គិតត្រឹមថ្ងៃទី២៣ ខែកុម្ភៈ នេះអ្នកនាង ឆេង ស្រីរ័ត្ន ហៅ Love Riya នៅមិនទាន់មានការដោះលែងចេញពីពន្ធនាគារនៅឡើយទេ។ ស្របពេលរូបភាពបែកធ្លាយ Love Riya កំពុងមានទម្ងន់ជិតសម្រាលនៅក្នុងសំលៀកបំពាក់ជាអ្នកទោសបានជំរុញឱ្យមានបុគ្គលល្បីៗនៅលើបណ្តាញសង្គមចេញមុខអង្វរករដល់ផ្លូវច្បាប់អនុគ្រោះដល់អ្នកលក់អនឡាញរូបនេះ។
លោក តាំង គីមឡេង ដែលល្បីខាងជួយការងារសង្គមនិងដឹកស្បៀងដល់កងទ័ពតាមបណ្តាយព្រំដែនបានចេញមកបង្ហោះថា «នេះជាលើកទី១ ដែលខ្ញុំបាទសុំក្តីអនុគ្រោះនិងស្នើសុំសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន សូមសម្តេចកិត្តិ មេត្តាប្រោសប្រណីបងស្រី Love Riya ស្នើដល់តុលាការឱ្យបងបាននៅក្រៅឃុំផងចុះ ដើម្បីឱ្យបងស្រីបានថែទាំកូននៅក្នុងផ្ទៃ»។
ក្នុងនាមជាម្តាយដូចគ្នា អ្នកបង្កើតមាតិកា កាកាអូស្រ្តាលី បានបង្ហោះថា «សម្រាប់ជីវិតខ្ញុំដែលនៅសល់ខ្ញុំមានបំណងបីនេះគឺជាបំណងតែមួយគត់ដែលខ្ញុំចង់ ស្នើសុំពីខាងប្រព័ន្ធច្បាប់ប្រទេសកម្ពុជាសូមអាណិតដល់គាត់ដែលជាម្ដាយមានបទក្នុងផ្ទៃផងចុះ»។ អ្នកនាង កាកា ក៏បានសរសេរនៅក្នុងវីដេអូដែរថា «សូមច្បាប់ជួយយោគយល់នឹងអត់ឱនដល់គាត់គាត់ក៏ធ្លាប់បានធ្វើបុណ្យជាច្រើន ជាមួយនឹងមនុស្សដែលជាប្រជាជនក្នុងស្រុក ក្នុងនាមជាមនុស្សស្រីជាម្តាយម្នាក់ ខ្ញុំសូមប្រើពាក្យថាជាបំណងចុងក្រោយដែល ខ្ញុំចង់សំណូមពរពីច្បាប់ប្រទេសកម្ពុជា ក្នុងបំណងបីដែលខ្ញុំនៅមានសម្រាប់ជីវិតខ្ញុំ មួយនេះដែលចង់ឃើញគាត់ មានសេរីភាពជួបជុំកូន»។
មិនខុសគ្នាប៉ុន្មាននោះទេទោះបីជាធ្លាប់មានបញ្ហាជាមួយនឹងគ្នាក្តីគេបានឃើញលោក អ៊ឹម ជីវ៉ា ចេញមុខអង្វរករដល់ប្រព័ន្ធច្បាប់ឱ្យមានករណីលើកលែងឱ្យ Love Riya មានសេរីភាពវិញ។ លោក បានបង្ហោះថា «បងនឹងព្យាយាម….ទោះកន្លងមកប្អូន Love riya មកជេរប្រមាថបងមុនក៏ដោយ បងនៅតែលើកលែងឱ្យប្អូន ព្រោះកំហុសអ្នកណាក៏ធ្លាប់មាន ..!ដោយសារតែប្អូនខុសមាត់កមួយពេលប៉ះពាល់ជាមួយជាតិយើង ដែលកំពុងក្តៅ ជាមួយសៀម..ធ្វើឱ្យអូនមានបញ្ហា..! បើសិនប្អូនចេញបាននៅពេលឆាប់ៗខាងមុខនេះ បងចង់ផ្តាំទៅប្អូនថា គួរកាត់បន្ថយរឿងជាច្រើន ជាពិសេស កាសេពគប់មនុស្សក្បែខ្លួនមួយចំនួន ប្អូនត្រូវដឹងថា មនុស្សនៅក្បែរគឺជារឿងសំខាន់ណាស់ បើលង់ជឿតាមការបញ្ជោ ការលើកជើងរបស់អ្នកក្បែរខ្លួន និងជោរតាមLike Share views ឬកាន់បារមីជ្រុល គឺនាំឱ្យមានបញ្ហាដល់ខ្លួន ! ហើយពេលមានបញ្ហា ប្អូនដឹងទេ គឺគេមិនមែនមកទទួលជាមួយយើងឡើយ»។.png)
លោក អ៊ឹម ជីវ៉ា បន្តថា « ខ្ញុំដឹងថាប្រទេសជាតិមានច្បាប់ យើងត្រូវគោរពច្បាប់ គ្រប់គ្នា តែកន្លងមក ប្អូន LOVE RIYA ក៏បានចូលរួមចំនែកជាមួយសង្គមជាតិច្រើនណាស់ បើប្អូនមានសីរីភាពគឺសូមឱ្យប្អូនបន្តការងារជួយសង្គមជាតិយើងបន្តទៀត»។ លោកបន្ថែមដែរថានឹងព្យាយាមធ្វើអ្វីតាមដែលអាចធ្វើបាន និងបានជូនពរឱ្យ Love Riya មានសេរីភាពវិញ។
ក្នុងខែសីហា ឆ្នាំ២០២៥ អ្នកលក់អនឡាញ Love Riya ដែលមានឈ្មោះពិតថា ឆេង ស្រីរ័ត្ន ត្រូវបានតំណាងអយ្យការអមសាលាដំបូងខេត្តកណ្ដាល បានសម្រចចោទប្រកាន់ ពីបទញុះញង់ឱ្យមានការរើសអើង និងធ្វើឱ្យខូចទឹកចិត្តកងទ័ព។ បន្ទាប់ពីចាប់ខ្លួនបាន១សប្តាហ៍គេទើបតែដឹងថាអ្នកលក់អនឡាញរូបនេះមានផ្ទៃពោះ ខណៈស្វាមីរបស់ Love Riya បានបញ្ជាក់ថាកូនក្នុងផ្ទៃគឺជាកូនភ្លោះទៀតផង៕
