ការបាញ់បង្ហោះរ៉ុកកែតនៅក្នុងបេសកកម្ម Artemis-I ដោយទីភ្នាក់ងារអវកាសអាមេរិក NASAនឹងសម្រាប់យកថ្ងៃទី១៦ ខែវិច្ឆិកា។
កាលពីខែកញ្ញាកន្លងទៅបេសកកម្ម Artemis-I ត្រូវបានលើកពេលម្ដងដោយសារតែបញ្ហាធាតុអាកាស ដែលកាលណោះ រដ្ឋហ្លរីដារងការវាយប្រហារដោយខ្យល់ព្យុះ Ian។ ចំណែកគម្រោងបាញ់បង្ហោះនៅថ្ងៃទី១៤ ខែវិច្ឆិកានេះ ត្រូវលើកពេលម្ដងទៀតដោយសារតែខ្យល់ព្យុះសង្ឃរា Nicole ដែលត្រូវគេព្យាករណ៍ថា នឹងធ្វើដំណើរបោកបក់ដល់រដ្ឋហ្លរីដា នៅវេលាយប់ថ្ងៃពុធ ទី០៩ ឬព្រឹកថ្ងៃព្រហស្បតិ៍ ទី១០ ខែវិច្ឆិកា ម៉ោងនៅរដ្ឋហ្លរីដា សហរដ្ឋអាមេរិក។ បើតាមការព្យាករណ៍ ខ្យល់ព្យុះ Nicole ស្ថិតនៅក្នុងកម្រិតទី១ ដោយមានកម្លាំងខ្យល់បោកបក់ជាង ១០០គីឡូម៉ែត្រនៅក្នុងមួយម៉ោង។
សូមជម្រាបថា Artemis-I គឺជាបេសកកម្មទី១ នៃគម្រោងអារតេមីសរបស់ណាសា ដើម្បីបញ្ជូនមនុស្សទៅកាន់ព្រះចន្ទ ក្នុងគោលដៅបោះទីតាំងអចិន្រ្តៃយ៍។ ជាការបោះទីតាំងនៅលើផ្ទៃព្រះចន្ទដើម្បីធ្វើជាមូលដ្ឋាន សម្រាប់បេសកកម្មបញ្ជូនមនុស្សទៅកាន់ភពអង្គារ។ បេសកកម្ម Artemis-I នេះ នឹងមិនមានដឹកអវកាសយានិកនោះទេ ដោយមានតែតួយានទទេតែប៉ុណ្ណោះ ដើម្បីជាការសាកល្បងបច្ចេកវិទ្យារ៉ុកកែត និងយានអវកាសថ្មី មុននឹងឈានទៅដឹកអវកាសយានិក៕
ប្រភព៖ ABC News