រាជធានីភ្នំពេញ៖ រហូតមកដល់ពេលនេះ កម្ពុជាបានបង្កើនការនាំចេញស្វាយកែវរមៀត ទាំងស្រស់ និងក្រៀម ទៅកាន់ទីផ្សារអន្ដរជាតិ រួមមាន ប្រទេសមហាអំណាចសេដ្ចកិច្ចលេខ២របស់ពិភពលោក (ចិន) និងកូរ៉េខាងត្បូង ជាដើម។
អគ្គនាយកដ្ឋានកសិកម្ម បានចេញរបាយការណ៍ កាលពីថ្ងៃទី១៦ ខែធ្នូ ឆ្នាំ២០២១ ថា រហូតមកដល់ពេលនេះ នៅក្នុងប្រទេសកម្ពុជា មានផ្ទៃដីដាំដុះស្វាយ សរុប ១២៤ ៣១៩ហិកតា, ផ្ទៃដីប្រមូលផល មានចំនួន ៩១ ៣៩៨ហិកតា ដោយទទួលបានទិន្នផលជាមធ្យមចំនួន ១៦តោនក្នុង១ហិកតា និងក្នុង១រដូវ។ បើគិតពីទិន្នផលសរុប មានបរិមាណ ១ ៤៤៨ ៦៧៧តោន។
របាយការណ៍ដដែល បានបន្ដថា ដើម្បីអនុវត្តតាមគោលនយោបាយរបស់រាជរដ្ឋាភិបាល ក្នុងការជំរុញផលិតកម្មកសិកម្ម ដើម្បីធានាសន្តិសុខស្បៀង និងការនាំចេញ ក៏ដូចជា ការទ្រទ្រង់ខឿនសេដ្ឋកិច្ចជាតិ នៅក្នុងបរិបទ នៃការរីករាលដាលជាសកល នៃជំងឺឆ្លងកូវីដ-១៩នេះ ក្រសួងកសិកម្ម រុក្ខាប្រមាញ់ និងនេសាទ បានខិតខំពុះពារ និងចរចាយ៉ាងស្វិតស្វាញ បញ្ចុះបញ្ចូល និងដោះស្រាយរាល់បញ្ហា ជារបាំងបច្ចេកទេស នៅក្នុងដំណើរការនាំចេញផ្លែស្វាយកែវរមៀតស្រស់ទៅកាន់សាធារណរដ្ឋកូរ៉េ។ ជាលទ្ធផល ក្នុងរយ:ពេល៤ឆ្នាំមកនេះ កម្ពុជាបាននាំចេញផលិតផលផ្លែស្វាយកែវរមៀតស្រស់ទៅកាន់ប្រទេសកូរ៉េ ជាលើកដំបូង នៅថ្ងៃទី១៥ ខែមករា ឆ្នាំ២០២០។ នេះបើតាមការអះអាងរបស់អគ្គនាយកដ្ឋានកសិកម្ម (ថ្ងៃទី០១ ខែកុម្ភ:) ហើយគិតត្រឹមថ្ងៃទី១៥ ខែមករា ដល់ថ្ងៃទី២៤ ខែមេសា ឆ្នាំ២០២០) កម្ពុជាបាននាំចេញផ្លែស្វាយស្រស់មានគុណភាពល្អ ចំនួន៧៧តោនទៅដាក់លក់នៅលើទីផ្សារកូរ៉េ។
ដោយឡែក សម្រាប់ដើមឆ្នាំ២០២១នេះ ក្រុមហ៊ុន Hyundai Agro (Cambodia) មានផែនការបង្កើនការនាំចេញផ្លែស្វាយកែវរមៀតស្រស់ ចំនួន ១ ០០០ តោនទៅកាន់ទីផ្សាររបស់កូរ៉េខាងត្បូង។
បើយោងលើខ្លឹមសារ ដែលមានចែង នៅក្នុងអនុស្សរណៈនៃការយោគយល់គ្នា រវាងអគ្គនាយកដ្ឋានកសិកម្ម និងទីភ្នាក់ងារអនាម័យ និងភូតគាមអនាម័យកូរ៉េ ស្តីពី «លក្ខខណ្ឌតម្រូវអនាម័យ និងភូតគាមអនាម័យសម្រាប់ការនាំចេញផ្លែស្វាយស្រស់» គឺតម្រូវឲ្យមានការចុះត្រួតពិនិត្យ និងវាយតម្លៃលើការអនុវត្តបច្ចេកទេស នៅក្នុងចម្ការស្វាយជារៀងរាល់ឆ្នាំ មុនរដូវប្រមូលផល។
ជាមួយគ្នានេះ នាយកដ្ឋានការពារដំណាំអនាម័យ និងភូតគាមអនាម័យ បានចាត់មន្រ្តីជំនាញចុះទៅវាយតម្លៃអំពីលក្ខខណ្ឌបច្ចេកទេស ពាក់ព័ន្ធនឹងចម្ការស្វាយ និងម៉ាស៊ីនប្រព្រឹត្តិកម្មសម្លាប់សមាសភាពសត្វចង្រៃ ដោយប្រើចំហាយទឹកក្តៅ (Vapor Heat Treatment -VHT) នៅតាមក្រុមហ៊ុននីមួយៗ ដែលបានដាក់ពាក្យស្នើសុំ។ បើតាមលទ្ធផលទទួលបានអំពីការចុះវាយតម្លៃនោះ អគ្គនាយកដ្ឋានកសិកម្មបានផ្ញើបាយការណ៍ជូនទៅទីភ្នាក់ងារអនាម័យ និងភូតគាមអនាម័យ នៃប្រទេសកូរ៉េ ដើម្បីពិនិត្យ និងសម្រេច។
បន្ទាប់ពីទទួលបានការយល់ព្រមពីភាគីកូរ៉េ កាលពីថ្ងៃទី១៣ ខែមករា ឆ្នាំ២០២១ ក្រុមហ៊ុន Hyundai Agro (Cambodia) បានដាក់ពាក្យស្នើសុំឲ្យនាយកដ្ឋានការពារដំណាំ អនាម័យ និងភូតគាមអនាម័យ ចាត់មន្រ្តីជំនាញចុះទៅត្រួតពិនិត្យ និងវាយតម្លៃលើលក្ខខណ្ឌបច្ចេកទេសក្នុងចម្ការស្វាយ ដើម្បីឲ្យស្របតាមលក្ខខណ្ឌតម្រូវភូតគាមអនាម័យរបស់ភាគីកូរ៉េខាងត្បូង។
ជាលទ្ធផល ឆ្លើយតបតាមលក្ខខណ្ឌ កាលពីថ្ងៃទី២០ ខែមករា ឆ្នាំ២០២១ ក្រុមហ៊ុនបាននាំស្វាយកែវរមៀតស្រស់ចេញទៅកាន់ប្រទេសកូរ៉េលើកទី១ ចំនួន១តោន ហើយសង្ឃឹមថាបរិមាណនេះនឹងមានការកើនឡើង ជាបន្តបន្ទាប់ នៅរដូវប្រមូលផលស្វាយ៕
