ភ្នំពេញ៖ ក្នុងសន្និសីទមួយកាលពីថ្ងៃសុក្រ ទី២៣ ខែតុលា លោក Bilahari Kausikan អតីតមន្ត្រីការបរទេសសិង្ហបុរី បានលើកឡើងថាសមាគមប្រជាជាតិអាស៊ីអាគ្នេយ៍ ហៅកាត់អាស៊ាន គួរណាស់តែពិចារណាដកចេញនូវរដ្ឋសមាជិកចំនួនពីរ គឺកម្ពុជា និងឡាវ។
លោក Bilahari Kausikan បានថ្លែងឲ្យដឹងទៀតថា ទាំងលាវទាំងកម្ពុជា សុទ្ធតែបានត្រាប់តាមម្ដងទៀតនូវ«កំហុសនយោបាយ»ដែលមានមេរៀនរួចមកហើយកាលពីអំឡុងសង្គ្រាមវៀតណាម «កំហុសនោះគឺថា[កម្ពុជានិងឡាវ] សុខចិត្តបណ្ដែតបណ្ដោយអំណាចអន្តរាគមន៍ដែលខ្លួនមានទៅឱ្យមហាអំណាចខាងក្រៅ«មួយ» ឬពួកគេប្រកាន់អព្យាក្រឹតភាពតាមបែបអកម្ម»។ លោកពន្យល់ថាប្រទេសទាំងពីរសម្ងំយករួចខ្លួនលើបញ្ហាដែលកើតឡើងក្នុងតំបន់។
អតីតអ្នកការទូតរបស់រដ្ឋដ៏តូចជាងគេនៃតំបន់អាស៊ីអាគ្នេយ៍រូបនេះ បានបន្ថែមថា កម្ពុជានិងឡាវ មិនសូវជាយកចិត្តទុកដាក់អ្វីពេកទេទៅនឹងបញ្ហាសមុទ្រចិនខាងត្បូង តែខ្នះខ្នែងខ្លាំងពីបញ្ហាមេគង្គដ្បិតប៉ះពាល់ផ្ទាល់ដល់ជីវភាពសេដ្ឋកិច្ចរបស់ប្រជាជនដែលមានជាប់ពាក់ព័ន្ធប្រទាក់ក្រឡាជាមួយកត្តាស្លាប់រស់នៃរបបដឹកនាំនៅភ្នំពេញនិងវៀងចន្ទន៍។
លោកបញ្ជាក់ថា៖«យើងរង់ចាំមើលតទៅទៀត។ [ឡាវនិងកម្ពុជា] មានជម្រើសដ៏លំបាកដែលត្រូវសម្រេចជ្រើសយក ហើយបើប្រទេសទាំងពីរជ្រើសខុស ពួកគេនឹងត្រូវតទល់នឹងអាស៊ានទាំងមូលជាមួយនឹងជម្រើសលំបាកដែរ។ យើងប្រហែលជាត្រូវកាត់បន្ធូរចេញប្រទេសទាំងពីរ ដើម្បីសង្គ្រោះប្រទេសទាំងប្រាំបីផ្សេងទៀតដែលនៅសេសសល់» ៕