ខេត្តសៀមរាប៖ សត្វត្រចៀកកាំ គឺជាសត្វស្លាបមួយប្រភេទដែលមានកម្លាំងខ្លាំងក្លា ហើយមនុស្សទូទៅពុំសូវបានចាប់អារម្មណ៍ពីថាមពលរបស់សត្វស្លាបប្រភេទមួយនេះនោះទេ។ ហើយអ្វីដែលកាន់តែពិសេសនោះបច្ចុប្បន្ននេះទឹកមាត់សត្វត្រចៀក ត្រូវបានគេយកទៅប្រើប្រាស់នៅក្នុងជីវភាពរស់នៅប្រចាំថ្ងៃយ៉ាងសកម្ម ដែលវាគឺជាឱសថដ៏ពេញនិយមសាកស័ក្ដិបំផុត សម្រាប់ព្យាបាលរោគមួយចំនួន ព្រមទាំងផ្ដល់អត្ថប្រយោជន៌ជាច្រើនចំពោះសុខភាពផងដែរ និងមានប្រយោជន៍ច្រើនដល់សេដ្ឋកិច្ច និងជួយបំផ្លាញសត្វចង្រៃផ្សេងៗទៀតផងដែរ។
ដោយឡែកកាលពីពេលថ្មីៗនេះមានព័ត៌មានមួយបានលេចលឺថា សត្វត្រចៀកកាំកំពុងរងការយាយីបំផ្លិចបំផ្លាញដល់អាយុជីវិតពីសំណាក់ពលរដ្ឋរស់នៅខេត្តសៀមរាប និងខេត្តពោធិ៍សាត់ ដោយពួកគេបានប្រើលប់ ខ្លះប្រើមង រាយប៉ប្រះលើផ្ទៃទឹកដើម្បីចាប់វា ព្រោះវាចូលចិត្តហើរឆ្វែលលើផ្ទៃទឹក ហើយយកទៅដាក់នៅលើទីផ្សារយ៉ាងអនាធិបតេយ្យ ដែលទង្វើរបស់ពលរដ្ឋមួយចំនួននេះបានធ្វើឲ្យជីវិតរបស់សត្វត្រចៀកកាំនឹងឈានទៅរកភាពផុតពូជមិនខាន។
បើតាមលោក ឃី សុខសាន្ត អ្នកប្រកបអាជីវកម្មផ្ទះសត្វត្រចៀកកាំម្នាក់នៅខេត្តសៀមរាប បានប្រាប់សារព័ត៌មានយើងឲ្យដឹងថា សត្វត្រចៀកកាំ១ ក្បាលអាចរកចំណូលបាន១០ ដុល្លារ ក្នុង១ ឆ្នាំ ហើយសត្វនេះមានអាយុរហូតដល់១៥ ឆ្នាំ តែបើចាប់វាបោចលក់១ក្បាល ថ្លៃត្រឹមតែ២ ០០០ រៀលប៉ុណ្ណោះ។ ដូច្នេះមានការខាតបង់ខ្លាំងណាស់ ហើយនេះមិនទាន់គិតពីផលដែលវាត្រូវបន្តពូជក្នុងរយៈពេល ១៥ ឆ្នាំនៃការរស់នៅផង។
លោកបានបន្តទៀតថា៖ «សូមបញ្ឈប់ការចាប់សម្លាប់សត្វត្រចៀកកាំធ្វើជាម្ហូបអាហារ ហើយត្រូវតែរួមគ្នាការពារ និងអភិរក្សសត្វត្រចៀកកាំឱ្យបានកាន់តែច្រើនឡើងថែមទៀត»។
នៅពេលខាងមុខនេះ កម្ពុជានឹងបង្កើតរោងចក្រកែច្នៃទឹកមាត់សត្វត្រចៀកកាំដើម្បីនាំចេញទៅទីផ្សារចិនហើយពេលនោះនឹងត្រូវការកម្លាំងពលកម្មច្រើនដើម្បីបម្រើការងារនៅក្នុងរោងចក្រនោះ។ ដូច្នេះបើគ្មានសត្វត្រចៀកកាំ នោះវិស័យមួយនេះនឹងត្រូវរាំងស្ទះ ឬខាតបង់ទាំងស្រុង ៕
