ថ្មីៗនេះ មានគណនីហ្វេសប៊ុកមួយឈ្មោះ “សមាគម ទេវ សក្ខី ភគវន្ត”បានតាំងខ្លួនជាអ្នកពន្យល់ធម៌ បានប្រើភាសាប្រមាថដល់ព្រះត្រៃបិដក ដោយលើកឡើងថា៖”ព្រះត្រៃបិដកខ្មែរ ជាព្រះត្រៃបិដកមិនគ្រប់ទឹក”។
បុគ្គលរូបនេះ បានហៅខ្លួនឯងថា សាស្តា សក្ខី ភគវន្ត ដោយនិយាយបកស្រាយថា៖” ព្រះសង្ឃជាបុគ្គលកំពុងពេញកម្លាំងហើយរស់នៅជាបន្ទុករបស់ពុទ្ធបរិស័ទ និងបានពោលត្មះតិះដៀលថា ព្រះត្រៃបិដកខ្មែរ ជាព្រះត្រៃបិដកមិនគ្រប់ទឹក។
ពាក់ព័ន្ធនឹងករណីនេះ ដើម្បីការពារតម្លៃព្រះសង្ឃ និងព្រះពុទ្ធសាសនាខ្មែរដ៏ល្អផូរផង់របស់ជាតិ ពុទ្ធិកសមាគមកម្ពុជរដ្ឋ នៃព្រះរាជាណាចក្រកម្ពុជា បានថ្កោលទោសយ៉ាងដាច់អហង្កា និងសូមគោរពស្នើសុំដល់ក្រសួងធម្មការ និងសាសនា សូមព្រះមេត្តា និងមេត្តា ចាត់វិធានការណ៍យ៉ាងម៉ឺងម៉ាត់បំផុត តាមផ្លូវច្បាប់។

ទង្វើនេះ បានធ្វើឱ្យប៉ះពាល់យ៉ាង ធ្ងន់ធ្ងរដល់ព្រះរតនត្រ័យទាំងបី គឺព្រះពុទ្ធ ព្រះធម៌ និងព្រះសង្ឃ និងតម្លៃដ៏ល្អផូរផង់របស់ព្រះពុទ្ធសាសនាខ្មែរ ដែលជាសាសនារបស់រដ្ឋ។
ពុទ្ធិកសមាគមកម្ពុជរដ្ឋ សង្ឃឹម និងជឿជាក់យ៉ាងមុតមាំថា ក្រសួងធម្មការ និងសាសនា នឹងធ្វើការកោះហៅបុគ្គលរូបនេះមកទទួល ខុសត្រូវចំពោះមុខច្បាប់ជាធរមាន៕