រាជធានីបាងកក៖ បច្ចុប្បន្ននេះ អតីតរាជិនីសម្ផស្សរបស់សៀម មានវ័យ១០០ឆ្នាំ ទើបនឹងទទួលបានការចាក់វ៉ាក់សាំងបង្ការកូវីដ-១៩ AstraZeneca នូវដូសទី១ កាលពីថ្ងៃចន្ទ (ទី២១ ខែមិថុនា) នៅទីក្រុងបាងកក។
សារព័ត៌មានថៃ (The Nation) បានចេញផ្សាយ នៅថ្ងៃទី២២ ខែមិថុនា ថា បើតាមទំព័របណ្ដាញសង្គម Dara Papayon (Movie Stars) បានឲ្យដឹង កាលពីថ្ងៃចន្ទ ថា អតីតរាជិនីសម្ផស្សរបស់សៀម (បច្ចុប្បន្នប្រែឈ្មោះជាថៃ) មានវ័យ១០០ឆ្នាំ បានទទួលការចាក់វ៉ាក់សាំងបង្ការកូវីដ-១៩ AstraZeneca នូវដូសទី១របស់អ្នកស្រី នៅក្នុងមន្ទីរពេទ្យ Theptarin ស្ថិតក្នុងទីក្រុងបាងកក។
អ្នកស្រី Wanee Somprasong មានវ័យ១០០ឆ្នាំ ហើយត្រូវគេចាត់ទុកថា ជាស្រ្ដីវ័យចំណាស់ជាងគេម្នាក់របស់ប្រជាពលរដ្ឋថៃ ដែលបានទទួលការចាក់វ៉ាក់សាំងបង្ការកូវីដ-១៩ ស្ថិតក្នុងទីក្រុងបាងកក។ អ្នកស្រីបានឈ្នះការប្រកួតបវរកញ្ញា Nasao Siam (Miss Siam) នៅក្នុងឆ្នាំ១៩៣៥។
ការប្រកួតបវរកញ្ញា Nasao Siam នេះ បានប្រារព្ធធ្វើឡើង ជាលើកដំបូង នៅក្នុងឆ្នាំ១៩៣៤ បន្ទាប់ពីមានបដិវត្ដន៍របស់ជនជាតិសៀម (The Siamese Revolution) នៅក្នុងឆ្នាំ១៩៣២ ដែលជាផ្នែកមួយ នៃការរំឭកដល់រដ្ឋធម្មនុញ្ញ នៅក្នុងប្រទេសថៃ។ លុះមកដល់ឆ្នាំ១៩៣៩ កម្មវិធីប្រឡងបវរកញ្ញានោះ ក៏ត្រូវបានប្ដូរឈ្មោះទៅជា «Nangsao Thai (Miss Thailand)» ហើយប្រទេសសៀម ក៏ត្រូវប្រែឈ្មោះថ្មីជា ថៃ (Thailand) នៅឆ្នាំនោះដែរ។
ការប្រកួតបវរកញ្ញានេះ ត្រូវបានរៀបចំឡើង ជារៀងរាល់ឆ្នាំ ចាប់តាំងពីពេលនោះមក។ កញ្ញា Wanee Somprasong ក៏បានឈ្នះជាបវកញ្ញាលេខ២ នៃការប្រកួតនោះ។ ចំណែកកញ្ញា Kanya Tiansawang បានឈ្នះការប្រកួត នៅក្នុងព្រឹត្ដិការណ៍នោះ នាឆ្នាំ១៩៣៤៕
