ផ្លែឈើពណ៌បៃតងគឺជារបបអាហារដ៏សំខាន់មួយសម្រាប់សុខភាព វាសំបូរទៅដោយជាតិវីតាមីន ជាតិរ៉ែ និងជាតិសរសៃ ហើយមានជាតិកាឡូរីទាប ដែលធ្វើឱ្យអ្នកញុំាទទួលបានអត្ថប្រយោជន៍ជាច្រើនដូចជា កាត់បន្ថយជំងឺទឹកនោមផ្អែម កាត់បន្ថយហានិភ័យនៃការធាត់ កាត់បន្ថយសម្ពាធឈាមខ្ពស់ និងការពារបេះដូង។ ដូច្នេះផ្លែឈើបៃតងដែលអ្នកគួរទទួលទានជាប្រចាំរួមមាន៖
១.ផ្លែប៉ោមបៃតង៖ គឺជាអាហារសម្រន់ដ៏ល្អបំផុតសម្រាប់អ្នកដែលមានជំងឺទឹកនោមផ្អែម។ ពួកវាសម្បូរទៅដោយជាតិសរសៃដែលមានប្រយោជន៍សម្រាប់ការរំលាយអាហារនិងមានជាតិស្ករតិច ជួយទប់ស្កាត់ការកើនឡើងជាតិស្ករក្នុងឈាម និងកម្រិតអាំងស៊ុយលីន។ ដូច្នេះអ្នកជំងឺអាចញ៉ាំផ្លែប៉ោមបៃតងជារៀងរាល់ថ្ងៃ ដោយញ៉ាំដោយផ្ទាល់ ឬផ្សំក្នុងសាឡាដក៏បាន។
២.ផ្លែទំពាំងបាយជូបៃតង៖ ផ្លែឈើនេះជួយកាត់បន្ថយហានិភ័យនៃការវិវត្តទៅជាជំងឺទឹកនោមផ្អែមប្រភេទ ២ ព្រោះវាផ្ទុកសារធាតុ Resveratrol ។ សារធាតុនេះមានសមត្ថភាពក្នុងការបង្កើនភាពប្រែប្រួលនៃអាំងស៊ុយលីន ជួយឱ្យរាងកាយទទួលបានជាតិស្ករតិច និងគាំទ្រការគ្រប់គ្រងជាតិស្ករក្នុងឈាមឱ្យមានស្ថេរភាព។
៣.ផ្លែគីវី៖ ផ្លែគីវីគឺសម្បូរទៅដោយជាតិម៉ាញ៉េស្យូមខ្ពស់មានឥទ្ធិពលបញ្ចុះជាតិស្ករក្នុងឈាម ផ្តល់អត្ថប្រយោជន៍សម្រាប់អ្នកជំងឺទឹកនោមផ្អែមប្រភេទ២ ។
៤.ក្រូចឆ្មារ៖ ផ្លែក្រូចឆ្មារមានផ្ទុកនូវវីតាមីន C ជាច្រើន ដែលជាសារធាតុប្រឆាំងអុកស៊ីតកម្មដ៏មានឥទ្ធិពល ដែលជួយកាត់បន្ថយជាតិស្ករក្នុងឈាម និងកម្រិតកូឡេស្តេរ៉ុល។ វីតាមីន C ចូលរួមក្នុងការផលិតកូឡាជែន រក្សាភាពសុចរិតនៃសរសៃឈាម និងកាត់បន្ថយហានិភ័យនៃផលវិបាកដោយសារជំងឺទឹកនោមផ្អែម។ ក្រូចឆ្មាក៏សម្បូរទៅដោយជាតិសរសៃ ហ្វូឡាត ប៉ូតាស្យូម GI ទាប និងមិនសូវបង្កើនកម្រិតជាតិស្ករក្នុងឈាមនោះទេ។ លើសពីនេះជាតិសរសៃរលាយក្នុងក្រូចឆ្មា ក៏បន្ថយដំណើរការរំលាយអាហារ រួមចំណែកដល់ការសម្រកទម្ងន់ទៀតផង។
៥.ផ្លែត្របែក៖ ផ្លែឈើប្រភេទនេះសម្បូរទៅដោយសារធាតុប្រឆាំងអុកស៊ីតកម្ម ជាតិសរសៃ វីតាមីន C និងប៉ូតាស្យូម។ ផ្លែឈើទំហំមធ្យមមួយផ្តល់ ៣៧ កាឡូរី ជាអាហារសម្រន់ដែលជួយឱ្យអ្នកមានអារម្មណ៍ឆ្អែតបានយូរ និងជួយសម្រកទម្ងន់។ ផ្លែឈើនេះក៏មានផ្ទុកវីតាមីន និងសារធាតុរ៉ែជាច្រើនផងដែរ ដែលផ្តល់ជីវជាតិសម្រាប់អ្នកមានជំងឺទឹកនោមផ្អែម។
៦.ផ្លែបឺរ៖ ផ្លែបឺរមានជាតិសរសៃខ្ពស់ ខ្លាញ់ល្អ វីតាមីន និងសារធាតុរ៉ែ។ ប៊ឺប្រហែល ១៥០ ក្រាមមានកាបូអ៊ីដ្រាត ១២,៧៩ ក្រាមជាតិស្ករតិចជាង ១ ក្រាមនិង ២៤០ កាឡូរី។ ផ្លែបឺរមានកាបូអ៊ីដ្រាតទាប និងមានជាតិសរសៃខ្ពស់ ដូច្នេះវាមិនបង្កើនជាតិស្ករក្នុងឈាមទេ។ សមាគមជំងឺទឹកនោមផ្អែមអាមេរិកណែនាំថាអ្នកដែលមានជំងឺនេះអាចបន្ថែមផ្លែបឺរទៅក្នុងរបបអាហារប្រចាំថ្ងៃរបស់ពួកគេបាន ពីព្រោះជាតិសរសៃ និងខ្លាញ់ដែលមានសុខភាពល្អ ពន្យារអារម្មណ៍នៃភាពឆ្អែត និងកាត់បន្ថយចំណង់អាហារ ៥ ម៉ោងក្រោយ ជួយឱ្យរាងកាយប្រើអាំងស៊ុយលីនមានប្រសិទ្ធភាព៕