រាជធានីភ្នំពេញ៖ ភ្លាមៗក្រោយតារាចម្រៀង និងសម្ដែងបែបកំប្លែងលោក អៀង ចេនឡា បានប្រកាសបញ្ចប់រឿងទោមនស្សអំពីកង្វះចន្លោះការឧបត្ថម្ភខ្លួនរួមរឹតដោយជំងឺ ក្រោមការដឹកនាំសមាគមសិល្បករខ្មែររបស់អ្នកនាង ចន ច័ន្ទលក្ខិណា ស្រាប់តែលោកបានលើកយកសំណេរម្ដាយអ្នកនាងមកពណ៌នាថា ជាការបន្ថែមភ្លើងសង្គ្រាមពាក្យសម្ដីក្នុងបណ្ដាញសង្គម។
ភ្ជាប់នឹងរូបភាពថតពីអេក្រង់ទូរស័ព្ទបង្ហាញសំណេរមតិអ្នកស្រី វ៉ាន់ ដានី ម្ដាយអ្នកនាង ចន ច័ន្ទលក្ខិណា នាយ ចេនឡា តារាប្រុសត្រូវជំងឺប្រែរូបឆោមសង្ហាមកជាស្គមស្គាំងរូបនេះបានសរសេរថា៖ «ម៉ាក់អ៊ំ ចាស់ទុំ បានសម្រួលឱ្យបញ្ចប់ត្រឹមហ្នឹងហើយ ម៉ាក់អ៊ំចង់មកបន្ថែមភ្លើងទៀតមែន ឬចង់ឱ្យមានរឿងបន្តទៀត។ ធម្មតាកូនស្រីរបស់ម៉ាក់អ៊ំ អ៊ំតែងតែកាន់ជើងលើកស្ទួយអ៊ីចឹងហើយ ទោះជាធ្មប់ ក៏ថាជាទេពអប្សរដែរ»។
លោក ចេនឡា បន្តថា៖ «CH Moly [គណនីហ្វេសប៊ុកម្ដាយអ្នកនាង ចនច័ន្ទ] សុំសួរម៉ាក់អ៊ំ តារាល្បីៗដែលកូនម៉ាក់អ៊ំត្រាក់ៗទៅសួរសុខទុក្ខកន្លងមកហ្នឹងគេមានផ្ដល់ដំណឹងឱ្យខាងសមាគមអត់ ខ្ញុំឈឺ ខ្ញុំផូស្ត រហូតដល់គេចុះផ្សាយព័ត៌មានពេញហ្នឹង តែកូនអ៊ំគ្មានពេលមើលទេ បើពេលដើរផឹកស៊ី ចូលខមមិនរូបបក្ខពួកទើបមាន អ៊ីចឹងមែនចរិតជាប្រធានដឹកនាំគេ»។
ឆ្លើយតបនឹងការបង្ហោះរបស់នាយ ចេនឡា ខាងលើនេះ អ្នកនាង ចន ច័ន្ទលក្ខិណា ដែលលើកហេតុផលថា អ្នកនាងមិនមានពេលលេងហ្វេសប៊ុក ២៤ ម៉ោង ដើម្បីតាមដានគ្រប់ការបង្ហោះថ្លាថ្លែងសុខទុក្ខរបស់មនុស្សគ្រប់ៗគ្នានោះ បានសម្ដែងការហួសចិត្តដែលម្ដាយអ្នកនាងត្រូវបានយកមកពាក់ព័ន្ធនឹងបញ្ហានេះ។
ប្រធានសមាគមសិល្បករខ្មែរដែលកាន់តំណែង តាមរយៈការបោះឆ្នោតជ្រើសរើសក្នុងខែកក្កដា ២០១៧ រូបនេះបានបរិយាយថា៖ «ដល់អ៊ីចឹង ខ្ញុំមានតែហួសចិត្ត លែងស្គាល់ចាស់ទុំអស់ហើយ ខ្ញុំមិនតបតអ្នកទេ។ ខ្ញុំយកពេលធ្វើការងារ។ អ្នកធ្វើតាមសប្បាយចុះ។ អ្នកដទៃចូលខមមិនអ្នកមិនថតយកមកបង្ហោះទេ អ្នកយកតែខមមិនម្តាយរបស់ខ្ញុំ មានបំណងអ្វីសូមគិតតាមការគួរ»។
អ្នកនាង ចន ច័ន្ទលក្ខិណា បានបន្តថា៖ «សុំទោសអ្នកម្តាយ ដោយសារតួនាទីធ្វើឱ្យគេដៀលម៉ាក់»។
គួររំឭកថា តារាចម្រៀង និងសម្ដែងលោក ចេនឡា បានធ្វើឱ្យមហាជនភ្ញាក់ផ្អើលនឹងការប្រែប្រួលរូបសម្បត្តិរបស់លោក ដោយខ្លះប្រដូចសម្រស់មុន និងក្រោយធ្លាក់ខ្លួនឈឺ បីដូចជាមនុស្ស ២ នាក់ផ្សេងគ្នា។