រដ្ឋធានីវ៉ាសាវី៖ ដោយសារតែសង្គ្រាមដ៏ឃោរឃៅរបស់ក្រុងមូស្គូ កំពុងតែបង្កនូវមហាវិនាសកម្ម ដល់ប្រទេសអ៊ុយក្រែន កាន់តែខ្លាំងឡើង ទើបបណ្ដាប្រទេសនានា នៅលើពិភពលោកខឹងសម្បា ហើយនាយករដ្ឋមន្រ្ដីប៉ូឡូញ ចង់ឃើញរុស្ស៊ី ដកលោក វ៉្លាឌីមៀរ ពូទីន (Vladimir Putin) ចេញពីតំណែងប្រធានាធិបតី នៃប្រទេសមហាអំណាចមួយនេះ។
សារព័ត៌មាន Republic World បានចេញផ្សាយ កាលពីព្រឹក ថ្ងៃទី១ ខែមិថុនា ឆ្នាំ២០២២ ថា លោក ម៉ាទើស មូរ៉ាវៀកគី (Mateusz Morawiecki) នាយករដ្ឋមន្រ្ដីប៉ូឡូញ បានថ្លែងថា គាត់ចង់ឃើញប្រធានាធិបតីរុស្ស៊ី លោក វ៉្លាឌីមៀរ ពូទីន ត្រូវបានដកហូតចេញពីអំណាច។
លោក Morawiecki នាយករដ្ឋមន្រ្ដីប៉ូឡូញ បានបញ្ជាក់ថា ពួកគេនឹងលែងមានសុវត្ថិភាពទៀតហើយ ប្រសិនបើអឺរ៉ុប និង ពិភពលោកសេរី ចាញ់នៅក្នុងការប្រយុទ្ធនេះ ។ សង្រ្គាមនេះ បានកើតឡើង ក៏ព្រោះតែពួកគេតែងតែត្រូវរងការគំរាមកំហែង និង បោកបញ្ឆោត ពីលោក ពូទីន។
នាយករដ្ឋមន្រ្ដីប៉ូឡូញ បានបន្ថែមទៀតថា ពួកគេចង់ឃើញលោក ពូទីន ត្រូវបានដក ចេញពីអំណាចទាំងស្រុង។ លោក ពូទីន ជាកម្លាំងដ៏ឃោរឃៅមួយ ខណៈរុស្ស៊ី ជាមហាអំណាច។ ប្រសិនបើអ៊ុយក្រែន នៅរស់រានមានជីវិត ជារដ្ឋអធិបតេយ្យ ដែលជាគោលបំណងចុងក្រោយរបស់អឺរ៉ុប នឹងក្លាយជាការឈ្នះរបស់ពួកគេ៕
