បរទេស៖ ក្រុមសង្គមងងឹតបានលួចផលិតវ៉ាក់សាំងក្លែងក្លាយ ហើយត្រូវបានអាជ្ញាធរចិន នៅខេត្តជាងស៊ូ ទីក្រុងប៉េកាំង និងខេត្តសានដុង បង្រ្កាប និងចាប់ខ្លួនជាង៨០នាក់ ហើយរឹបអូសបានវ៉ាក់សាំងក្លែងក្លាយ ជាង៣ ០០០ដូស។
ក្រសួងសន្តិសុខជាតិចិន បានឲ្យដឹងថា កាលពីថ្មីៗនេះ អាជ្ញាធរចិនបានបើកយុទ្ធនាការបោសសម្អាតក្រុមជនល្មើសពាក់ព័ន្ធនឹងការផលិត ចែកចាយវ៉ាក់សាំងក្លែងក្លាយ និងសកម្មភាពខុសច្បាប់ជាច្រើនផ្សេងទៀត ពាក់ព័ន្ធនឹងវ៉ាក់សាំង។ នៅក្នុងប្រតិបត្ដិការនេះ អាជ្ញាធរចិនបានឃាត់ខ្លួនក្រុមជនល្មើស ជាង៨០នាក់ រួមនឹងវត្ថុតាងផងដែរ។
ប្រភពព័ត៌មានដដែល បានបន្ដថា ក្រុមបណ្ដាញសង្គមងងឹត បានផលិត និងជួញដូរវ៉ា់ក់សាំងក្លែងក្លាយ ដោយរកបានប្រាក់ចំណូលយ៉ាងច្រើន។ ដោយឡែកការផលិតវ៉ាក់សាំងរបស់ពួកគេ គឺប្រើប្រាស់ទឹកអំបិលសរីរវិទ្យា (Physiological saline) ធ្វើជាវ៉ាក់សាំងក្លែងក្លាយ រួចហើយនាំចេញទៅលក់នៅលើទីផ្សារ នៅក្នុងតម្លៃខ្ពស់ ចាប់តាំងពីខែកញ្ញា ឆ្នាំ២០២០ រហូតមកទល់នឹងពេលនេះ។
ប្រភពព័ត៌មានដដែល បានបន្ថែមថា ក្រៅពីនេះ ក្រុមជនល្មើសបានបន្លំឯកសារ ធ្វើជាក្រុម មកពីមជ្ឈមណ្ឌលគ្រប់គ្រងជំងឺឆ្លង ដើម្បីទាញយកផលប្រយោជន៍ពីប្រជាពលរដ្ឋ។ សកម្មភាពរបស់ជនល្មើស បានបន្លំភ្នែកធ្វើឡើង ស្របពេលរដ្ឋាភិបាលចិនកំពុងខិតខំចាក់វ៉ាក់សាំងប្រឆាំងនឹងកូវីដ-១៩ នៅក្នុងសហគមន៍ ដើម្បីទប់ស្កាត់ការឆ្លងរាលដាលកូវីដ-១៩ ។ ប៉ុន្ដែសកម្មភាពនេះ ត្រូវបានអាជ្ញាធរចិនបង្រ្កាបទាន់ពេល។
បើតាមគេហទំព័រ Worldometer បានចេញផ្សាយ នៅព្រឹក ថ្ងៃទី៣ ខែកុម្ភៈ ឆ្នាំ២០២១ថា ប្រទេសចិនមានអ្នកឆ្លងកូវីដ-១៩ ចំនួន ៨៩ ៦១៩នាក់ ស្លាប់ ៤ ៦៣៦នាក់ អ្នកព្យាបាលជាសះស្បើយ ៨៣ ៤៦៧នាក់ និងអ្នកកំពុងសម្រាកព្យាបាល ១ ៥១៦នាក់ ហើយក្នុងនោះមានអ្នកឈឺធ្ងន់ ៦៦នាក់។ ប៉ុន្ដែរហូតមកដល់ពេលនេះ រដ្ឋាភិបាលចិនបានចាក់វ៉ាក់សាំងកូវីដជូនពលរដ្ឋបាន ចំនួន២៤លាននាក់៕