ក្រុមលោក Ole បានត្រៀមខ្លួនរួចជាស្រេចក្នុងការនាំយកកីឡាករ Declan Rice មកចូលរួមនៅទឹកដី Old Trafford ក្នុងខែមករានេះ៕ កីឡាករវ័យ ២២ឆ្នាំបង្ហាញទម្រង់លេងបានយ៉ាងល្អក្នុងរដូវកាល ២០២០-២០២១នេះ ដោយរូបគេបង្ហាញខ្លួនបាន ១៩ប្រកួត និងលេងបានពេញ ៩០នាទីពេញទាំង ១៩ប្រកួតនោះ អោយក្រុមញញួរយក្ស West Ham៕ អតីតកីឡាកររបស់ក្រុមតោខៀវ Chelsea រូបនេះនៅសល់កិច្ចសន្យាជាមួយក្រុម West Ham រហូតដល់ឆ្នាំ ២០២៤៕ គ្រូបង្វឹក Chelsea លោក Frank Lampard មានបំណងនាំយកកីឡាករវ័យក្មេងនេះទៅរួមនៅកីឡាដ្ឋាន Stamford Bridge៕ ប៉ុន្តែយោងទៅតាមសារព័ត៌មាន ESPN បានចុះផ្សាយថា ក្រុមបិសាចក្រហមគ្រោងនឹងចំណាយ ៧០លានផោនលើកីឡាករ Declan Rice៕ ក៏ប៉ុន្តែកាលពីពេលថ្មីៗនេះសារព័ត៌មានដដែលបានរាយការណ៍ថា កីឡាករសញ្ជាតិអង់គ្លេសរូបនេះចង់ផ្លាស់ទៅទីក្រុងឡុងដ៍ ជាងផ្លាស់ទៅទីក្រុង Manchester៕
ប្រភព: Sportsmole