ថ្មីៗនេះនៅក្នុងព្រឹត្តិការណ៍របស់ Bvlgari ដែលបានប្រារព្ធឡើងនៅទីក្រុង Milan ប្រទេសអ៊ីតាលី បានទាក់ទាញការចាប់អារម្មណ៍ទស្សនិកជនដោយសារប្រមូលផ្តុំទូតសុច្ឆន្ទៈមកពីប្រទេសជាច្រើនក្នុងនោះក៏មាន Kim Ji Won តួឯកស្រីក្នុងរឿង «Queen of Tears» ។
Kim Ji Won បានស្លៀករ៉ូបក្រណាត់ពណ៌ខៀវចាស់ដែលបង្ហាញពីក ស្មា និងដើមទ្រូងដ៏ទាក់ទាញរបស់នាង។ យ៉ាងណាមិញ ទោះបីជាបានជ្រើសរើសរ៉ូបដ៏ស្រស់ស្អាតសមរម្យសម្រាប់ព្រឹត្តិការណ៍នេះក៏ដោយក៏រូបរាងរបស់ Kim Ji Won បានបង្កឱ្យមានការព្រួយបារម្ភក្នុងចំណោមទស្សនិកជន។ មនុស្សជាច្រើនបានកត់សម្គាល់ឃើញថា តារាស្រីរូបនេះបានស្រកទម្ងន់គួរឱ្យកត់សម្គាល់។
បន្ទាប់ពីរូបថតដែលមិនទាន់បានកែសម្រួលពីព្រឹត្តិការណ៍នេះ បានរីករាលដាលពាសពេញអ៊ីនធឺណិត អ្នកប្រើប្រាស់អ៊ីនធឺណិតជាច្រើនបានកត់សម្គាល់ឃើញថា ស្មា ក និងឆ្អឹងខ្នងរបស់ Kim Ji Won អាចមើលឃើញយ៉ាងច្បាស់ ជាពិសេសឆ្អឹងស្មាដែលលេចចេញមក ដែលធ្វើឱ្យនាងមើលទៅកាន់តែស្លីម។ បើប្រៀបធៀបទៅនឹងរូបរាងធាត់បន្តិចរបស់នាងនៅក្នុងរឿងភាគ «My Freedom Diary» កាលពីប៉ុន្មានឆ្នាំមុន តារាស្រីរូបនេះមើលទៅស្ទើរតែខុសគ្នាទាំងស្រុង។ 
បន្ទាប់ពីបានមើលវីដេអូរបស់ Kim Ji Won អ្នកលេងអ៊ីនធឺណិតបានសម្តែងការព្រួយបារម្ភខ្លាចតារាស្រីរូបនេះមានបញ្ហាសុខភាព។ លើសពីនេះ ភ្នែកដែលហត់នឿយរបស់ Kim Ji Won ធ្វើឱ្យរូបរាងទាំងមូលរបស់នាងហាក់ដូចជាអស់កម្លាំង និងខ្វះភាពរស់រវើក។.png)
គួរឱ្យដឹងថាថ្មីៗនេះ Kim Ji Won បានផ្តោតលើការថត រឿងភាគ ថ្មីរបស់នាងមានចំណងជើងថា «Doctor X: Age of the White Mafia»។ រឿងភាគនេះគ្រោងនឹងចាក់ផ្សាយនៅលើប៉ុស្តិ៍ SBS នៅខែតុលា ឆ្នាំ២០២៦។ របាយការណ៍ប្រព័ន្ធផ្សព្វផ្សាយបានបង្ហាញថា ការសម្រកទម្ងន់របស់ Kim Ji Won គឺដើម្បីបំពេញតាមតម្រូវការនៃគម្រោងនេះ។ តាមពិតទៅនេះមិនមែនជាលើកទីមួយទេ ដែលតារាស្រីរូបនេះបានផ្លាស់ប្តូររូបរាងរបស់នាងសម្រាប់តួនាទីមួយ។
នៅឆ្នាំ ២០២៤ នៅពេលដែលនាងបានសម្តែងក្នុងរឿង «Queen of Tears » ក្នុងនាមជាអ្នកស្នងមរតកអ្នកមាន Hong Hae In តារាស្រីរូបនេះបានចាប់ផ្តើមគ្រប់គ្រងទម្ងន់របស់នាងយ៉ាងតឹងរ៉ឹង ដើម្បីឱ្យស្របនឹងអាកប្បកិរិយាត្រជាក់របស់តួអង្គ និងបរិបទនៃជំងឺធ្ងន់ធ្ងរនៅពេលក្រោយរបស់នាង។ គេប៉ាន់ប្រមាណថា ក្នុងអំឡុងពេលនេះនាងបានស្រកទម្ងន់ប្រហែល ៨គីឡូក្រាម ដោយបានផ្លាស់ប្តូរពីរូបភាពផ្អែមល្ហែមទៅជាអាកប្បកិរិយាត្រជាក់ និងទំនើបរបស់ឥស្សរជនអ្នកមាន៕
