ភ្នំពេញ៖ ពិធីករ និងពិធីការិនីឆ្នើមប្រចាំទូរទស្សន៍បាយ័ន លោកជួប សុភ័ក្រ្ក និងកញ្ញាហេង កែវនីតា បានចូលរួមក្នុងកម្មវិធីបើកការប្រកួតបាល់ទាត់នារី អង្គការផ្កាយសមុទ្រ 2022 កាលពីថ្ងៃសោរិ៍ ទី12 ខែមីនាកន្លងទៅនេះ។ ការប្រកួតបាល់ទាត់នារី អង្គការផ្កាយសមុទ្រ មានគោលដៅចូលរួមចំណែកក្នុងការលើកស្ទួយវិសមភាពយេនឌ័រតាមរយៈការលេងកីឡា។ កម្មវិធីនេះទៀតសោតមានការចូលរួមពីសំណាក់ក្រុមបាល់ទាត់កុមារីអាយុក្រោម 10 ឆ្នាំ អាយុក្រោម 14 ឆ្នាំ និងអាយុក្រោម 18 ឆ្នាំ ដែលមានចំនួនសរុបរហូតដល់ទៅ 420 នាក់ ដែលពួកគេបានធ្វើដំណើរពីខេត្តក្រុងទាំង 8 ដើម្បីមកជុំគ្នាប្រកួតក្នុងកម្មវិធី ការប្រកួតបាល់ទាត់នារី អង្គការផ្កាយសមុទ្រ។
កញ្ញាហេង កែវនីតា បានឲ្យដឹងថា កញ្ញាពិតជាមានក្តីសប្បាយរីករាយដែលបានមកឃើញកុមារី ចូលរួមលេងកីឡាបាល់ទាត់ដូចបុរសដែរ។ កញ្ញាយល់ឃើញថា ការលើកទឹកចិត្តឲ្យកុមារីលេង កីឡាបាល់ទាត់នេះមិនត្រឹមតែឲ្យពួកគេទទួលបានសុខភាពល្អ រាងកាយមាំមួនប៉ុណ្ណោះទេ តែថែមទាំងអាចឲ្យគេយកកីឡាបាល់ទាត់ជាផ្នែកមួយនៃការអប់រំពីភាពជាអ្នកដឹកនាំ ការធ្វើការជាក្រុម និងការចេះដោះស្រាយបញ្ហានានាផងដែរ។
រីឯលោកជួប សុភ័ក្រ្ក ដែលលោកបានចូលរួមសកម្មភាពជាច្រើនជាមួយអង្គការផ្កាយសមុទ្របានឲ្យ ដឹងថា ៖ “ចាប់តាំងពីឆ្នាំ 2006 មក អង្គការផ្កាយសមុទ្រកម្ពុជាបានជួយលើកកម្ពស់សមភាពយេនឌ័រ ដោយ លើកទឹកចិត្តឲ្យស្រ្តីចូលរួមក្នុងវិស័យបាល់ទាត់ ដោយហេតុថា ឱកាសក្នុងការលេងបាល់ទាត់សម្រាប់ កុមារីក្រីក្រនៅកម្ពុជាស្ទើរតែមិនមាន ព្រមជាមួយនឹងផ្នត់គំនិតមិនសមហេតុផល ដែលថាស្ត្រីបង្វិល ជើងក្រានមិនជុំ។”
ជាចុងក្រោយលោកជួប សុភ័ក្រ្ក និងកញ្ញាហេង កែវនីតា បានផ្តល់ដំបូន្មានល្អសម្រាប់ក្រុមកីឡា បាល់ទាត់កុមារី ឲ្យខិតខំរៀនសូត្រ ជៀសឆ្ងាយពីគ្រឿងញៀន និងធ្វើជាបុគ្គលល្អនៅក្នុងសង្គម ៕