រាជធានីភ្នំពេញ៖ ព្យុះត្រូពិក ឈ្មោះ ម៉ូឡាវ (MOLAVE) នៅព្រឹក ថ្ងៃទី២៦ ខែតុលា ឆ្នាំ២០២០ បានរំកិលខ្លួន ចូលដល់ក្នុងសមុទ្រចិនខាងត្បូង ហើយប្រែខ្លួនទៅជាព្យុះទីហ្វុង (TY) បោកបក់យ៉ាងលឿន ហើយវាអាចនឹងមកនូវទឹកភ្លៀងច្រើន នៅខ្ពស់រាប នាភាគឦសាន ខ្ពង់រាបភាគខាងជើង តំបន់ទំនាបកណ្តាល ភាគពាយព្យ និងធ្វើឱ្យទឹកទន្លេមេគង្គ ងើបឡើងវិញ នៅចុងរដូវវស្សានេះ។
លោក ចាន់ យុត្ថា អ្នកនាំពាក្យ និងជារដ្ឋលេខាធិការ ក្រសួងធនធានទឹក និង ឧតុនិយម បានឱ្យដឹង នៅព្រឹកថ្ងៃទី២៦ ខែតុលា ឆ្នាំ២០២០ថា ព្យុះទី១៨ ឈ្មោះ MOLAVE ដែលក្រសួងបានជូនដំណឹង កាលពីថ្ងៃទី២៥ ខែតុលា នោះ ប៉ុន្ដែរហូតមកដល់ព្រឹកនេះ (ថ្ងៃទី២៦ ខែតុលា) វាបានរំកិលខ្លួនចូលដល់សមុទ្រចិនខាងត្បូង ហើយវានឹងប្រែក្លាយទៅជាព្យុះទីហ្វុង (TY) ដោយបោកបក់ក្នុងល្បឿនលឿន។
ព្យុះត្រូពិកមួយនេះ បានកើតឡើង បន្ទាប់ពីព្យុះទី១៧ ឈ្មោះ សូដែល បានឡើងគោក និងរលាយនៅលើតំបនភាគខាងជើង ភាគកណ្តាល នៃប្រទេសវៀតណាម ដោយពុំមានឥទ្ធិពលអ្វី មកដល់ប្រទេសកម្ពុជានោះទេ ។ ប៉ុន្ដែទោះជាយ៉ាងណា ករណីនេះ លោក ចាន់ យុត្ថា បាបន្ថែមថា ប្រសិនបើវាគ្មានការប្រែប្រួល អំពីការព្យាករណ៍ នាពេលនេះ វានឹងនាំមកនូវទឹកភ្លៀងច្រើន លាយឡំនឹងខ្យល់ ធ្វើឱ្យប៉ះពាល់ដល់តំបន់ខ្ពង់រាប តំបន់ឦសាន តំបន់ខ្ពង់រាបភាគខាងជើង តំបន់ទំនាបកណ្តាល ភាគពាយព្យផងដែរ។
រហូតមកដល់ពេលនេះ ក្រសួងធនធានទឹក និងឧតុនិយម បាន និងកំពុងធ្វើការតាមដានយ៉ាងយកចិត្តទុកដាក់ អំពីព្យុះម៉ូឡាវនេះ ព្រោះវាអាចនឹងធ្វើឱ្យទឹកទន្លេមេគង្គ ហក់ឡើងវិញម្តងទៀត នៅចុងរដូវវស្សានេះ៕
