ធ្លាប់តែឃើញ Mark Zuckerberg ម្ចាស់ក្រុមហ៊ុនហ្វេសបុក និងភរិយាស្លៀកពាក់សាមញ្ញៗ តែលើកនេះថ្លៃញាក់!

នាយកប្រតិបត្តិក្រុមហ៊ុន Meta លោក Mark Zuckerberg ព្រមជាមួយភរិយាខ្លួន បានបង្កឲ្យមានការភ្ញាក់ផ្អើលយ៉ាងខ្លាំងព្រោះតែវត្តមានអ្នកទាំង២គ្រងម៉ាកយីហោប្រេនល្បីឈ្មោះដែលមានតម្លៃថ្លៃកបពពក ទៅចូលរួមកម្មវិធី Pre-Wedding របស់ Anant Ambani ដែលជាកូនប្រុសពៅរបស់មហាសេដ្ឋីមានបំផុតនៅអាស៊ី Mukesh Ambani ។

កាលពីថ្ងៃទី១ ខែមីនា ឆ្នាំ២០២៤ ជាមួយថ្ងៃក្នុងចំណោមទាំង៣ថ្ងៃនៃពិធីជប់លៀង ឬកម្មវិធី Pre-Wedding របស់កូនប្រុសកំពូលមហាសេដ្ឋីឥណ្ឌាគឺ Anant Ambani ជាមួយគូដណ្តឹង Radhika Merchant។ Anant Ambani អាយុ ២៨ ឆ្នាំ គឺជាកូនប្រុសពៅរបស់ Mukesh Ambani ដែលគ្រប់គ្រងក្រុមហ៊ុន Reliance Industries និងមានទ្រព្យសម្បត្តិសុទ្ធចំនួន ១១៧.៣ ពាន់លានដុល្លារ តាមការប៉ាន់ស្មានរបស់ Forbes គិតត្រឹមដើមខែមីនានេះ។ ដូច្នេះហើយទើប Mukesh Ambani បានក្លាយជាអ្នកមានជាងគេបំផុតប្រចាំអាស៊ី និងជាអ្នកមានបំផុតទី ៩ របស់ពិភពលោក។

ក្រឡេកមកមើលលោកសេដ្ឋីហ្វេសបុក Mark Zuckerberg អាយុ ៤០ ឆ្នាំនិងភរិយាខ្លួន លោកស្រី Priscilla Chan អាយុ ៣៩ ឆ្នាំ បានជ្រើសរើសយកប្រេនល្បីឈ្មោះ Alexander McQueen សម្រាប់ការស្លៀកពាក់របស់អ្នកទាំងពីរ។ គូរស្នេហ៍មួយគូរនេះបានគ្រងម៉ាកដ៏ល្បីល្បាញនេះយ៉ាងមានភាពជឿជាក់ ដោយភរិយាគាត់បានបំពាក់គ្រឿងអលង្ការថ្លៃៗកប់ពពក។

អាវក្រៅពណ៍ខ្មៅរបស់ Mark Zuckerberg ត្រូវបានគេរចនារំលេចដោយក្បាច់សត្វកន្ទុមរុយពណ៌មាស ដែលអាវនេះមានតម្លៃរហូតដល់ ៧,០០០ ដុល្លារ។ រីឯស្បែកជើងគាត់វិញគឺរចនាឡើងគូរជាមួយនឹងអាវដែរ ដែលត្រូវដែលតម្លៃ ១,៨៩៥ ដុល្លារ។

ចំណែកភរិយាគាត់វិញ លោកស្រី Chan បានគ្រងរ៉ូបពណ៌ខ្មៅអូសដីម៉ាក Alexander McQueen មានតម្លៃ ១៥,០០០ ដុល្លារអាមេរិក ដែលច្នៃពីសាច់ក្រណាត់គុណភាពបំផុត រចនារំលេចដោយក្បាច់ផ្កាកុលាប និងត្បូងគ្រីស្តាល់។ សម្រាប់គ្រឿងអលង្ការរបស់លោកស្រីវិញ គឺបានជ្រើសរើសខ្សែកពណ៌មាស Cartier ដែលមានតម្លៃ ៩១,៥០០ដុល្លារអាមេរិក ដែលមានត្បូងពេជ្រចំនួន ៨០៤គ្រាប់ សរុប ១០.៧ ការ៉ាត់។ លោកស្រីក៏បានពាក់កងដៃ Cartier ដែលមានតម្លៃរហូតដល់ ២៣៥,០០០ដុល្លារអាមេរិក ស្រោបដោយត្បូងពេជ្រចំនួន ៥៤០ គ្រាប់ សរុប ១២.៧៣ ការ៉ាត់។

គួរបញ្ជាក់ថា កម្មវិធី Pre Wedding របស់កូនប្រុសពៅមហាសេដ្ឋីឥណ្ឌាខាងនេះ គឺបានមានការអញ្ជើញចូលរួមពីសំណាក់កំពូលមហាសេដ្ឋីពិភពលោក អ្នកជំនួញ នាយកប្រតិបត្តិក្រុមហ៊ុនយក្សជាច្រើន រួមមាន លោក Mark Zuckerberg (CEO Meta) ,លោក Bill Gates (CEO Microsoft), លោក Bob Iger ( CEO ក្រុមហ៊ុន Disney), Ivanka Trump (កូនស្រីរបស់លោក Donald Trump), លោកស្រី Hillary Clinton, និងសមាជិករាជវង្ស Bhutan។ល។ បើតាមការបញ្ជាក់កម្មវិធី Pre-Wedding រយៈពេល៣ថ្ងៃនេះមានតម្លៃរហូតដល់ ១៥១.៩ លានដុល្លារអាមេរិក៕