បរទេស៖ ប្រធានាធិបតីសហរដ្ឋអាមេរិកលោក Joe Biden បាននិយាយកាលពីថ្ងៃចន្ទថា លោក «មិនងាករេដាច់ខាត» ពីសេចក្តីសម្រេចរបស់លោកក្នុងការដកកងកម្លាំងសហរដ្ឋអាមេរិកចេញពីប្រទេសអាហ្វហ្គានីស្ថាន នៅក្នុងការថ្លែងជាសាធារណៈជាលើកដំបូងចាប់តាំងពីក្រុមឧទ្ទាមតាលីបង់ដណ្តើមបានការគ្រប់គ្រងប្រទេសនៅអាស៊ីខាងត្បូងមួយនេះបានទាំងស្រុងមក។
នៅក្នុងសុន្ទរកថាផ្សាយតាមទូរទស្សន៍ពីសេតវិមាន ទៅកាន់ប្រទេសជាតិអាមេរិក លោក Biden បញ្ជាក់ថា បេសកកម្មអាមេរិកនៅអាហ្វហ្គានីស្ថាន «មិនដែលមានបំណងដើម្បីកសាងប្រទេសជាតិនោះទេ» ហើយការគំរាមកំហែងពីភេរវកម្មដែលជាកត្តានាំឲ្យសហរដ្ឋអាមេរិកមានវត្តមាននៅអាហ្វហ្គានីស្ថាននោះ ឥឡូវបានរីកសាយហួសពីប្រទេសអាហ្វហ្គានីស្ថានទៅកាន់ប្រទេសផ្សេងៗទៀតទៅហើយ។
លោកប្រធានាធិបតីអាមេរិកក៏បានទទួលស្គាល់ថា ការដួលរលំនៃរដ្ឋាភិបាភិបាលអាហ្វហ្គានីស្ថាននិងជ័យជម្នះរបស់ក្រុមតាលីបង់នៅទូទាំងប្រទេសនេះ បានកើតឡើង«លឿនជាងការរំពឹងទុករបស់យើង»។
ទោះជាយ៉ាងនេះក្តី ក៏លោក Biden ថ្លែងថា វាជាការមិនត្រឹមត្រូវទេ ដែលបញ្ជាឱ្យទាហានអាមេរិកបន្តប្រយុទ្ធ នៅពេលទាហានអាហ្វហ្គានីស្ថានខ្លួនឯងមិនមានឆន្ទៈប្រយុទ្ធនោះ ដោយលោកបញ្ជាក់ថា ព្រឹត្តិការណ៍វិវត្តក្នុងរយៈពេលប៉ុន្មានសប្តាហ៍ចុងក្រោយដែលបង្ហាញពីការបរាជ័យយ៉ាងឆាប់រហ័សរបស់កងកម្លាំងរដ្ឋាភិបាលអាហ្វហ្គានីស្ថាន កាន់តែគាំទ្របន្ថែមនូវសេចក្តីសម្រេចរបស់លោកក្នុងការដកទ័ពអាមេរិកចេញ ៕
