ព្រះនាង អេលីហ្សាបែតទីពីរ(Elizabeth II) ប្រសូត្រនៅថ្ងៃទី ២១ ខែមេសា ឆ្នាំ១៩២៦ ទ្រង់កើតក្នុងទីក្រុង ឡុងដ៍នៃចក្រភពអង់គ្លេស នៅក្នុងរជ្ជកាលរបស់ជីតាព្រះនាងគឺជាស្ដេច George V ។ ព្រះនាងគឺជាកូនដំបូងក្នុងចំណោមបងប្អូនស្រីពីរនាក់គឺម្ចាស់ក្សត្រី Margaret ប្រសូតនៅឆ្នាំ ១៩៣០ របស់ព្រះអង្គម្ចាស់ Albert Frederick Arthur George Windsor និងមាតា Elizabeth Bowes-Lyon។
ព្រះនាងបានទទួលការអប់រំជាលក្ខណៈឯកជន ដែលផ្ដោតទៅលើមេរៀន ប្រវត្តិសាស្ត្រ ភាសា អក្សរសាស្ត្រ និងតន្ត្រី។ ក្រោយមកព្រះនាងចាប់ផ្ដើមទទួលភារកិច្ចសាធារណៈក្នុងអំឡុងសង្គ្រាមលោកលើកទីពីរដោយបម្រើក្នុងសេវាដែនដីជំនួយ។ នៅខែវិច្ឆិកា ឆ្នាំ ១៩៤៧ ព្រះនាងបាន រៀបអភិសេកជាមួយ Philip Mountbatten ដែលជាអតីតព្រះអង្គម្ចាស់នៃប្រទេសក្រិច និងដាណឺម៉ាក ហើយរស់នៅជាមួយគ្នារយៈពេល ៧៣ ឆ្នាំដោយមានបុត្រចំនួន ៤ អង្គរួមមានព្រះអង្គម្ចាស់ ព្រះអង្គ Charles III ព្រះនាង Anne ព្រះអង្គ Prince Andrew និងព្រោះអង្គ Prince Edward ។ ព្រះអង្គ Philip Mountbatten ក៏បានសោយទិវង្គតនៅខែមេសា ឆ្នាំ ២០២១ ។
នៅពេលដែលឪពុករបស់ព្រះនាងបានទទួលមរណភាពនៅខែកុម្ភៈឆ្នាំ ១៩៥២ អេលីហ្សាបែតទីពីរ ពេលនោះមានអាយុ ២៥ ឆ្នាំ ហើយក្នុងឆ្នាំ១៩៥៣ អេលីហ្សាបែតទីពីរ បានគ្រងរាជ្យក្លាយជាព្រះមហាក្សត្រិយានី។
ព្រះនាង អេលីហ្សាបែតពីរ ជាស្តេចអង់គ្លេសដែលសោយរាជ្យយូរជាងគេ ហើយជាស្តេចដែលសោយរាជ្យយូរបំផុតទីពីរ ដែលអាចផ្ទៀងផ្ទាត់បានក្នុងប្រវត្តិសាស្ត្រពិភពលោក បន្ទាប់ពីស្តេច ល្វីសទី ទី ១៤ នៃប្រទេសបារាំង ដោយព្រះនាងគ្រប់គ្រងប្រទេសចំនួន១៥ ប្រទេសរួមមាន ចក្រភពអង់គ្លេស (អង់គ្លេស ស្កុតឡែន វែល អៀរឡង់ខាងជើង) អូស្ត្រាលី នូវែលហ្សេឡង់ កាណាដា បាហាម៉ាស ប៉ាពូញូគីណេ ចាម៉ៃកា បេលីស្ស បាប៊ូដា កោះសូឡូម៉ុន សង់ឃីត និង ណេវីស)។
ជាមួយគ្នានោះផងដែរព្រះនាងអេលីហ្សាបែតទីពីរ ត្រូវបានមហាជនទូទាំងពីភពលោកទទួលស្គាល់ថាជាបុគ្គលមួយរូបមានទ្រព្យសម្បត្តិផ្ទាល់ខ្លួនដ៏ច្រើនមហាសាល ដោយអតីតលេខាឯកជនរបស់ព្រះនាង និងជានាយកធនាគាររបស់ទ្រង់ បានប៉ាន់ប្រមាណទ្រព្យសម្បត្តិរបស់ម្ចាសក្សត្រី នៅឆ្នាំ២០២១ ប្រមាណ៣៥០លានផោនដែលស្មើ៦០០ លានដុល្លារ ដែលធ្វើឱ្យព្រះនាងអេលីហ្សាបែតទីពីរនេះ បានក្លាយជាអ្នកមានបំផុតទីនៅចក្រភពអង់គ្លេសផងដែរ។
នៅថ្ងៃទី ៨ ខែកញ្ញាឆ្នាំ ២០២២ វិមាន Buckingham បានប្រកាសថាព្រះមហាក្សត្រិយានីស្ថិតនៅក្រោមការត្រួតពិនិត្យផ្នែកវេជ្ជសាស្រ្តនៅឯ Balmoral Castle បន្ទាប់ពីវេជ្ជបណ្ឌិតបានសម្តែងការព្រួយបារម្ភជាខ្លាំង ចំពោះសុខភាពរបស់ព្រះមហាក្សត្រិយានី និងបានផ្តល់អនុសាសន៍ឱ្យព្រះនាងបន្តស្ថិតក្រោមការត្រួតពិនិត្យផ្នែកវេជ្ជសាស្ត្រ។ កូនទាំងបួនរបស់ទ្រង់ រួមជាមួយនឹងកូនប្រសាស្រី និងចៅៗព្រះនាង បានធ្វើដំណើរមកកាន់វិមាន Buckingham។ ហើយការប្រកាលជាផ្លូវការពីការសោយទិវង្គតរបស់ព្រះនាង អេលីហ្សាបែតទីពីរ ក្នុងព្រះជន្ម៩៦ព្រះវស្សា នៅប្រាសាទBalmora ក្នុងប្រទេសស្កុតឡែនត្រូវបានបញ្ជាក់នៅល្ងាចនោះផងដែរ៕