ជី ដេវីត និង ទេព បូព្រឹក្ស បង្ហាញការឈឺចាប់យ៉ាងខ្លាំងចំពោះទង្វើឈ្លានពានរបស់ថៃធ្វើឱ្យពលរដ្ឋខ្មែររងរបួ.ស

តារាចម្រៀង ជី ដេវីត និង ទេព បូព្រឹក្ស បានបង្ហាញការឈឺចាប់ហួសប្រមាណនូវពេលឃើញកងទ័ពថៃបន្តឈ្លានពានមកលើកម្ពុជា មិនត្រឹមតែប៉ុណ្ណោះថែមទាំងធ្វើឱ្យពលរដ្ឋមិនលើកលែងសូម្បីព្រះសង្ឃរងរបួសជាង២០នាក់។

ទង្វើឃោរឃៅរបស់កងទ័ពថៃនេះតារាចម្រៀង ទេព បូព្រឹក្ស បានបង្ហោះនៅលើបណ្តាញសង្គមដោយក្តីឈឺចាប់ថា «ពួកសត្វតិរច្ឆាននៅតែគគ្លើនបន្តឈ្លានពានបូរណភាពទឹកដីកម្ពុជា ប្រជាជនខ្មែរស្មោះស្ម័គ្របង្ហូរឈាមរងគ្រាប់ រងផ្សែង និងអាវុធសារធាតុគីមី ពីពួកចោរ ថៃ ដើម្បីរក្សាឱ្យបាននូវដីដែលជាកម្មសិទ្ធិរបស់យើង»។ តារាចម្រៀងរូបនេះបន្តទៀតថា «នេះគឺជាការឈឺចាប់ដែលយើងបានឃើញនឹងភ្នែក របួសដែលមុតនឹងសាច់។ ឱ!កម្ពុជាដ៏កម្សត់អើយយ បេះដូងខ្ញុំត្រូវបានកាត់ជាចំណែកហើយ»។

ហេតុការណ៍ឈឺចាប់ទាំងនេះតារាចម្រៀង ទេព បូព្រឹក្ស ថាជារឿងដែលកូនខ្មែរគ្រប់រូបត្រូវចងចាំ។ «រឿងដែលកូនខ្មែរគ្រប់រូបចងចាំ ឈឺចាប់ សៀមអើយឯងសាហាវពេកហើយ តាំងពីថ្ងៃទី២៨ ឧសភា ឯងចូលមកដីខ្មែរ បាញ់ទាហានខ្មែរស្លាប់ ទាំងដែលខ្មែរមិនដែលបានទៅបង្កជម្លោះជាមួយឯងឡើយ។ ថ្ងៃ២៤ កក្ដដា ឯងបានបើកការវាយប្រហារមកលើខ្មែរ មុន ឯងកំទេចប្រាសាទព្រះវិហារ ឯងបានលើកទ័ពឈ្លានពានគ្រប់កន្លែងនូវទឹកដីខ្មែរ ឯងរំ លោភបទឈប់បាញ់ ឯងបង្កើត fake news ជាច្រើន ហើយថ្ងៃនេះឯងបានបាញ់ មកលើប្រជាជនខ្មែរមិនថាក្មេងចាស់ប្រុសស្រីព្រមទាំងព្រះសង្ឃថ្ងៃនេះជាថ្ងៃទី ១៧ ខែកញ្ញា»។

តារាចម្រៀង ជី ដេវីត វិញបានចែករំលែកការបង្ហោះរបស់ភរិយា ដោយបន្ថែមអត្ថន័យថា «ខ្ញុំជឿថានៅចុងបញ្ចប់គឺមានតែយើងជាខ្មែរខ្លួនឯងតែប៉ុណ្ណោះដែលត្រូវខ្លាំងតតាំងនិងពួកសត្រូវចោរឈ្លានពានដោយឈាមខ្មែរ។តើបរទេសគេនិងជឿ ឬ ជ្រើសរើសយកយើងដែរ ឬទេ?តើយើងអាចទុកចិត្តអ្នកណាបានទៀតទេ? មួយរយៈកាលមកនេះ»។

លោក ក៏បានបង្ហោះសំណេរមួយទៀតថា « ទ្រឹស្តីតែអត់ប្រយោជន៍វិភាគបែកផ្សែងប្រាប់ពីរបៀបនេះ របៀបនោះ បើបាន Like Share លើសពី១០K ទៀតចាំមើលមួយថ្ងៃយ៉ាងតិច ១០ផុសចង់ស្ទើរ។ មានខ្លះជ្រុលជោរជួយវិភាគយុទ្ធសាស្រ្តឱ្យសត្រូវទៀត រឿងខ្លះសត្រូវគិតអត់ដល់ទេតែបណ្ឌិតហ្វេកប៊ុកជួយបំភ្លឺ ហើយគិតថាថៃអត់ចេះខ្មែរ? ខ្ពើមណាស់និយាយមែន បញ្ហាគោលគឺត្រូវមានដំណោះស្រាយដោយឈរស្មារតីជាតិតែមួយជាចុងក្រោយបង្អស់គ្មានស្អីលើសនឹងទេ បងប្អូនយើងនៅខាងមុខលំបាក យើងនៅក្រោយក៏គង់លំបាកតាមក្រោយ ហើយប្រទេសជាតិយើងនឹងកាន់តែលំបាកទ្វេដង»។

គួរបញ្ជាក់ផងដែរថាកាលពីរសៀលថ្ងៃទី១៧ ខែកញ្ញា មានការប៉ះទង្គិចគ្នារវាងពលរដ្ឋកម្ពុជានិងកងទ័ពថៃ ខណៈដែលកងទ័ពថៃព្យាយាមរំលោភបំពានមកលើកម្ពុជាដោយប្រើប្រាស់កម្លាំងរាយបន្លាលួសលើទឹកដី និងទ្រព្យសម្បត្តិ ដែលពលរដ្ឋខ្មែរបានរស់នៅ និងអាស្រ័យផលតាំងពីយូរលង់ណាស់មកហើយ។ ហេតុការណ៍នេះបានកើតឡើងនៅភូមិព្រៃចាន់ ភូមិអូរបីជាន់ ស្រុកអូរជ្រៅ ខេត្តបន្ទាយមានជ័យ ដោយពលរដ្ឋខ្មែរ ព្រះសង្ឃ ទាហាន និងប៉ូលិសយ៉ាងហោច ២៣ នាក់ បានរងរបួសធ្ងន់ស្រាល អំឡុងពេលទាហានថៃបានបាញ់ឧស្ម័នបង្ហូរទឹកភ្នែកចំពាមកៅស៊ូគ្រាប់កាំភ្លើងក្បាលជ័រមកលើប្រជាពលរដ្ឋកម្ពុជា៕