱ្យប៉ះពាល់ដល់អារម្មណ៍បងប្អូនដោយប្រការណាមួយ សូមអរគុណ»។

មិនត្រឹមតែតារាសម្តែង ប៊ឺរី ប៉ុណ្ណោះទេងាកទៅកាន់បណ្តាញសង្គមរបស់ម៉ាដាម ដា ក៏បានចែករំលែកដំណឹងបែកបាក់នេះដូចគ្នា។ នៅក្នុងសេចក្តីប្រកាសរបស់ ម៉ាដាម ដា ក៏បានលើកឡើងស្រដៀងគ្នាទៅនឹងការប្រកាសរបស់ ប៊ឺរី គ្រាន់តែមិនមានពាក្យថា «អាចត្រឹមជាមិត្តល្អ»។ នៅក្នុងខម្មិន ម៉ាដាម ដា បានបង្ហាញថាខ្លួនបានឱប គូស្នេហ៍ណែនពេក ហើយការបែកគ្នានេះគឺអ្នកទាំងពីរស្ម័គ្រចិត្តទាំងសងខាង។

ដំណឹងនៃការចែកផ្លូវគ្នានេះបានធ្វើឱ្យអ្នកតាមដានមួយចំនួនបង្ហាញការសោកស្តាយចំពោះចំណងស្នេហ៍នេះដោយសារតែកន្លងមកអ្នកទាំងពីរមានភាពផ្អែមល្ហែមជាមួយគ្នា។ លើសពីនេះទៅទៀតបន្ទាប់ពីម៉ាដាម ដា មានបញ្ហាហិរញ្ញវត្ថុ តារាសម្តែង ប៊ឺរី នៅតែរួមសុខទុក្ខកាន់ដៃគ្នាដោយសន្យាថាមិនបោះបង់គ្នាឡើយប៉ុន្តែពេលនេះអ្នកទាំងពីរក៏មិនអាចបន្តដំណើរជាមួយគ្នាបានឡើយ។

គួរឱ្យដឹងថាតារាសម្តែង ប៊ឺរី បានប្រកាសជាសាធារណៈមានទំនាក់ទំនងស្នេហាជាមួយ ម៉ាដាម ដា កាលពីល្ងាចថ្ងៃទី៨ សីហា ឆ្នាំ២០២៤ ដោយអះអាងថាជាទំនាក់ទំនងមានភាពច្បាស់លាស់និងមានគម្រោងទៅថ្ងៃអនាគតជាមួយគ្នា។ ក្រោយមកម៉ាដាម ដា បានបង្ហើបថាពួកគេនឹងរៀបការទាំងនៅស្រុកខ្មែរនិងស្រុកបារាំង។ នៅដើមខែមករា ឆ្នាំ២០២៥ ម៉ាដាម បានជួបប្រទះនឹងរឿងអាស្រូវពាក់ព័ន្ធនឹងលុយកាក់និងចេញសែកស្អុយ។ នៅចុងខែមករា ឆ្នាំ២០២៥ ម៉ាដាម ដា ក៏បានបង្ហើបថានាងកំពុងពរពោះទៀតផង ប៉ុន្តែជាអកុសលកូនក្នុងផ្ទៃនោះមានបញ្ហា។ នៅខែមេសា ឆ្នាំ២០២៥ តារាសម្តែង ប៊ឺរី ធ្លាប់ចេញមុខអះអាងថារូបលោកនឹងមិនរត់ចោលម៉ាដាម ដា នៅពេលមានបញ្ហាលំបាក។

មែនទែនទៅមុននឹងប្រកាសចែកផ្លូវគ្នានេះ អ្នកទាំងពីរពុំសូវជាបង្ហាញខ្លួនញឹកញាប់ជាមួយគ្នាដូចមុនឡើយរហូតមានការសង្ស័យថាទំនាក់ទំនង ម៉ាដាម ដា និងប៊ឺរី ប្រេះឆា តែក្រោយមកអ្នកលក់អនឡាញរូបនេះក៏បានចេញវីដេអូនិងមានការបង្ហោះរូបភាពមួយចំនួនទើបធ្វើឱ្យការសង្ស័យនេះបាត់វិញ។ យ៉ាងណាក៏ដោយពេលនេះអ្នកទាំងពីរក៏សម្រេចចិត្តបែកបាក់គ្នាដោយសន្តិវិធីដោយនៅសល់តែប៉ុន្មានថ្ងៃទៀតប៉ុណ្ណោះស្នេហារបស់ពួកគេមានរយៈពេល២ឆ្នាំ៕