រដ្ឋធានីគៀវ៖ ដោយសារតែការវាយប្រយុទ្ធគ្នា កាន់តែខ្លាំងក្លាឡើង នៅក្នុងតំបន់ដុនបាស (Donbas) នោះ កងទ័ពអ៊ុយក្រែន បានអះអាងថា កម្លាំងយោធារុស្ស៊ី កំពុងតែព្យាយាម ឡោមព័ទ្ធកម្លាំងការពារទឹកដីរបស់ខ្លួន នៅក្នុងទីក្រុងលីស៊ីចាន់ស្ក៍ (Lysychansk) និង ទីក្រុងសេវេរ៉ូដូណែតស្ក៍ (Severodonetsk) នាភាគខាងកើត ប្រទេស។
បណ្ដាញទូរទស្សន៍ CNN បានផ្សាយ កាលពីព្រឹក ថ្ងៃទី៣០ ខែឧសភា ឆ្នាំ២០២២ ថា លោក ស៊ើជេ ឡាវរ៉ូវ (Sergei Lavrov) រដ្ឋមន្រ្ដីក្រសួងការបរទេសរុស្ស៊ី បានអះអាងថា អាទិភាពដ៏ចម្បងរបស់ក្រុងមូស្គូ គឺរំដោះតំបន់ដូណែតស្ក៍ (Donetsk) និង លូសាន់ស្ក៍ (Luhansk) ។
លោករដ្ឋមន្រ្ដីក្រសួងការបរទេសរុស្ស៊ី បានថ្លែង នៅក្នុងបទសម្ភាសន៍មួយ ជាមួយនឹងបណ្ដាញទូរទស្សន៍បារាំង TFI ថា «តំបន់ទាំង២នេះ ឥឡូវត្រូវបានទទួលស្គាល់ ដោយសហព័ន្ធន៍រុស្ស៊ី ជារដ្ឋឯករាជ្យ។ វាជាការពិតណាស់ គោលបំណងជាក់ស្តែងរបស់យើង គឺដើម្បីរុញច្រានឲ្យកងទ័ពអ៊ុយក្រែន និង កងវរសេនាតូចអ៊ុយក្រែន ដកចេញពីតំបន់ Donetsk និង Luhansk ។
ដោយឡែក មន្រ្ដីយោធាអ៊ុយក្រែន បានអះអាងថា កម្លាំងទាហានរុស្ស៊ី កំពុងតែបាញ់ផ្លោង ឆ្លងព្រំដែន ចូលមកក្នុងតំបន់ភាគខាងជើង ទីក្រុងស៊ូមី (Sumy) និង ទីក្រុងឆើនីហ៊ីវ (Chernihiv) ។ រីឯមហិច្ឆតារបស់កម្លាំងទាហានឈ្លានពានរបស់រុស្ស៊ី គឺដើម្បីឡោមព័ទ្ធកងទ័ពរបស់យើង នៅក្នុងតំបន់ Lysychansk និង Severodonetsk ហើយបិទផ្លូវយុទ្ធសាស្រ្ដសំខាន់ៗ។
អគ្គសេនាធិការ កងទ័ពអ៊ុយក្រែន បានបញ្ជាក់ថា «រហូតមកដល់ពេលនេះ កម្លាំងទាហានរុស្ស៊ី កំពុងតែព្យាយាម វាយដណ្តើមឲ្យបានទីតាំងមួយចំនួន នៅជាយក្រុង ភាគឦសាន នៃទីក្រុង Severodonetsk ដោយធ្វើប្រតិបត្តិការ វាយលុក ចូលទៅនៅក្នុងទិសដៅ នៅកណ្តាលទីក្រុងនេះ»៕
