លោក ឈួង យីវឆូយ នាយកជាតិគ្រប់គ្រងបវរកញ្ញាចក្រវាលកម្ពុជាឆ្នាំ២០២៤ បានទម្លាយនៅលើបណ្តាញសង្គមថាមន្ត្រីនៅព្រលានយន្តហោះនៅទីនោះពុំស្គាល់ប្រទេសកម្ពុជាទេស្គាល់តែប្រទេសក្បែរខាង។ តែមកដល់ទីតាំងប្រកួតមានការស្រែកឈ្មោះ Cambodia ក៏ព្រោះតែឥទ្ធិពលអ្នកតំណាងមកប្រកួត។ លើសពីនេះលោកបានទម្លាយប្រាប់អ្នកស្និទ្ធខ្លួនថាមានគេសរសើរ ប្រាសាទ ដាវីន ច្រើនខ្លាំងណាស់។
ប្រិយមិត្តអ្នកគាំទ្រមួយចំនួនដែលតាមដានការប្រកួតបវរកញ្ញាចក្រវាលជ្រាបមកហើយថា ថ្មីៗនេះND Miss Universe Cambodia លោក ឆូយ បានទៅលើកទឹកចិត្ត ប្រាសាទ ដាវីន ដោយផ្ទាល់នៅម៉ិចស៊ិក។ លោកក៏ទទួលបានការស្វាគមន៍ពីបណ្តាFan Page នានាដូចជាប្រទេសថៃជាដើម។ 
បន្ទាប់ពីទៅដល់ទីនោះ ND រូបនេះបានទម្លាយពីឥទ្ធិពលរបស់ ប្រាសាទ ដាវីន ដែលបាននាំឱ្យគេស្គាល់ប្រទេសកម្ពុជាកាន់តែច្រើន ខណៈ Miss Universe Cambodia 2024 ទទួលបានការស្រលាញ់ចូលចិត្តនិងសរសើរពីមនុស្សជាច្រើន។ នៅថ្ងៃទី៨ វិច្ឆិកា លោក ឆូយ បានបង្ហោះយ៉ាងដូច្នេះថា « សុំ drama បន្តិច ពេលឈានជើងមកដល់ទឹកដីមិចស៊ីកូ មន្ត្រីនៅព្រលានយន្តហោះសួរខ្ញុំថាមកពីណា? ខ្ញុំថា “I’m from Cambodia” គេថាគេអត់ស្គាល់ ទាល់តែខ្ញុំរៀបរាប់ឈ្មោះប្រទេសក្បែរខាង ទើបគេស្គាល់។ តែពេលមកដល់ទីតាំងប្រកួត ឬសូម្បីតែខាងក្រៅសណ្ឋាគារ ម្នាក់ៗស្រែកឈ្មោះ Cambodia ពេញៗមាត់»។ 
លោកបន្តទៀតថា «នេះក៏ព្រោះតែឥទ្ធិពលនៃអ្នកតំណាងដែលស្ពាយឈ្មោះ Cambodia ទៅឱ្យគេស្គាល់។ គេសរសើរពេញៗមាត់! We did it ប្រាសាទ ដាវីន អ្នកខ្លះអាចមើលរំលងពីគុណតម្លៃនៃវិស័យនេះ តែខ្ញុំមើលឃើញពីឥទ្ធិពល»។
ប្រាសាទ ដាវីន Miss Universe Cambodia 2024 បានបង្ហាញសកម្មភាពលេចធ្លោជាច្រើននៅក្នុងការប្រកួត Miss Universe 2024 លើកទី៧៣ នេះដែលមានបេក្ខភាពសរុបរហូតដល់១៣០នាក់។ បេក្ខភាពតំណាងប្រទេសកម្ពុជារូបនេះទើបតែឈ្នះ Best Make up ជាមួយនឹងបេក្ខភាព១៩នាក់ផ្សេងទៀតដែលទទួលបានគ្រឿង Make up ប្រ៊េនរបស់កម្មវិធីនេះផ្ទាល់ដែលគិតជាទឹកប្រាក់គឺចំនួន៣០០០ដុល្លារឯណោះ។ 
ងាកមកសិល្បករ សិល្បការិនី អ្នកគាំទ្រកំពុងតែសាមគ្គីគ្នា លើកទឹកចិត្តទៅកាន់ប្រាសាទ ដាវីន និងអំពាវនាវឱ្យប្រជាជនកម្ពុជាចូលរួមបោះឆ្នោត Voice of change ដើម្បីមានឱកាសឱ្យកម្ពុជាចូលទៅកាន់វគ្គ TOP30 ដោយស្វ័យប្រវត្តិ។ ក្តីសង្ឃឹមរបស់ប្រជាជននិងអ្នកគាំទ្រកម្ពុជារំពឹងថា ប្រាសាទ ដាវីន នឹងបើកទ្វារកម្ពុជាចូលTOPនៅក្នុងការប្រកួតនេះខណៈការប្រកួត Miss Universe ប្រទេសកម្ពុជាពុំទាន់បានចូលTOPនៅឡើយ៕
