អន្តរជាតិ៖ ការសិក្សាមួយទៀតកំពុងព្រមានអំពីគ្រោះថ្នាក់នៃទឹកជំនន់នៅទីក្រុងបាងកក ដោយនាយកមជ្ឈមណ្ឌលបំរែបំរួលអាកាសធាតុ និងគ្រោះមហន្តរាយនៃសាកលវិទ្យាល័យ Rangsit លោកវេជ្ជបណ្ឌិត Seree Supharathit បានធ្វើផែនទីដែលលាតត្រដាងឲ្យឃើញ ទីក្រុងបាងកក នឹងលិចលង់បាត់ខ្លួននៅត្រឹមឆ្នាំ ២១០០។ ខណៈលោកបានអះអាងយ៉ាងមុតមាំថា ប្រសិនបើរដ្ឋាភិបាល មិនបានធ្វើអ្វីដើម្បីទប់ស្កាត់រឿងនេះទេ នោះត្រូវរៀបចំផ្លាស់ទីរាជធានី។ នេះបើយោងតាមការចុះផ្សាយរបស់សារព័ត៌មាន Thethaiger ។
លោកបណ្ឌិត Seree Supharathit បានកត់សម្គាល់ថា ប្រទេសថៃនឹងមានភ្លៀងធ្លាក់កាន់តែច្រើនចាប់ពីខែកញ្ញាដល់ខែវិច្ឆិកា ហើយនាយកដ្ឋានឧតុនិយមបានព្យាករណ៍ថា ព្យុះត្រូពិចពី ២ទៅ៣ អាចវាយប្រហារប្រទេសនេះ។ លោកបាននិយាយថា ប្រទេសថៃអាចនឹងទទួលបានភ្លៀងធ្លាក់ខ្លាំងបំផុតដែលមិនធ្លាប់ើមានក្នុងរយៈពេល១០០ឆ្នាំ។ នៅឆ្នាំនេះ ទឹកជំនន់នឹងកើតឡើងដោយសារខ្យល់ព្យុះដែលអាចរំកិលទៅតំបន់កណ្តាល ហើយជន់លិចដីស្រែចំការ និងហូរហៀរដល់តំបន់សេដ្ឋកិច្ច ឥឡូវទំនប់ Pa Sak ពេញហើយ បើបង្ហូរទឹកទៅខាងកើត នោះវានឹងហូរទៅប្រឡាយ Rangsit ពេលទឹក ជន់លិចប្រឡាយ Phraya Banlue អ្នកក្រុងបាងកក ត្រូវតែចាប់ផ្តើមរៀបចំការការពារខ្លួន។
ជាមួយគ្នានោះដែរ លោកបណ្ឌិត Seree បានអំពាវនាវដល់អាជ្ញាធរ រួមទាំងអភិបាលក្រុងបាងកក លោក Chadchart Sittipunt ផងដែរ ឲ្យមានតម្លាភាពអំពីទឹកជំនន់ និងវិធានការទប់ទល់។ លោកថា រដ្ឋាភិបាលមិនបានបញ្ចេញព័ត៌មានច្បាស់លាស់ដល់សាធារណជនទេ ហើយនៅតែប្រកាន់ខ្ជាប់វិធានការចាស់ ១៣ ចំណុចដែលមិនអាចផ្តល់ការការពារបាន។
ទោះបីជាយ៉ាងណាក៏ដោយអ្នកជំនាញបានធ្វើការទស្សន៍ទាយខុសៗគ្នាមួយចំនួនអំពីពេលដែលទីក្រុងបាងកកនឹងត្រូវបានលិចបាត់។ ដោយកាលពីនៅឆ្នាំ២០១៩ អ្នកស្រាវជ្រាវព្យាករថា បាងកកអាចលិចបាត់នៅឆ្នាំ២០៥០ ៕
