រាជធានីភ្នំពេញ ៖ ទីតាំងបើកល្បែងស៊ីសង តាមប្រព័ន្ធអនឡាញមួយកន្លែងយ៉ាងធំ នៅតាមបណ្ដោយផ្លូវ៧០ស្ទួន ស្ថិតនៅក្នុងសង្កាត់ស្រះចក ខណ្ឌដូនពេញ រាជធានីភ្នំពេញ មានបម្រើសេវាល្បែងស៊ីងគ្រប់ប្រភេទ មានទាំងចាក់ផ្ទាល់ និងឡាយផ្ទាល់ មិនចាញ់កាស៊ីណូប៉ុន្មានឡើយ។ទីតាំងបើកល្បែងស៊ីសងនេះ ភ្នាក់ងារ «KBN» បានចុះទៅពិនិត្យ និងថតផ្ទាល់ ហើយពិតជាបានឃើញមានល្បែងស៊ីសងជាច្រើនប្រភេទ ចង់លេងអ្វី ក៏មានដែរ ពោលគឺនៅទីនោះ មានល្បែងស៊ីសងស្ទើរគ្រប់ប្រភេទតែម្តង ដោយមិនឲ្យភ្ញៀវចូលទៅខកបំណងទេ តែអ្នកចេញមកវិញ កម្រមានមុខញញឹមណាស់ ។ប្រជាពលរដ្ឋដែលរស់នៅទីតាំងនោះ បានបង្ហើបឲ្យដឹងថា ទីតាំងល្បែងស៊ីសងនេះ បានបើកលេងជាយូរណាស់យកហើយ ដោយពង្វក់ពលរដ្ឋខ្មែរឲ្យធ្លាក់ក្នុងរណ្តៅល្បែងស៊ីសង លែងគិតពីការងាររកប្រាក់ចិញ្ចឹមជីវិត ឃើញតែមកពពាក់ពពូនគ្នាលេងរាល់ថ្ងៃ ហើយមានពេលខ្លះ មានកើតអំពើហិង្សាទៀតផង។ តែឆ្ងល់មិនឃើញអាជ្ញាធរខណ្ឌដូនពេញ និងសមត្ថកិច្ចនៃអធិការដ្ឋាននគរបាលខណ្ឌដូនពេញ ចុះទៅបង្រ្កាបសោះ សង្ស័យតែចាញ់បារមីម្ចាស់ទីតាំងល្បែងស៊ីសង បណ្តោយឲ្យបទល្មើសល្បែងស៊ីសងកើតមានក្នុងដែនសមត្ថកិច្ចរបស់ខ្លួនបានយ៉ាងរលូន។សូមបញ្ជាក់ថា កន្លងមក ប្រមុខថ្នាក់ដឹកនាំ ធ្លាប់បានបញ្ជាឲ្យបិទទាំងអស់រាល់បទល្មើសល្បែងស៊ីសង ជាពិសេស ហ្គេមបាញ់ត្រី និងមិនអនុញ្ញាតឲ្យស្ថាប័នពាក់ព័ន្ធ ចេញលិខិតអនុញាត បើកអាជីវកម្ម ល្បែងស៊ីសងប្រភេទនេះទៀតឡើយ។ តែយ៉ាងណា គេសង្កេតឃើញថា នៅភូមិសាស្រ្តរាជធានី នៅតែមានក្រុមឆ្លៀតឱកាស ធ្វើការឃុបឃិតគ្នា ជាមួយមន្រ្តីមួយចំនួនតូច លួចបើកល្បែងស៊ីសង នៅតាមមូលដ្ឋាន ដែលជាប្រភពនៃអំពើចោរកម្ម និងបទល្មើសផ្សេងៗ៕ ដោយ កែន សុខគីម
https://youtu.be/__-CLgsU23g