រដ្ឋបាលខេត្តសៀមរាប ចេញមុខបដិសេធការផ្លាស់ប្តូរឈ្មោះសួនព្រះរាជដំណាក់

ថ្មីៗនេះ មហាជនមានការងឿងឆ្ងល់ជាខ្លាំង ក្រោយពីរដ្ឋបាលខេត្តសៀមរាបប្រើឈ្មោះ “សួនតេជោសន្តិភាព” ជំនួស “សួនព្រះរាជដំណាក់” នៅក្នុងព្រឹត្តិការណ៍អង្គរសង្រ្កាន្តឆ្នាំ២០២៥ខាងមុខនេះ។

ពាក់ព័ន្ធនឹងបញ្ហានេះ ពលរដ្ឋរស់នៅខេត្តសៀមរាប បានថ្លែងស្រដៀងគ្នាថា៖”ក្រៅពីសួនព្រះរាជដំណាក់ ឬ សួនបឹងគីឡូ ខ្ញុំអ្នកសៀមរាប មិនទទួលស្គាល់ទេ ចង់ដាក់ឈ្មោះថ្មី ទៅបង្កេីតសួនច្បារថ្មីទៅ”។

បើតាមរដ្ឋបាលខេត្តសៀមរាប បានឱ្យដឹងថា៖” សួនច្បារព្រះរាជដំណាក់ ពុំបានប្ដូរឈ្មោះដូចដែលមានការបង្ហោះផ្សាយនៅលើទំព័រហ្វេសប៊ុកមួយចំនួននោះទេ។ សួនតេជោសន្តិភាព ជាឈ្មោះផ្លូវការសួនមួយទៀត”។

ការដាក់ឈ្មោះថា “សួនតេជោសន្តិភាព” ជាការររំឭកដល់គោលនយោបាយឈ្នះឈ្នះ ដែលធ្វើឱ្យមានសន្តិភាពរហូតដល់សព្វថ្ងៃ។

យោងតាមលោក លី វណ្ណៈ នាយករដ្ឋបាលសាលាខេត្តសៀមរាប បានលើកឡើងថា៖” បើយើងដាក់ថាសួនព្រះរាជដំណាក់ គឺមានន័យថា យើងកំពុងកែប្រែសួននៅក្នុងរបងមានរូបសំណាក់មេទ័ពទាំង១២ ដែលក្រសួងព្រះបរមរាជវាំងបានរៀបចំស្អាតហើយ”។

លោក លី វណ្ណៈ បានសង្កត់ធ្ងន់ទៀតថា៖”យុវជនជំនាន់ក្រោយ គួរដឹង និងស្វែងយល់ប្រវត្តិសាស្រ្តឱ្យបានច្រើន មុននឹងប្រតិកម្មទៅនឹងឈ្មោះអ្វីមួយ”៕