ជប៉ុន៖ គ្រោះរញ្ជួយដីកម្រិត ៧.៤ រ៉ិចទ័រ បានវាយប្រហារភាគឦសានប្រទេសជប៉ុន កាលពីល្ងាចថ្ងៃពុធ ទី១៦ ខែមីនា ឆ្នាំ២០២២ ដោយបានបណ្តាលឲ្យមនុស្សយ៉ាងតិចចំនួន៤នាក់ស្លាប់ និងជាច្រើននាក់ទៀតរងរបួសធ្ងន់ ស្រាល ខណៈរថភ្លើងល្បឿនលឿនមួយបានក្រឡាប់ផងដែរ។ នេះបើយោងតាមការចុះផ្សាយរបស់សារព័ត៌មាន Japantimes ។
ការរញ្ជួយដីនេះបានជំរុញឱ្យទីភ្នាក់ងារឧតុនិយមចេញការព្រមានអំពីរលកយក្សស៊ូណាមិកម្ពស់ ១ម៉ែត្រ ទៅកាន់ឆ្នេរសមុទ្រប៉ាស៊ីហ្វិកនៃខេត្ត Miyagi និង Fukushima ប៉ុន្តែការព្រមានត្រូវបានដកចេញនៅព្រឹកថ្ងៃព្រហស្បតិ៍វិញបន្ទាប់ពីគេសង្កេតឃើញរលកយក្សស៊ូណាមិតិចតួចប៉ុណ្ណោះ។
ជាមួយគ្នានេះដែរ រថភ្លើងធុន Tohoku Shinkansen ដែលមានអ្នកដំណើរប្រហែល ១០០នាក់ នៅលើនោះបានធ្លាក់ផ្លូវរវាងស្ថានីយ៍ Fukushima ក្នុងទីក្រុង Fukushima និងស្ថានីយ៍ Shiroishizao ក្នុងទីក្រុង Miyagi ប៉ុន្តែមិនមានអ្នករងរបួសនោះទេ នេះបើយោងតាមក្រុមហ៊ុន East Japan Railway Co។
ក្រៅតែពីរថភ្លើងខាងលើបានជួបគ្រោះថ្នាក់នោះ ក៏បានបង្កឲ្យមានផលប៉ះពាល់ជាច្រើនផ្សេងទៀងផងដែរដូចជា ហេដ្ឋារចនាសម្ព័ន្ធមួយចំនួនត្រូវបានបំផ្លាញ ពលរដ្ឋប្រហែលជា ២លាននាក់គ្មានអគ្គិសនីប្រើប្រាស់ ខណៈចរន្តដឹកជញ្ចូនមួយចំនួនត្រូវបានកាត់ផ្តាច់ផងដែរ ៕