ហុក សារិតុលា និង យូ ថនវណ្ណៈ បើកទ្វារប្រទេសកម្ពុជាចូល TOP ទាំងពីរនាក់នៅលើឆាកអន្តរជាតិ

នៅក្នុងឆ្នាំនេះការប្រកួតនៅលើឆាក Miss & Mister Supranational 2026 ទទួលបានលទ្ធផលគាប់ប្រសើរបើទោះបីជាមិនឈានដល់វគ្គ TOP ជ្រៅក៏ដោយប៉ុន្តែ ហុក សារិតុលា និង យូ ថនវណ្ណៈ បានសាងប្រវត្តិសាស្រ្តដោយនាំឈ្មោះប្រទេសកម្ពុជាចូល TOP ក្នុងការប្រកួតនេះ។ មកទល់នឹងព្រឹកថ្ងៃទី៣ ខែសីហា ហុក សារិតុលា ក៏បានមកដល់ទឹកដីកំណើតផងដែរ។

នៅយប់ថ្ងៃទី៣១ ខែកក្កដា ត្រូវនឹងថ្ងៃទី១ ខែសីហា ម៉ោងនៅកម្ពុជា កម្មវិធី Miss Supranational 2026 បានរកឃើញម្ចាស់មកុដហើយដោយបានទៅលើបេក្ខនារីតំណាងប្រទេសហ្វីលីពីន ជាមួយនឹងបេក្ខភាពសរុប ៦៧នាក់។ ជាមួយនឹងការខិតខំពុះពារគ្រប់ឧបសគ្គមិនត្អូញត្អែនឹងការប្រកួតនៅឆ្ងាយយ៉ាងណា ហុក សារិតុលា ដែលជា Miss Supranational Cambodia 2026 បានយកជ័យជម្នះមួយជូនប្រជាជនកម្ពុជាដោយរូបនាងបានបើកទ្វារកម្ពុជាចូល TOP លើកដំបូងនៅក្នុងការប្រកួតនេះ។

ហុក សារិតុលា បានជាប់ជា Supra Influencer និងបានឈានជើងចូលដល់ TOP24 នៅក្នុងកម្មវិធី Miss Supranational 2026 ។ នេះក៏ជាលើកដំបូងផងដែរដែលកម្ពុជាយើងមានឱកាសចូល TOP នៅក្នុងកម្មវិធីបវរកញ្ញាធំមួយនេះបើទោះបីជាមិនអាចជាប់ចំណាត់ថ្នាក់ជ្រៅជាងនេះក៏ដោយ។ អ្នកគាំទ្របានចូលរួមអបអរសាទរជាច្រើនទៅកាន់ ហុក សារិតុលា ដែលមិនធ្វើឱ្យអ្នកគាំទ្រខកចិត្ត។ នៅវគ្គឈុតតំណាងជាតិ ហុក សារិតុលា បាននាំយកឈុត «បក្សីនៃសន្តិភាព» ចូលទៅក្នុងការប្រកួតនេះដែលធ្វើឱ្យមហាជនចាប់អារម្មណ៍យ៉ាងខ្លាំង។ គួរឱ្យដឹងថានៅព្រឹកថ្ងៃទី៣ ខែសីហា នេះ ហុក សារិតុលា ក៏បានមកដល់ទឹកដីកំណើតប្រកបដោយសុខសុវត្ថិភាពផងដែរ។

ជាមួយគ្នានេះដែរ ការប្រកួតរបស់ យូ ថនវណ្ណៈ សម្រាប់ Mister Supranational 2026 ក៏ទទួលបានលទ្ធផលគាប់ប្រសើរដូចគ្នាបន្ទាប់ពី Mister Supranational Cambodia 2026 បានបើកទ្វារកម្ពុជាចូល TOP លើកដំបូងនៅក្នុងការប្រកួតនៅឯទឹកដីប៉ូឡូញ។ ថនវណ្ណៈ បានឈានដល់ TOP20 នៅវគ្គផ្តាច់ព័្រត្រនាថ្ងៃទី១ ខែសីហា ដែលត្រូវនឹងព្រឹកថ្ងៃទី២ ខែសីហា។

ការប្រកួតរបស់ យូ ថនវណ្ណៈ បានធ្វើឱ្យសហគមន៍អ្នកគាំទ្រចាប់អារម្មណ៍ជាច្រើនរហូតស្នើឱ្យមានកម្មវិធីជួបជុំអ្នកគាំទ្របន្ទាប់ពីទំនាក់ទំនងជិតស្និទ្ធរបស់បុរសឯកកម្ពុជារូបនេះជាមួយនឹង បុរសឯកវៀតណាម មានភាពស៊ីចង្វាក់គ្នាបានល្អ។ ក្នុងនោះទំនាក់ទំនងរវាង Mister Supranational Cambodia 2026 និងអ្នកតំណាងរបស់កូរ៉េខាងត្បូងក៏អ្នកគាំទ្រចាប់អារម្មណ៍ខ្លាំងណាស់ដែរ៕