ភ្នំពេញ៖ ស្តូបមិត្តភាពកម្ពុជា-វៀតណាម១បន្ថែមទៀត ចាប់ផ្តើមបើកការដ្ឋានសាងសង់ នៅលើទឹកដីខេត្តត្បូងឃ្មុំ។ ពិធីក្រុងពាលីនៃការបើកការដ្ឋានសាងសង់ស្តូបមិត្តភាពថ្មីនេះ ត្រូវបានរៀបចំឡើង កាលពីថ្ងៃទី២០ ខែវិច្ឆិកា ឆ្នាំ២០២០។
បើតាមការចុះផ្សាយរបស់សារព័ត៌មានវៀតណាមឈ្មោះ VOV (Voice of Vietnam) ស្តូបមិត្តភាពកម្ពុជា-វៀតណាម លើទឹកដីខេត្តត្បូងឃ្មុំនេះ គឺជាស្តូបទី២២ហើយ ដោយគ្រោងសាងសង់លើផ្ទៃដីទំហំប្រមាណ៤ហិកតា។
អ្នកចូលរួមក្នុងពិធីបើកការដ្ឋានសាងសង់ស្តូបមិត្តភាពកម្ពុជា-វៀតណាម នៅខេត្តត្បូងឃ្មុំ មានដូចជា លោកវរសេនីយ៍ឯក ង្វៀន ថាញជិញ ប្រធានអនុព័ន្ធយោធាក្រសួងការពារជាតិវៀតណាមប្រចាំកម្ពុជា លោក ញ៉ែម វ៉ាលី អគ្គលេខាធិការនៃក្រុមប្រឹក្សាជាតិរណស្សិសាមគ្គីអភិវឌ្ឈន៍មាតុភូមិកម្ពុជា រួមទាំងអាជ្ញាធរខេត្ត បណ្តាស្ថាប័ន និង អង្គភាពពាក់ព័ន្ធផ្សេងទៀត។
VOV សរសេរថា៖«ស្តូបមិត្តភាពកម្ពុជា-វៀតណាម បង្ហាញពីសាមគ្គីភាពនៃប្រទេសទាំង២ ហើយនឹងជួយឲ្យយុវជនជំនាន់ក្រោយ យល់កាន់តែច្បាស់ពីតម្លៃនៃសន្តិភាពនិងសេរីភាព ព្រមទាំងការជួយគាំទ្រគ្នាទៅវិញទៅមក ដែលមានជាប្រវត្តិសាស្ត្រនៃប្រជាជាតិទាំង២»។
អត្ថបទនៃសារព័ត៌មាន VOV ជាភាសាវៀតណាម ដែលត្រូវស្ថានទូតវៀតណាមប្រចាំកម្ពុជា បកប្រែជាភាសាខ្មែរ ហើយបង្ហោះលើទំព័រហ្វេសប៊ុករបស់ខ្លួន បានឲ្យដឹងថា ស្តូបមិត្តភាពកម្ពុជា-វៀតណាមចំនួន១៧ តាមបណ្តាខេត្តនានា ត្រូវបានសាងសង់និងសម្ពោធរួចរាល់ហើយ ខណៈ៤ទៀត នៅខេត្តប៉ៃលិន ខេត្តព្រៃវែង ខេត្តកំពង់ស្ពឺ និង ខេត្តឧត្តរមានជ័យ ក៏ត្រូវបានបើកការដ្ឋានសាងសង់ដែរ។ VOV បញ្ជាក់ថា តាមការគ្រោងទុក ស្តូបមិត្តភាពកម្ពុជា-វៀតណាម ក្នុងខេត្តទាំង៤នេះ នឹងត្រូវរៀបចំសម្ពោធនៅចុងឆ្នាំ២០២០នេះ។
ជាទូតទៅ គេ ចាត់ទុកស្តូបមិត្តភាពកម្ពុជា-វៀតណាម ថាជាកន្លែងដែលរម្លឹកដល់ពលកម្មរបស់កងទ័ពកម្ពុជានិងកងទ័ពវៀតណាម ក្នុងការរួមគ្នារំដោះកម្ពុជា ពីរបបខ្មែរក្រហម៕