រាជធានីភ្នំពេញ៖ កាលពីពេលថ្មីៗនេះមានវីដេអូខ្លីមួយ បង្ហាញអំពីសកម្មភាពរបស់បងប្អូនជាម្ចាស់រថយន្តមួយចំនួនដែលបានបើកបររុលប្រជ្រៀតគ្នា គ្មានស្គាល់គន្លង ហើយបង្កការកកស្ទះនៅកំណាត់ផ្លូវជាតិលេខ៤ ។
វីដេអូខ្លីដែលមានរយៈពេលប្រមាណជិត៣នាទីនេះ ត្រូវបានអ្នកលេងបណ្តាញសង្គមចែកចាយយ៉ាងផុសផុល កាលពីថ្ងៃទី១ ខែមករា ឆ្នាំ២០២២ ម្សិលមិញនេះ និងមានបងប្អូនមួយចំនួនបានបញ្ចេញមតិរិះគន់យ៉ាងចាស់ដៃតែម្តង ព្រោះតែទិដ្ឋភាពក្នុងវីដេអូខ្លះនោះ បានបង្ហាញយ៉ាងច្បាស់អំពីការកកស្ទះពេញមួយទំហឹង ហើយរុលទៅមុខមិនរួច ដែលកត្តានេះបង្កឱ្យឡើងដោយម្ចាស់រថយន្តមួយចំនួន ដែលបញ្ជាចង្កូតរថយន្តលើដងផ្លូវជាតិលេខ៤ ក្នុងទិសដៅចូលក្រុងភ្នំពេញ ដោយបានបើកបរមិនគោរពច្បាប់ចរាចរណ៍បន្តិចសោះ គឺបំពានគន្លងអ្នកមកពីទិសដៅផ្ទុយគ្នា ដោយរថយន្តឡើងដល់៦ជួរ បិទផ្លូវអ្នកបើកបរក្នុងទិសដៅផ្ទុយ (ទិសដៅចូលទៅខេត្តព្រះសីហនុ) ទាំងស្រុងតែម្តង។
យ៉ាងណាមិញនៅយប់ថ្ងៃទី០២ ខែមករា ឆ្នាំ២០២២នេះ តាមរយៈផេក «អ្នកប្រមាញ់ចរាចរណ៍» បានចែករំលែកបន្តអំពីខ្លឹមសាររបស់ ឯកឧត្តម ឌី វិជ្ជា អគ្គស្នងការរងនគរបាលជាតិ ពីគ្រុបតេលេក្រាម ដោយមានខ្លឹមសារទាំងស្រុងថា៖
«សំណូមពរដល់សមត្ថកិច្ចប៉ូលិសតាមបណ្តាខេត្ត ដែលមានស្ថានភាពបើកបរបំពានមកលើគំនូសអាទិភាពរបស់គេបែបនេះ មេត្តាបញ្ចេញកណ្តាប់ដៃចុះទៅថតស្លាកលេខរថយន្ត ដែលបានបំពានអស់នោះហើយសរសេរបង្កាន់ដៃផាកពិន័យជាទម្ងន់ដល់ម្ចាស់យានយន្តទាំងនោះផង។ បើមិនធ្វើការព្រមានដោយផាកពិន័យបែបនេះទេ នោះគឺបញ្ហាដដែលៗវានឹងនៅតែកើតឡើងលើទ្រូងផ្លូវរបស់ប្រទេសយើងជាក់ជាមិនខាន ខណៈវិធានខាងលើនេះ គឺជាសំណូមពររបស់មហាជនភាគច្រើនដែលគាត់និយមបើកបរគោរពច្បាប់» ៕
សូមប្រិយមិត្តអញ្ជើញទស្សនាវីដេអូ ដូចខាងក្រោម៖