ពិតជារឿងដ៏គួរឱ្យបារម្ភ ក្រោយពីប្រទេសថៃប្រកាសពីការរកឃើញអ្នកជំងឺអុតស្វាជនជាតិ នីហ្សេរីយ៉ា ហើយក៏បានដាក់ឱ្យសម្រាកព្យាបាលក្នុងខេត្តភូកេត ប៉ុន្តែបុរសរូបនេះបានរត់គេចពីការព្យាបាល ហើយត្រូវបានគេដឹងថា បុរសរូបនេះបានធ្វើដំណើរមកដល់ខេត្ត ស្រះកែវហើយ ទើបត្រូវអជ្ញាធរថៃស្នើរសុំកិច្ចសហការពីអាជ្ញាធរក្នុងខេត្តបន្ទាយមានជ័យ ដើម្បីស្វែងរកជនបរទេសខាងលើ។
ទាក់ទងនឹងបញ្ហានេះផងដែរត្រូវបានគេឱ្យដឹងថា ប្រទេសថៃបានប្រកាសស្វែងរកបុរស ជនជាតិនីហ្សេរីយ៉ា អាយុ២៧ ឆ្នាំ ក្រោយពីគេបានរត់គេចពីការព្យាបាលជំងឺអុតស្វា បន្ទាប់ពីពិនិត្យ PCR នៅមន្ទីរពិសោធន៍នៃមហាវិទ្យាល័យវេជ្ជសាស្ត្រ សាកលវិទ្យាល័យ Chulalongkorn ក្នុងប្រទេសថៃ ក្រោយបុរសរូបនេះចេញរោគសញ្ញាក ឈឺបំពង់ក ហៀរសំបោរ កន្ទួលក្រហម ពងបែកចេញពីប្រដាប់ភេទ រាលដាលដល់ផ្ទៃមុខ និងដើមដៃ រួចក្រុមគ្រូពេទ្យបានដាក់ឱ្យសម្រាក់ព្យាបាលនៅមន្ទីរពេទ្យបង្អែកភូកេត ប៉ុន្តែនៅយប់ថ្ងៃទី ២១ ខែកក្ដដា ឆ្នាំ២០២២ គេបានជិះឡានពណ៌សរត់គេចចេញពីមន្ទីរពេទ្យ។
ទន្ទឹមនឹងនោះអាជ្ញារធរក្នុងប្រទេសថៃបានប្រកាសថា បុរសរូបនេះបានធ្វើដំណើរចេញពីខេត្តភូកេតហើយពេលនេះគេបានធ្វើដំណើរទៅដល់ខេត្តស្រះកែវជាប់នឹងខេត្តបន្ទាយមានជ័យដែលជាព្រំប្រទល់រវាងខ្មែរ-ថៃ។
យ៉ាងណាមិញឯកឧត្តម អ៊ុំ រាត្រី អភិបាលខេត្តបន្ទាយមានជ័យ ក៏បានបញ្ជាក់ ឲ្យដឹងនាព្រឹកថ្ងៃទី២៣ ខែកក្កដា ឆ្នាំ២០២២ នេះថា បន្ទាប់ពីទទួលបានព័ត៌មានអំពីការរត់គេចខ្លួនរបស់បុរសម្នាក់ ជនជាតិនីហ្សេរីយ៉ា ដែលមានជំងឺអុតស្វាដំបូងគេនៅប្រទេសថៃ ភ្លាមៗអាជ្ញាធរខេត្តស្រះកែវ នៃប្រទេសថៃ បានស្នើសុំកិច្ចសហការពីអាជ្ញាធរខេត្តបន្ទាយមានជ័យ ដើម្បីស្វែងរកជនបរទេសខាងលើ ដោយឯកឧត្តម អ៊ុំ រាត្រី បញ្ជាក់បន្តថា អាជ្ញាធរ និងសមត្ថកិច្ចតាមព្រំដែនទាំងអស់ កំពុង តាមដានទៅលើអត្តសញ្ញាណជនបរទេសរូបនេះបន្ត៕