ព្រឹត្តិការណ៍កីឡាអូឡាំពិករដូវក្ដៅ នាទីក្រុងតូក្យូ ឆ្នាំ២០២០ (Tokyo Olympic Games 2020) នៅប្រទេសជប៉ុន បានប្រារព្ធពិធីបិទការប្រកួតជាផ្លូវការហើយ នៅរាត្រីថ្ងៃអាទិត្យនេះ ក្រោយដំណើរការប្រកួតដោយជោគជ័យរយៈពេល ១៧ថ្ងៃ ចាប់ពីថ្ងៃទី២៣ ខែកក្កដា រហូតដល់ថ្ងៃទី០៨ ខែសីហា ឆ្នាំ២០២១ បន្ទាប់ពីធ្វើការពន្យារពេលអស់ ១ឆ្នាំ ដោយសារវិបត្តិកូវីដ-១៩។
ទោះបីការប្រកួតកីឡាអូឡាំពិកឆ្នាំនេះ បានធ្វើឡើងតាមគន្លងថ្មី នៃបរិបទកូវីដ-១៩ ប៉ុន្ដែបណ្ដាប្រទេសលើពិភពលោក រួមទាំងកម្ពុជា បានបញ្ចូនប្រតិភូ និងអត្តពលិករបស់ខ្លួនចូលរួម ដើម្បីអបអរសាទរម្ចាស់ផ្ទះជប៉ុន ដែលរៀបចំព្រឹត្តិការណ៍កីឡាពិភពលោក ៤ឆ្នាំម្ដងនេះ ក្នុងនាមមហាគ្រួសារកីឡាអូឡាំពិកអន្ដរជាតិ រហូតទទួលបានជោគជ័យ និងបញ្ចប់ដោយរលូន។
ចំពោះលទ្ធផលការប្រកួតវិញ សហរដ្ឋអាមេរិក បានជាប់លេខ១ ជាប្រទេសដណ្ដើមបានមេដាយច្រើនជាងគេសរុប ១១៣គ្រឿង ក្នុងនោះមេដាយមាស ៣៩, ប្រាក់ ៤១ និងសំរឹទ្ធ ៣៣ ខណៈចិន ឈរចំណាត់ថ្នាក់លេខ២ ដណ្ដើមបានមេដាយសរុប ៨៨គ្រឿង មានមេដាយមាស ៣៨, ប្រាក់ ៣២ និងសំរឹទ្ធ ១៨ និងចំណាត់ថ្នាក់លេខ៣ គឺម្ចាស់ផ្ទះជប៉ុន ដែលដណ្ដើមមេដាយសរុប ៥៨គ្រឿង មានមេដាយមាស ២៧, ប្រាក់ ១៤ និងសំរឹទ្ធ ១៧។
សូមបញ្ជាក់ថា ក្នុងព្រឹត្តិការណ៍ប្រវត្តិសាស្ដ្រ នាទីក្រុងតូក្យូនេះ កម្ពុជាបានបញ្ជូនអត្តពលិក ៣រូបចូលរួម តាមរយៈការទទួលបានសិទ្ធិអនុគ្រោះពីសហព័ន្ធអន្ដរជាតិ រួមមានកីឡាហែលទឹក ២រូប គឺកីឡាករ ហែម ប៉ុច និងកីឡាការិនី ឃឺន ប៊ុនពេជ្រមរកត និងកីឡាករអត្តពលកម្មម្នាក់ គឺកីឡាករ ប៉ែន សុខគង់ ក្រោមការដឹកនាំរបស់ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជានាយបេសកកម្ម៕
ប្រភព: CAMBODIA SEA GAMES 2023