ខេត្តសៀមរាប៖ កាលពីថ្ងៃទី១៨ ខែវិច្ឆិកា ឆ្នាំ២០២០សមត្ថកិច្ចរដ្ឋបាលព្រៃឈើខេត្តសៀមរាប បានចុះធ្វើការឃាត់ខ្លួនស្រ្ដី៣រូប ពាក់ព័ន្ធនឹងករណីជួញដូរសត្វត្រចៀកកាំខុសច្បាប់ចំនួន ២៥០ ក្បាល។
ស្ត្រីសង្ស័យទាំង៣ នាក់នោះ រួមមាន ឈ្មោះ រៀម ស៊ីណាត អាយុ ៣៣ ឆ្នាំ រស់នៅភូមិគោកថ្មី ឃុំដូនកែវ ស្រុកពួក ខេត្តសៀមរាប ត្រូវបានឃាត់ខ្លួននៅផ្សារដើមក្រឡាញ់ ជាមួយនឹងវត្ថុតាងសត្វត្រចៀកកាំ ១៥ ក្បាល។ រីឯស្ត្រីឈ្មោះ សុខ ស្រីនាថ អាយុ ៣០ ឆ្នាំ រស់នៅភូមិកន្ត្រក សង្កាត់ស្វាយដង្គុំ ក្រុងសៀមរាប ត្រូវបានឃាត់ខ្លួននៅទីតាំងតែមួយជាមួយនឹងវត្ថុតាងសត្វត្រចៀកកាំ ១២៥ ក្បាល។ ចំណែកស្ត្រីម្នាក់ទៀតឈ្មោះ ម៉ន សាវឿន អាយុ ២៩ ឆ្នាំ រស់នៅភូមិកន្ត្រក សង្កាត់ស្វាយដង្គុំ ក្រុងសៀមរាប ត្រូវបានឃាត់ខ្លួននៅផ្សារលើជាមួយវត្ថុតាងសត្វត្រចៀកកាំ ១១០ ក្បាល។
តាមរយៈចម្លើយរបស់ស្ត្រី ឈ្មោះ ម៉ន សាវឿន ដែលបានប្រាប់មន្ត្រីជំនាញនៅពេលសាកសួរថា សត្វត្រចៀកកាំទាំងនោះគឺគាត់បានទិញពីពលរដ្ឋនៅក្នុងមូលដ្ឋាន ដែលពួកគេខ្លះបានប្រើលប់ ខ្លះប្រើមង រាយប៉ប្រះលើផ្ទៃទឹកដើម្បីចាប់វា ព្រោះវាចូលចិត្តហើរឆ្វែលលើផ្ទៃទឹក។
ជាមួយគ្នានេះដែរលោក ប៊ុនលីម បានបញ្ជាក់ឲ្យដឹងថា៖ «តាមរយៈការបំភ្លឺរបស់ស្ត្រីសង្ស័យ កម្លាំងមន្ត្រីជំនាញយើងនឹងបន្តកិច្ចសហការជាមួយអាជ្ញាធរមូលដ្ឋានចុះបង្ក្រាបករណីរាយមង ឬសំណាញ់ចាប់សត្វត្រចៀកកាំ ទៅដល់មូលដ្ឋានតែម្ដង។ បើមិនដូច្នោះទេ សត្វត្រចៀកកាំនឹងឈានទៅរកភាពផុតពូជមិនខាន»។
ក្រោយធ្វើការសាកសួរ និងអប់រំណែនាំឱ្យធ្វើកិច្ចសន្យាបញ្ឈប់ការជួញដូរសត្វព្រៃ មន្ត្រីជំនាញយើងបានសម្រេចផាកពិន័យអន្តរកាលទៅតាមនីតិវិធីច្បាប់ ចំណែកវត្ថុតាងសត្វត្រចៀកកាំ [បោចរោមរួច] សរុប ២៥០ ក្បាលត្រូវបាននាំយកទៅដុតបំផ្លាញចោល»។
ជុំវិញការឃាត់ខ្លួននេះ ក្រុមអ្នកធ្វើអាជីវកម្មផ្ទះសត្វត្រចៀកកាំបានសាទរ និងបានអំពាវនាវសុំឱ្យពលរដ្ឋបញ្ឈប់ការចាប់សត្វត្រចៀកកាំយកមកលក់ដូរ ឬយកមកបំពងលក់ ព្រោះសត្វប្រភេទនេះមានតម្លៃខ្ពស់ក្នុងវិស័យកសិកម្មផង និងពាណិជ្ជកម្មផង ៕