ក្រសួងរ៉ែ និងថាមពល ចាត់ទុកករណីហិង្សាលើកម្មករក្រុមហ៊ុនបូមខ្សាច់ចតុមុខ គឺជាទង្វើខុសច្បាប់ធ្ងន់ធ្ងរ

គ្មានការលើកលែង! ក្រសួងរ៉ែ និងថាមពល បានចេញមុខប្រកាសជាផ្លូវការ ដោយចាត់ទុកសកម្មភាពហិង្សារបស់ក្រុមប្រជានេសាទទៅលើក្រុមហ៊ុនបូមខ្សាច់ ចតុមុខ នៅក្នុងមូលដ្ឋានព្រំប្រទល់ខេត្តព្រៃវែង និងខេត្តកណ្ដាល ថាជាទង្វើល្មើសច្បាប់យ៉ាងធ្ងន់ធ្ងរ។ យន្តការឆ្លើយតបផ្លូវការរបស់ក្រសួង គឺធ្វើឡើងដើម្បីលុបបំបាត់រាល់ទម្រង់អាណាធិបតេយ្យ និងដើម្បីបញ្ជាក់ជាថ្មីពីភាពស្អាតស្អំរបស់ក្រុមហ៊ុនដែលបានវិនិយោគ និងបង់ពន្ធជូនរដ្ឋយ៉ាងត្រឹមត្រូវជាច្រើនឆ្នាំមកហើយ។

យោងតាមការបកស្រាយលម្អិតនៅក្នុងសន្និសីទកាសែតផ្លូវការ កាលពីថ្ងៃទី៥ ខែកក្កដា ឆ្នាំ២០២៦ ជុំវិញហេតុការណ៍ចម្រូងចម្រាស់ដែលបានកើតឡើងកាលពីថ្ងៃទី២ ខែកក្កដា លោក អ៊ឹង អៀង រដ្ឋលេខាធិការក្រសួងរ៉ែ និងថាមពល បានថ្លែងបញ្ជាក់ថា ទីតាំងកើតហេតុខាងលើនេះ មិនមែនជាទីតាំងថ្មីនោះទេ ពោលគឺវាជាកន្លែងដែលក្រសួងបានចេញអាជ្ញាបណ្ណស្របច្បាប់ជូនទៅក្រុមហ៊ុន ចតុមុខ ដើម្បីធ្វើប្រតិបត្តិការបូមខ្សាច់តាំងពីឆ្នាំ ២០២០ មកម៉្លេះ (ចូលរហូតដល់៤ ទៅ៥ឆ្នាំហើយ)។ ក្រុមការងារបច្ចេកទេសជំនាញដែលបានចុះទៅពិនិត្យផ្ទាល់ បានផ្ទៀងផ្ទាត់ឃើញថា ក្រុមហ៊ុនបានអនុវត្តស្របតាមបទដ្ឋានគតិយុត្ត និងអនុលោមភាពទៅតាមអាជ្ញាប័ណ្ណយ៉ាងហ្មត់ចត់បំផុត ដោយមិនមានការបំពានខ្សែបន្ទាត់សេដ្ឋកិច្ចណាមួយឡើយ។

ជាមួយគ្នានេះ លោក អ៊ឹង ឌីប៉ូឡា អ្នកនាំពាក្យក្រសួងរ៉ែ និងថាមពល ដែលបានដឹកនាំក្រុមការងារចម្រុះចុះទៅពិនិត្យផ្ទាល់ជាមួយអាជ្ញាធរដែនដី បានធ្វើការបដិសេធទាំងស្រុងចំពោះវីដេអូរយៈពេលជាង ១៦នាទី ដែលបានបង្ហោះតាមបណ្តាញសង្គម ដោយលោកបានបញ្ជាក់យ៉ាងច្បាស់ថា ទីតាំងបូមខ្សាច់ពិតប្រាកដគឺស្ថិតនៅក្នុងភូមិសាស្ត្រខេត្តកណ្តាល មិនមែននៅក្នុងខេត្តព្រៃវែង ដូចការលើកឡើងរបស់ប្រជានេសាទភូមិថ្មីនោះឡើយ ហើយលទ្ធផលបច្ចេកទេសបានបង្ហាញថា «គ្មានការបាក់ច្រាំងទន្លេ» ឬប៉ះពាល់ដល់ផ្ទះប្រជាពលរដ្ឋដោយសារការបូមខ្សាច់នេះទេ។ លោកអ្នកនាំពាក្យបានបន្ថែមថា ការបូមខ្សាច់ស្របច្បាប់ដែលមានបច្ចេកទេសត្រឹមត្រូវ ថែមទាំងជួយការពារការបាក់ច្រាំង និងផ្តល់អត្ថប្រយោជន៍សេដ្ឋកិច្ចយ៉ាងមហាសាលដល់សង្គមជាតិ តាមរយៈការបង់ស៊ុយសារ និងអាករចូលថវិការដ្ឋពីគ្រប់សកម្មភាពលក់ដូរ និងដឹកជញ្ជូន។

ជាការសន្និដ្ឋាន ការចេញមុខលាតត្រដាងការពិតពីសំណាក់មន្ត្រីជាន់ខ្ពស់ក្រសួងរ៉ែ និងថាមពល នាពេលនេះ គឺជាជំហានការទូតច្បាប់ដ៏សំខាន់ ក្នុងពង្រឹងសណ្តាប់ធ្នាប់សាធារណៈ និងការពារសិទ្ធិស្របច្បាប់របស់វិនិយោគិន។ ក្រសួងបានសង្កត់ធ្ងន់ថា ទោះបីជាប្រជានេសាទមានក្តីបារម្ភរឿងមុខរបរយ៉ាងណាក្តី ក៏ត្រូវតែដោះស្រាយតាមយន្តការច្បាប់ និងការសម្រុះសម្រួលសន្តិវិធី មិនអាចប្រើហិង្សាវាយដំលើកម្មករក្រុមហ៊ុនឡើយ។ បច្ចុប្បន្ន ក្រសួងកំពុងសហការយ៉ាងស្អិតល្មួតជាមួយកងកម្លាំងសមត្ថកិច្ចខេត្តកណ្តាល និងខេត្តព្រៃវែង ដើម្បីស្រាវជ្រាវ និងវែកមុខរកមេខ្លោងដែលនៅពីក្រោយការញុះញង់ឱ្យមានការបះបោរ និងប្រើហិង្សាខុសច្បាប់នេះ យកមកផ្តន្ទាទោសតាមក្រមព្រហ្មទណ្ឌឱ្យខានតែបាន ដើម្បីរក្សាស្ថិរភាព និងធានាទំនុកចិត្តសន្តិសុខសង្គម៕